ਜਲੰਧਰ :(ਕੰਵਲਜੀਤ ਸਿੰਘ ਮੱਕੜ) – ਪੁਲਿਸ ਕਮਿਸ਼ਨਰ ਧਨਪ੍ਰੀਤ ਕੌਰ ਦੇ ਦਿਸ਼ਾ-ਨਿਰਦੇਸ਼ਾਂ ‘ਤੇ ਕਾਰਵਾਈ ਕਰਦਿਆਂ ਐਡੀਸ਼ਨਲ ਡਿਪਟੀ ਕਮਿਸ਼ਨਰ ਪੁਲਿਸ (ਟ੍ਰੈਫਿਕ) ਅਤੇ ਅਸਿਸਟੈਂਟ ਕਮਿਸ਼ਨਰ ਪੁਲਿਸ (ਟ੍ਰੈਫਿਕ) ਨੇ ਜਾਣਕਾਰੀ ਦਿੱਤੀ ਕਿ ਪੁਲਿਸ ਲਾਈਨ ਜਲੰਧਰ ਵਿਖੇ ਸਥਿਤ ਵਾਹਨ ਯਾਰਡ ਵਿੱਚ ਪਿਛਲੇ ਪੰਜ ਸਾਲਾਂ ਤੋਂ ਲਾਖਾਂ ਦੇ ਮੁੱਲ ਦੇ ਦੋ ਪਹੀਆ ਤੇ ਚਾਰ ਪਹੀਆ ਵਾਹਨ ਖੜੇ ਹਨ। ਇਹ ਵਾਹਨ ਉਹਨਾਂ ਮਾਲਕਾਂ ਦੇ ਹਨ ਜੋ ਚਾਲਾਨ ਭਰ ਕੇ ਆਪਣੇ ਵਾਹਨ ਨਹੀਂ ਛੁਡਵਾ ਰਹੇ।
ਟਰੈਫਿਕ ਪੁਲਿਸ ਕਮਿਸ਼ਨਰੇਟ ਜਲੰਧਰ ਵੱਲੋਂ ਇਨ੍ਹਾਂ ਵਾਹਨਾਂ ਦੇ ਮਾਲਕਾਂ ਅਤੇ ਚਾਲਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਜਲਦ ਤੋਂ ਜਲਦ ਆਪਣਾ ਚਾਲਾਨ ਰੀਜਨਲ ਟ੍ਰਾਂਸਪੋਰਟ ਅਥਾਰਟੀ ਰਾਹੀਂ ਭਰ ਕੇ ਆਪਣੇ ਵਾਹਨ ਛੁਡਵਾਉਣ।
ਜੇਕਰ ਮਾਲਕਾਂ ਵੱਲੋਂ ਹਜੇ ਵੀ ਚਾਲਾਨ ਭਰ ਕੇ ਵਾਹਨ ਰਿਲੀਜ਼ ਨਾ ਕਰਵਾਏ ਗਏ, ਤਾਂ ਕਾਨੂੰਨੀ ਨਿਯਮਾਂ ਦੇ ਅਧੀਨ ਇਨ੍ਹਾਂ ਵਾਹਨਾਂ ਨੂੰ ਨੀਲਾਮ ਜਾਂ ਨਸ਼ਟ ਕਰਨ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਜਾਵੇਗੀ।
ਪੁਲਿਸ ਅਧਿਕਾਰੀਆਂ ਨੇ ਸਾਫ ਕੀਤਾ ਹੈ ਕਿ ਇਨ੍ਹਾਂ ਵਾਹਨਾਂ ਦੀ ਪਛਾਣ, ਜੰਚ ਅਤੇ ਨਿਪਟਾਰਾ ਕਰਕੇ ਨਿਯਮਾਂ ਅਨੁਸਾਰ ਸਖਤ ਕਾਰਵਾਈ ਕੀਤੀ ਜਾਵੇਗੀ।
ਨੋਟ: ਵਾਹਨ ਮਾਲਕ ਤੁਰੰਤ ਕਾਰਵਾਈ ਕਰਕੇ ਆਪਣੀ ਸੰਪਤੀ ਨੂੰ ਬਚਾ ਸਕਦੇ ਹਨ, ਨਹੀਂ ਤਾਂ ਉਨ੍ਹਾਂ ਨੂੰ ਅਣਚਾਹੇ ਨੁਕਸਾਨ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
