ਜਲੰਧਰ🙁 ਕੰਵਲਜੀਤ ਸਿੰਘ ਮੱਕੜ ) – ਹੋਟਲਾਂ ਅਤੇ ਸਰਾਵਾਂ ਲਈ ਨਵੇਂ ਨਿਯਮ ਭਾਰਤੀ ਨਾਗਰਿਕ ਸੁਰੱਖਿਆ ਸੰਹਿਤਾ, 2023 ਦੀ ਧਾਰਾ 163 ਤਹਿਤ, ਹੁਣ ਜਲੰਧਰ ਕਮਿਸ਼ਨਰੇਟ ਦੀ ਹਦੂਦ ਵਿੱਚ ਕੋਈ ਵੀ ਹੋਟਲ, ਮੋਟਲ, ਗੈਸਟ ਹਾਊਸ ਜਾਂ ਸਰਾਂ ਕਿਸੇ ਵਿਅਕਤੀ ਨੂੰ ਉਸ ਦੀ ਪਛਾਣ ਦੀ ਪੁਸ਼ਟੀ ਕੀਤੇ ਬਿਨਾਂ ਠਹਿਰਾ ਨਹੀਂ ਸਕਦੇ। ਇਸਦੇ ਤਹਿਤ:
ਹਰੇਕ ਮਹਿਮਾਨ ਤੋਂ ਸਰਕਾਰੀ ਜਾਰੀ ਕੀਤਾ ਵੈਧ ਫੋਟੋ ਆਈ.ਡੀ. ਦੀ ਸਵੈ-ਤਸਦੀਕਸ਼ੁਦਾ ਕਾਪੀ ਲੈਣੀ ਲਾਜ਼ਮੀ ਹੈ।
ਮੋਬਾਈਲ ਨੰਬਰ ਦੀ ਤਸਦੀਕ ਕਰਨੀ ਹੋਵੇਗੀ।
ਮਹਿਮਾਨਾਂ ਦੀ ਜਾਣਕਾਰੀ ਇੱਕ ਨਿਰਧਾਰਤ ਪ੍ਰੋਫਾਰਮੇ ਵਿੱਚ ਰਜਿਸਟਰ ‘ਚ ਦਰਜ ਕਰਨੀ ਹੋਵੇਗੀ।
ਇਹ ਰਿਕਾਰਡ ਹਰ ਰੋਜ਼ ਸਵੇਰੇ 10 ਵਜੇ ਤੱਕ ਸਬੰਧਤ ਥਾਣੇ ਨੂੰ ਭੇਜਣਾ ਲਾਜ਼ਮੀ ਹੈ।
ਹਰੇਕ ਸੋਮਵਾਰ ਨੂੰ ਇਹ ਰਿਕਾਰਡ ਮੁੱਖ ਅਫਸਰ ਥਾਣੇ ਤੋਂ ਤਸਦੀਕ ਕਰਵਾਉਣਾ ਹੋਵੇਗਾ।
ਇਸਦੇ ਨਾਲ-ਨਾਲ, ਹੋਟਲਾਂ, ਰੈਸਟੋਰੈਂਟਾਂ ਅਤੇ ਸਰਾਵਾਂ ਵਿੱਚ ਸੀ.ਸੀ.ਟੀ.ਵੀ. ਕੈਮਰੇ ਲਗਾਉਣ ਦੀ ਹਦਾਇਤ ਵੀ ਦਿੱਤੀ ਗਈ ਹੈ, ਖਾਸ ਕਰਕੇ ਕੋਰੀਡੋਰ, ਲਿਫਟ, ਰਿਸੈਪਸ਼ਨ ਅਤੇ ਮੁੱਖ ਦਰਵਾਜ਼ਿਆਂ ‘ਤੇ। ਵਿਦੇਸ਼ੀ ਮਹਿਮਾਨਾਂ ਦੀ ਜਾਣਕਾਰੀ ਫੌਰਨਰਸ ਰਜਿਸਟ੍ਰੇਸ਼ਨ ਆਫਿਸ, ਦਫ਼ਤਰ ਕਮਿਸ਼ਨਰ ਪੁਲਿਸ, ਜਲੰਧਰ ਨੂੰ ਦੇਣੀ ਲਾਜ਼ਮੀ ਹੈ।
ਹਥਿਆਰਾਂ ਅਤੇ ਜਥਿਆਂ ‘ਤੇ ਪਾਬੰਦੀ
