ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਦੇ ਗੋਪਾਲ ਨਗਰ ਗਾਜੀਗੁਲਾ ਤੋਂ ਸੋਢਲ ਵੱਲ ਜਾਂਦੇ ਫਲਾਈਓਵਰ ‘ਤੇ ਅੱਜ ਸਵੇਰੇ ਇੱਕ ਭਾਰੀ ਹਾਦਸਾ ਵਾਪਰਿਆ, ਜਦ ਇੱਕ ਟਰੱਕ ਬੇਕਾਬੂ ਹੋ ਕੇ ਫਲਾਈਓਵਰ ਦੇ ਪਿਲਰ ਨਾਲ ਜਾ ਟਕਰਾਇਆ। ਇਹ ਹਾਦਸਾ ਫਲਾਈਓਵਰ ਸ਼ੁਰੂ ਹੋਣ ਤੋਂ ਥੋੜ੍ਹਾ ਪਹਿਲਾਂ ਵਾਪਰਿਆ, ਜਿਸ ਕਾਰਨ ਰਾਹਗੀਰਾਂ ਨੂੰ ਘੰਟਿਆਂ ਲੰਮਾ ਜਾਮ ਝੱਲਣਾ ਪਿਆ।
ਮੌਕੇ ‘ਤੇ ਮੌਜੂਦ ਲੋਕਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਕ, ਟਰੱਕ ਚਾਲਕ जसਬੀਰ ਸਿੰਘ, ਜੋ ਕਿ ਅੰਮ੍ਰਿਤਸਰ ਵਾਸੀ ਹੈ, ਨੇ ਦੱਸਿਆ ਕਿ ਉਹ ਮਕਸੂਦਾ ਮੰਡੀ ਵੱਲ ਜਾ ਰਿਹਾ ਸੀ। ਵਰਕਸ਼ਾਪ ਚੌਂਕ ਨੇੜੇ ਕਿਸੇ ਅਣਜਾਣੇ ਨੇ ਉਨ੍ਹਾਂ ਨੂੰ ਗਲਤ ਰਸਤਾ ਦੱਸ ਕੇ ਫਲਾਈਓਵਰ ਵੱਲ ਭੇਜ ਦਿੱਤਾ। ਜਦ ਉਹ ਇਥੇ ਪਹੁੰਚਿਆ ਤਾਂ ਸਾਹਮਣੇ ਤੋਂ ਐਕਟੀਵਾ ‘ਤੇ ਬੱਚੇ ਆ ਰਹੇ ਸਨ, ਜਿਨ੍ਹਾਂ ਨੂੰ ਬਚਾਉਣ ਦੀ ਕੋਸ਼ਿਸ਼ ਕਰਦਿਆਂ ਟਰੱਕ ਨੇ ਨਿਯੰਤਰਣ ਗਵਾ ਦਿੱਤਾ ਅਤੇ ਪਿਲਰ ਨਾਲ ਜਾ ਟਕਰਾਇਆ।
ਦਾਖਲ ਤਸਵੀਰਾਂ ਤੋਂ ਪਤਾ ਲੱਗਦਾ ਹੈ ਕਿ ਟਰੱਕ ਦੇ ਅੱਗੇ ਵਾਲਾ ਹਿੱਸਾ ਪੂਰੀ ਤਰ੍ਹਾਂ ਨੁਕਸਾਨਗ੍ਰਸਤ ਹੋ ਗਿਆ ਹੈ, ਪਰ ਚੰਗੀ ਗੱਲ ਇਹ ਰਹੀ ਕਿ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ।
ਇਸ ਹਾਦਸੇ ਕਾਰਨ ਫਲਾਈਓਵਰ ‘ਤੇ ਕਾਫੀ ਦੇਰ ਤੱਕ ਟ੍ਰੈਫਿਕ ਜਾਮ ਰਿਹਾ। ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਟਰੱਕ ਨੂੰ ਹਟਵਾਇਆ ਅਤੇ ਟ੍ਰੈਫਿਕ ਨੌਰਮਲ ਕਰਵਾਇਆ।
ਯਾਦ ਰਹੇ ਕਿ ਇਹ ਕੋਈ ਪਹਿਲਾ ਮਾਮਲਾ ਨਹੀਂ ਹੈ। ਇਨ੍ਹਾਂ ਪਿਲਰਾਂ ਨਾਲ ਟਕਰਾਉਣ ਵਾਲੇ ਹਾਦਸੇ ਅਕਸਰ ਇਸ ਫਲਾਈਓਵਰ ‘ਤੇ ਵਾਪਰਦੇ ਰਹਿੰਦੇ ਹਨ। ਇਨ੍ਹਾਂ ਹਾਦਸਿਆਂ ਤੋਂ ਸਾਬਤ ਹੁੰਦਾ ਹੈ ਕਿ ਇੱਥੇ ਸੰਕੇਤਕ ਚਿੰਨ੍ਹਾਂ ਦੀ ਕਮੀ ਜਾਂ ਗਲਤ ਮਾਰਗਦਰਸ਼ਨ ਚਾਲਕਾਂ ਨੂੰ ਮੁਸ਼ਕਲ ‘ਚ ਪਾ ਰਹੇ ਹਨ।
ਸਥਾਨਕ ਵਾਸੀਆਂ ਅਤੇ ਡਰਾਈਵਰਾਂ ਵੱਲੋਂ ਮੰਗ ਕੀਤੀ ਗਈ ਹੈ ਕਿ ਇਥੇ ਵਧੀਆ ਮਾਰਗਦਰਸ਼ਨ ਸੰਕੇਤ ਅਤੇ ਹੈਵੀ ਵਾਹਨਾਂ ਲਈ ਚੇਤਾਵਨੀ ਬੋਰਡ ਲਾਏ ਜਾਣ, ਤਾਂ ਜੋ ਭਵਿੱਖ ਵਿੱਚ ਅਜਿਹੇ ਹਾਦਸਿਆਂ ਤੋਂ ਬਚਿਆ ਜਾ ਸਕੇ।
