ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਸਵੱਛਤਾ ਸਰਵੇ 2025 ਵਿੱਚ ਜਲੰਧਰ ਨੂੰ ਅਖਿਲ ਭਾਰਤੀ ਪੱਧਰ ’ਤੇ 82ਵਾਂ ਸਥਾਨ ਮਿਲਣ ਦੀ ਘੋਸ਼ਣਾ ਤੋਂ ਬਾਅਦ ਜਿੱਥੇ ਨਗਰ ਨਿਗਮ ਦੇ ਅਧਿਕਾਰੀ ਤੇ ਸਿਆਸੀ ਆਗੂ ਖੁਸ਼ੀ ਮਨਾਉਣ ਵਿੱਚ ਲੱਗੇ ਹੋਏ ਹਨ, ਉਥੇ ਹੀ ਕਾਂਗਰਸੀ ਪਾਰਸ਼ਦ ਪਵਨ ਕੁਮਾਰ ਨੇ ਇਸ ਰੈਂਕਿੰਗ ਨੂੰ ਲੈ ਕੇ ਸਖਤ ਨਾਰਾਜ਼ਗੀ ਜਤਾਈ ਹੈ। ਉਨ੍ਹਾਂ ਨੇ ਅਖਬਾਰਾਂ ਅਤੇ ਸੋਸ਼ਲ ਮੀਡੀਆ ’ਤੇ ਵਾਰਡਾਂ ਵਿਚ ਲੱਗੇ ਕੂੜੇ ਦੇ ਢੇਰਾਂ ਦੀਆਂ ਤਾਜ਼ਾ ਤਸਵੀਰਾਂ ਜਾਰੀ ਕਰਦੇ ਹੋਏ ਨਗਰ ਨਿਗਮ ਦੀ ਕਾਰਗੁਜ਼ਾਰੀ ’ਤੇ ਸਿੱਧੇ ਤੌਰ ’ਤੇ ਉਂਗਲ ਚੁੱਕੀ ਹੈ।
ਪਵਨ ਕੁਮਾਰ ਨੇ ਕਿਹਾ:
> “ਮੇਅਰ ਤੇ ਕਮਿਸ਼ਨਰ ਨੇ ਜਿਹੜੇ ਚਸ਼ਮੇ ਸਰਵੇ ਟੀਮ ਨੂੰ ਲਾਏ ਸਨ, ਓਹ ਸਾਨੂੰ ਵੀ ਦੇ ਦਿੱਤੇ ਜਾਣ ਤਾਂ ਸਾਨੂੰ ਵੀ ਸਾਡੇ ਵਾਰਡ ਵਿੱਚ ਕੂੜਾ ਨਹੀਂ ਦਿੱਸੇਗਾ।”
ਉਨ੍ਹਾਂ ਅਗੇ ਕਿਹਾ ਕਿ ਇਹ ਰੈਂਕ ਨਿਰਧਾਰਨ ਜਮੀਨੀ ਹਕੀਕਤਾਂ ਤੋਂ ਕੱਟਿਆ ਹੋਇਆ ਲੱਗਦਾ ਹੈ ਕਿਉਂਕਿ ਜਲੰਧਰ ਦੇ ਬੇਸ਼ੁਮਾਰ ਇਲਾਕਿਆਂ ਵਿੱਚ ਅੱਜ ਵੀ ਕੂੜੇ ਦੇ ਢੇਰ ਲੱਗੇ ਹੋਏ ਹਨ, ਅਤੇ ਨਗਰ ਨਿਗਮ ਨੇ ਇਨ੍ਹਾਂ ਦੀ ਸਫ਼ਾਈ ਲਈ ਕੋਈ ਵਿਸ਼ੇਸ਼ ਯਤਨ ਨਹੀਂ ਕੀਤੇ।
ਇਹ ਹਨ ਉਹ ਇਲਾਕੇ ਜਿੱਥੋਂ ਤਸਵੀਰਾਂ ਜਾਰੀ ਕੀਤੀਆਂ ਗਈਆਂ:
1. ਵਾਰਡ ਨੰਬਰ 35 – ਪੰਜਾਬੀ ਬਾਗ:
