ਜਲੰਧਰ: (ਕੰਵਲਜੀਤ ਸਿੰਘ ਮੱਕੜ) – ਰਿਸ਼ੀਕੇਸ਼/ਚਮੋਲੀ, ਉਤਰਾਖੰਡ – ਸਿੱਖ ਜਗਤ ਦੇ ਮਹਾਨ ਤੀਰਥ ਗੁਰਦੁਆਰਾ ਸ਼੍ਰੀ ਹੇਮਕੁੰਟ ਸਾਹਿਬ ਦੀ ਸਾਲਾਨਾ ਯਾਤਰਾ 22 ਮਈ 2025 ਨੂੰ ਪਹਿਲੇ ਜਥੇ ਦੀ ਰਵਾਨਗੀ ਨਾਲ ਸ਼ੁਰੂ ਹੋਣ ਜਾ ਰਹੀ ਹੈ। ਗੁਰੂ ਮਰਯਾਦਾ ਅਨੁਸਾਰ ਪੰਜ ਪਿਆਰਿਆਂ ਦੀ ਅਗਵਾਈ ਹੇਠ ਗੁਰਦੁਆਰਾ ਹੇਮਕੁੰਟ ਸਾਹਿਬ ਕੰਪਲੈਕਸ, ਰਿਸ਼ੀਕੇਸ਼ ਤੋਂ ਯਾਤਰਾ ਦੀ ਸ਼ੁਰੂਆਤ ਹੋਵੇਗੀ।
ਇਸ ਪਵਿੱਤਰ ਸਮਾਗਮ ਨੂੰ ਹੋਰ ਵਿਸ਼ੇਸ਼ ਬਣਾਉਣ ਲਈ ਉਤਰਾਖੰਡ ਦੇ ਰਾਜਪਾਲ ਲੈਫਟੀਨੈਂਟ ਜਨਰਲ (ਸੇਵਾਮੁਕਤ) ਐੱਸ. ਗੁਰਮੀਤ ਸਿੰਘ, ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ, ਕਈ ਮੰਤਰੀ, ਸੰਤ-ਮਹਾਪੁਰਖ ਅਤੇ ਹੋਰ ਪ੍ਰਮੁੱਖ ਵਿਅਕਤੀਆਂ ਮੌਜੂਦ ਰਹਿਣਗੇ।
ਇਸ ਯਾਤਰਾ ਦੀ ਮੁੱਖ ਰਵਾਨਗੀ ਤੋਂ ਬਾਅਦ 25 ਮਈ ਤੋਂ ਸਾਰੇ ਸ਼ਰਧਾਲੂਆਂ ਲਈ ਰਸਮੀ ਤੌਰ ‘ਤੇ ਦਰਸ਼ਨ ਖੁੱਲ੍ਹ ਜਾਣਗੇ। ਹੇਮਕੁੰਟ ਸਾਹਿਬ ਤੱਕ ਜਾਂਦੇ ਦੁਰਗਮ ਮਾਰਗ ਨੂੰ ਸੁਰੱਖਿਅਤ ਅਤੇ ਯੋਗ ਬਣਾਉਣ ਲਈ ਭਾਰਤੀ ਫੌਜ ਦੀ ਟੀਮ ਪਹਿਲਾਂ ਹੀ ਗੋਵਿੰਦਘਾਟ ਪਹੁੰਚ ਕੇ ਬਰਫ਼ ਹਟਾਉਣ ਅਤੇ ਰਸਤੇ ਦੀ ਸਫਾਈ ਦਾ ਕੰਮ ਸ਼ੁਰੂ ਕਰ ਚੁੱਕੀ ਹੈ।
ਸੂਤਰਾਂ ਦੇ ਅਨੁਸਾਰ ਇਸ ਵਾਰ ਵੀ ਸਖ਼ਤ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਹਨ। ਇਲਾਕੇ ‘ਚ ਸੁਰੱਖਿਆ ਬਲਾਂ ਦੀ ਨਾਇਟ-ਡੇ ਪੈਟਰੋਲਿੰਗ ਜਾਰੀ ਹੈ, ਨਾਲ ਹੀ ਡ੍ਰੋਨ ਅਤੇ ਡਿਜੀਟਲ ਨਿਗਰਾਨੀ ਸਿਸਟਮ ਵੀ ਲਾਗੂ ਕੀਤਾ ਗਿਆ ਹੈ।
ਗੁਰਦੁਆਰਾ ਮੈਨੇਜਮੈਂਟ ਟਰੱਸਟ ਵੱਲੋਂ ਯਾਤਰੀਆਂ ਲਈ ਲੰਗਰ, ਰਿਹਾਇਸ਼, ਮੈਡੀਕਲ ਅਤੇ ਆਵਾਜਾਈ ਦੀਆਂ ਵਧੀਆ ਸਹੂਲਤਾਂ ਪ੍ਰਦਾਨ ਕੀਤੀਆਂ ਗਈਆਂ ਹਨ। ਪ੍ਰਸ਼ਾਸਨ ਵੱਲੋਂ ਵੀ ਮੌਸਮੀ ਹਾਲਾਤਾਂ ਨੂੰ ਧਿਆਨ ‘ਚ ਰੱਖਦਿਆਂ ਸੁਰੱਖਿਆ ਅਤੇ ਰਾਹਤ ਬੰਦੋਬਸਤ ਪੂਰੇ ਤੌਰ ‘ਤੇ ਕੀਤੇ ਗਏ ਹਨ।
ਟਰੱਸਟ ਵੱਲੋਂ ਸਾਰੇ ਸੰਗਤਾਂ, ਮਹਿਮਾਨਾਂ ਅਤੇ ਸ਼ਰਧਾਲੂਆਂ ਨੂੰ ਹੇਮਕੁੰਟ ਸਾਹਿਬ ਦੀ ਪਵਿੱਤਰ ਯਾਤਰਾ ਵਿੱਚ ਸ਼ਾਮਿਲ ਹੋਣ ਦਾ ਸੱਦਾ ਦਿੰਦਿਆਂ ਇਹ ਅਪੀਲ ਵੀ ਕੀਤੀ ਗਈ ਹੈ ਕਿ ਯਾਤਰਾ ਦੌਰਾਨ ਸਾਵਧਾਨੀ ਅਤੇ ਨੈਤਿਕ ਅਨੁਸ਼ਾਸਨ ਦੀ ਪਾਲਣਾ ਕੀਤੀ ਜਾਵੇ।
