ਮੁੱਕਦਾ ਜਾ ਰਿਹੈ ਰਿਸ਼ਤਿਆਂ ਦਾ ਮੋਹ ! ਮਕਾਨ ਪਿੱਛੇ ਛੋਟੇ ਭਰਾ ਨੇ ਹੀ ਵੱਡੇ ਭਰਾ ਦਾ ਕਰ”ਤਾ ਕਤਲ

ਮੰਡੀ ਗੋਬਿੰਦਗੜ੍ਹ – ਲੋਹਾ ਨਗਰੀ ਵਜੋਂ ਜਾਣੀ ਜਾਂਦੀ ਮੰਡੀ ਗੋਬਿੰਦਗੜ੍ਹ ’ਚ ਪੈਂਦੇ ਵਾਰਡ ਨੰਬਰ 10, ਪਿੰਡ ਅਜਨਾਲੀ ਵਿਖੇ ਇਕ ਪ੍ਰਵਾਸੀ ਵਿਅਕਤੀ ਵੱਲੋਂ ਆਪਣੇ ਹੀ ਵੱਡੇ ਭਰਾ ਦਾ ਕਤਲ ਕਰ ਦਿੱਤੇ ਜਾਣ ਦੀ ਸੂਚਨਾ ਮਿਲੀ ਹੈ। ਵਜ੍ਹਾ ਦੋਵੇਂ ਭਰਾਵਾਂ ’ਚ ਬਿਹਾਰ ’ਚ ਸਥਿਤ ਆਪਣੇ ਪਿੰਡ ’ਚ ਮਕਾਨ ਬਣਾਉਣ ਨੂੰ ਲੈ ਕਿਹਾ-ਸੁਣੀ ਹੋਈ ਦੱਸੀ ਜਾ ਰਹੀ ਹੈ।

ਜਾਣਕਾਰੀ ਅਨੁਸਾਰ ਰੀਨਾ ਗੁਪਤਾ ਵਾਸੀ ਅਜਨਾਲੀ ਨੇ ਆਪਣੇ ਬਿਆਨਾਂ ’ਚ ਦੱਸਿਆ ਕਿ ਉਸ ਵੱਲੋਂ ਬਣਾਏ ਗਏ ਮਕਾਨ ਦੇ ਗਰਾਊਂਡ ਫਲੋਰ ’ਚ ਗੌਰਵ ਰਾਮ ਪੁੱਤਰ ਮਹਿੰਦਰ ਰਾਮ ਰਹਿੰਦਾ ਸੀ, ਜਦਕਿ ਉਸ ਦਾ ਵੱਡਾ ਭਰਾ ਲਲਨ ਰਾਮ ਵਾਸੀਆਨ ਪਿੰਡ ਬਨੀਆ ਭੱਟੀ ਬਿਜਨੈਲੀ ਖੇਮ ਚੰਦ ਥਾਣਾ ਕੇ ਨਗਰ ਜ਼ਿਲ੍ਹਾ ਪੂਰਨੀਆ (ਬਿਹਾਰ) ਦੂਜੀ ਮੰਜ਼ਿਲ ’ਤੇ ਰਹਿੰਦਾ ਹੈ।

ਉਨ੍ਹਾਂ ਦੱਸਿਆ ਕਿ 25 ਅਗਸਤ ਸ਼ਾਮ ਕਰੀਬ ਸਾਢੇ 8 ਵਜੇ ਲਲਨ ਰਾਮ ਦੂਜੀ ਮੰਜ਼ਿਲ ’ਤੇ ਕਿਸੇ ਨਾਲ ਮੋਬਾਈਲ ’ਤੇ ਗੱਲਬਾਤ ਕਰ ਰਿਹਾ ਸੀ ਤਾਂ ਅਚਾਨਕ ਗੌਰਵ ਰਾਮ ਵੀ ਉਸ ਕੋਲ ਚਲਾ ਗਿਆ। ਇਸ ਮੌਕੇ ਦੋਵਾਂ ਨੇ ਸ਼ਰਾਬ ਪੀਤੀ ਹੋਈ ਸੀ ਤੇ ਦੋਵੇਂ ਆਪਸ ’ਚ ਬਹਿਸ ਕਰਨ ਲੱਗੇ।