ਸੈਂਟ ਸੋਲਜਰ ਸਕੂਲ ਦੇ ਨੇੜੇ ਖਾਲੀ ਪਲਾਟ ਵਿੱਚ ਲਗਾਤਾਰ ਕੂੜਾ ਪਿਆ ਹੋਇਆ ਹੈ। ਨਾਂ ਸਫਾਈ ਹੋ ਰਹੀ ਹੈ, ਨਾਂ ਹੀ ਕਿਸੇ ਕਰਮਚਾਰੀ ਦੀ ਡਿਊਟੀ ਲਾਈ ਗਈ ਹੈ।
2. ਵਾਰਡ ਨੰਬਰ 36 – ਮਾਨ ਨਗਰ:
ਇਥੇ ਵੀ ਕਈ ਹਫ਼ਤਿਆਂ ਤੋਂ ਕੂੜੇ ਦੇ ਢੇਰ ਪਏ ਹੋਏ ਹਨ। ਪਵਨ ਕੁਮਾਰ ਨੇ ਇਥੇ ਖੁਦ ਖੜ੍ਹ ਕੇ ਤਸਵੀਰ ਖਿਚਵਾਈ ਅਤੇ ਲੋਕਲ ਵਾਸੀਆਂ ਦੇ ਦੁਖ ਸੁਣੇ।
3. ਵਾਰਡ ਨੰਬਰ 41 – ਸਿਧਾਰਥ ਨਗਰ:
ਖਾਲੀ ਪਲਾਟਾਂ ਵਿੱਚ ਬੇਲਗਾਮ ਢੰਗ ਨਾਲ ਕੂੜਾ ਸੁੱਟਿਆ ਜਾ ਰਿਹਾ ਹੈ। ਮੱਖੀਆਂ ਅਤੇ ਬਦਬੂ ਕਾਰਨ ਆਸ-ਪਾਸ ਦੇ ਵਾਸੀਆਂ ਦੀ ਜ਼ਿੰਦਗੀ ਦੁਸ਼ਵਾਰ ਹੋ ਰਹੀ ਹੈ।
ਸਵਾਲ ਉੱਠਦੇ ਹਨ:
ਕੀ ਸਵੱਛਤਾ ਸਰਵੇ ਕਰਦੀ ਟੀਮ ਨੇ ਇਨ੍ਹਾਂ ਇਲਾਕਿਆਂ ਦਾ ਦੌਰਾ ਕੀਤਾ ਸੀ?
ਜੇ ਕੀਤਾ ਸੀ, ਤਾਂ ਰਿਪੋਰਟ ਵਿੱਚ ਇਨ੍ਹਾਂ ਕੂੜੇ ਦੇ ਢੇਰਾਂ ਦਾ ਜ਼ਿਕਰ ਕਿਉਂ ਨਹੀਂ ਕੀਤਾ ਗਿਆ?
ਜੇ ਨਹੀਂ ਕੀਤਾ, ਤਾਂ ਰੈਂਕਿੰਗ ਕਿਸ ਆਧਾਰ ‘ਤੇ ਦਿੱਤੀ ਗਈ?
ਪਵਨ ਕੁਮਾਰ ਨੇ ਮੰਗ ਕੀਤੀ ਹੈ ਕਿ: ਸਰਵੇ ਪ੍ਰਕਿਰਿਆ ਨੂੰ ਪਾਰਦਰਸ਼ੀ ਬਣਾਇਆ ਜਾਵੇ ਅਤੇ ਵਾਰਡ ਪੱਧਰ ’ਤੇ ਲੋਕ ਭਲਾਈ ਕਮੇਟੀਆਂ ਨੂੰ ਵੀ ਇਸ ਵਿੱਚ ਸ਼ਾਮਿਲ ਕੀਤਾ ਜਾਵੇ ਤਾਂ ਜੋ ਜਮ੍ਹੀਨੀ ਸਚਾਈ ਸਰਵੇ ਟੀਮ ਤੱਕ ਪਹੁੰਚ ਸਕੇ।
ਅੰਤ ਵਿੱਚ, ਪਾਰਸ਼ਦ ਨੇ ਚੇਤਾਵਨੀ ਦਿੱਤੀ ਕਿ ਜੇ ਨਗਰ ਨਿਗਮ ਅਤੇ ਸਰਕਾਰ ਨੇ ਸਫ਼ਾਈ ਸਿਸਟਮ ਵਿੱਚ ਤੁਰੰਤ ਸੁਧਾਰ ਨਾ ਲਿਆ ਤਾਂ ਲੋਕਲ ਪੱਧਰ ’ਤੇ ਵਿਰੋਧ ਪ੍ਰਦਰਸ਼ਨ ਵੀ ਕੀਤਾ ਜਾ ਸਕਦਾ ਹੈ।