ਕਮਿਸ਼ਨਰੇਟ ਹੱਦੂਦ ਵਿੱਚ ਕਿਸੇ ਵੀ ਵਿਅਕਤੀ ਨੂੰ ਬੇਸਬਾਲ ਬੈਟ, ਤੇਜ਼ਧਾਰ ਜਾਂ ਨੋਕੀਲੇ ਹਥਿਆਰ ਜਾਂ ਹੋਰ ਜਾਨਲੇਵਾ ਹਥਿਆਰ ਲੈ ਕੇ ਗੱਡੀ ਵਿੱਚ ਯਾਤਰਾ ਕਰਨ ‘ਤੇ ਪਾਬੰਦੀ ਲਗਾਈ ਗਈ ਹੈ। ਇਸੇ ਤਰ੍ਹਾਂ, ਪੰਜ ਜਾਂ ਪੰਜ ਤੋਂ ਵੱਧ ਵਿਅਕਤੀਆਂ ਦੇ ਇਕੱਠੇ ਹੋਣ, ਜਲੂਸ ਕੱਢਣ ਜਾਂ ਨਾਅਰੇਬਾਜ਼ੀ ਕਰਨ ‘ਤੇ ਵੀ ਰੋਕ ਲਾਈ ਗਈ ਹੈ।
ਔਰਤਾਂ ਦੀ ਸੁਰੱਖਿਆ ਲਈ ਵਿਸ਼ੇਸ਼ ਮੁਹਿੰਮ
ਕਮਿਸ਼ਨਰੇਟ ਪੁਲਿਸ ਜਲੰਧਰ ਨੇ ਔਰਤਾਂ ਅਤੇ ਆਮ ਲੋਕਾਂ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਛੇੜਛਾੜ ਅਤੇ ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਵਿਰੁੱਧ ਇੱਕ ਵਿਸ਼ੇਸ਼ ਮੁਹਿੰਮ ਚਲਾਈ। ਇਸ ਮੁਹਿੰਮ ਦੌਰਾਨ:
ਕੁੱਲ 310 ਵਾਹਨਾਂ ਦੀ ਜਾਂਚ ਕੀਤੀ ਗਈ।
33 ਵਾਹਨਾਂ ਦੇ ਚਲਾਨ ਕੀਤੇ ਗਏ।
7 ਮੋਟਰਸਾਈਕਲਾਂ ਜ਼ਬਤ ਕੀਤੀਆਂ ਗਈਆਂ।
ਇਹ ਮੁਹਿੰਮ ਔਰਤਾਂ, ਲੜਕੀਆਂ ਅਤੇ ਆਮ ਨਾਗਰਿਕਾਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਚਲਾਈ ਗਈ ਸੀ।
ਝੂਠੀ ਖ਼ਬਰਾਂ ਵਿਰੁੱਧ ਸਾਵਧਾਨੀ
ਜਲੰਧਰ ਪੁਲਿਸ ਨੇ ਲੋਕਾਂ ਨੂੰ ਚੇਤਾਵਨੀ ਦਿੱਤੀ ਹੈ ਕਿ ਝੂਠੀ ਖ਼ਬਰਾਂ ਤੇ ਵਿਸ਼ਵਾਸ ਨਾ ਕਰਨ। ਸੋਸ਼ਲ ਮੀਡੀਆ ‘ਤੇ ਫੈਲ ਰਹੀਆਂ ਅਫਵਾਹਾਂ ਨੂੰ ਨਜ਼ਰਅੰਦਾਜ਼ ਕਰਨਾ ਅਤੇ ਸਿਰਫ਼ ਸਰਕਾਰੀ ਸਰੋਤਾਂ ਤੋਂ ਪ੍ਰਾਪਤ ਜਾਣਕਾਰੀ ‘ਤੇ ਭਰੋਸਾ ਕਰਨਾ ਚਾਹੀਦਾ ਹੈ।