ਰੀਨਾ ਗੁਪਤਾ ਨੇ ਦੱਸਿਆ ਕਿ ਕੁਝ ਦੇਰ ਬਾਅਦ ਜਦੋਂ ਉਹ ਆਪਣੇ ਕਮਰੇ ’ਚੋਂ ਬਾਹਰ ਨਿਕਲੀ ਤਾਂ ਦੇਖਿਆ ਕੇ ਗੌਰਵ ਰਾਮ ਨੇ ਹੱਥ ’ਚ ਇਕ ਲੋਹੇ ਦੀ ਤਿੱਖੀ ਚੀਜ਼ ਫੜੀ ਹੋਈ ਸੀ, ਜਿਸ ਦੀ ਕਮੀਜ਼ ਨੂੰ ਖੂਨ ਵੀ ਲੱਗਾ ਹੋਇਆ ਸੀ। ਇਸ ਤੋਂ ਬਾਅਦ ਜਦੋਂ ਉਸ ਨੇ ਆਪਣੇ ਲੜਕੇ ਵਿਸ਼ਾਲ ਗੁਪਤਾ ਨਾਲ ਜਾ ਕੇ ਦੇਖਿਆ ਤਾਂ ਲਲਨ ਰਾਮ ਛੱਤ ਤੇ ਲਹੂ-ਲੁਹਾਨ ਹਾਲਤ ’ਚ ਪਿਆ ਸੀ, ਜਿਸ ਨੂੰ ਉਹ ਤੁਰੰਤ ਸਿਵਲ ਹਸਪਤਾਲ ਮੰਡੀ ਗੋਬਿੰਦਗੜ੍ਹ ਵਿਖੇ ਲੈ ਗਏ।

ਗੰਭੀਰ ਹਾਲਤ ਹੋਣ ਕਰ ਕੇ ਡਾਕਟਰਾਂ ਨੇ ਮੁੱਢਲੀ ਸਹਾਇਤਾ ਦੇ ਕੇ ਲਲਨ ਰਾਮ ਨੂੰ ਉੱਥੋਂ ਗੌਰਮਿੰਟ ਮੈਡੀਕਲ ਕਾਲਜ ਹਸਪਤਾਲ ਸੈਕਟਰ-32 ਚੰਡੀਗੜ੍ਹ ਲਈ ਰੈਫਰ ਕਰ ਦਿੱਤਾ, ਜਿੱਥੇ ਪੁੱਜਣ ’ਤੇ ਡਾਕਟਰਾਂ ਨੇ ਲਲਨ ਰਾਮ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਮਕਾਨ ਮਾਲਕ ਰੀਨਾ ਗੁਪਤਾ ਨੇ ਪੁਲਸ ਨੂੰ ਦੱਸਿਆ ਕਿ ਗੌਰਵ ਰਾਮ ਦਾ ਲਲਨ ਰਾਮ ਨਾਲ ਆਪਣੇ ਪਿੰਡ ਵਿਚਲੇ ਘਰ ਨੂੰ ਬਣਾਉਣ ਕਰ ਕੇ ਲੜਾਈ-ਝਗੜਾ ਚੱਲਦਾ ਰਹਿੰਦਾ ਸੀ। ਮੰਡੀ ਗੋਬਿੰਦਗੜ੍ਹ ਪੁਲਸ ਨੇ ਗੌਰਵ ਰਾਮ ਖਿਲਾਫ਼ ਕੇਸ ਦਰਜ ਕਰਨ ਉਪਰੰਤ ਮ੍ਰਿਤਕ ਲਲਨ ਕੁਮਾਰ ਦੀ ਲਾਸ਼ ਕਬਜ਼ੇ ’ਚ ਲੈ ਕੇ ਸਰਕਾਰੀ ਹਸਪਤਾਲ ਸੈਕਟਰ-32 ਚੰਡੀਗੜ੍ਹ ਦੀ ਮੌਰਚਰੀ ’ਚ ਰਖਵਾ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।