ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਦੀ ਰਾਜਨੀਤੀ ਵਿਚ ਅੱਜ ਇੱਕ ਵੱਡੀ ਗੱਲਚਰਚਾ ਦਾ ਮਾਹੌਲ ਬਣ ਗਿਆ ਹੈ ਜਦੋਂ ਅਚਾਨਕ ਇਹ ਖ਼ਬਰ ਸਾਹਮਣੇ ਆਈ ਕਿ ਆਮ ਆਦਮੀ ਪਾਰਟੀ ਦੇ ਨੇਤਾ ਨਿਖਿਲ ਅਰੋੜਾ ਅਤੇ ਕਾਂਗਰਸੀ ਪਾਰਸ਼ਦ ਬੰਟੀ ਨੀਲਕੰਠ ਵਿਚਕਾਰ ਇੱਕ ਰਾਜੀਨਾਮਾ ਹੋ ਗਿਆ ਹੈ। ਦੋਵੇਂ ਲੀਡਰਾਂ ਵਿਚਕਾਰ ਹਾਲ ਹੀ ਵਿੱਚ ਇੱਕ ਧਾਰਮਿਕ ਥਾਂ ‘ਤੇ ਹੋਏ ਨਿੱਜੀ ਸਮਾਰੋਹ ਤੋਂ ਬਾਅਦ ਵਾਦ-ਵਿਵਾਦ ਹੋ ਗਿਆ ਸੀ ਜੋ ਕਿ ਹਿੰਸਕ ਟਕਰਾਅ ਵਿੱਚ ਬਦਲ ਗਿਆ।
ਇਸ ਘਟਨਾ ਤੋਂ ਬਾਅਦ ਨਿਖਿਲ ਅਰੋੜਾ ਦੇ ਬਿਆਨਾਂ ਦੀ ਆਧਾਰ ਤੇ ਬੰਟੀ ਨੀਲਕੰਠ ਉੱਤੇ ਐਫ.ਆਈ.ਆਰ. ਦਰਜ ਹੋਈ ਸੀ। ਹਾਲਾਂਕਿ, ਬੰਟੀ ਨੀਲਕੰਠ ਨੂੰ ਮਾਨਯੋਗ ਅਦਾਲਤ ਵੱਲੋਂ ਅੰਤਰੀਮ ਜਮਾਨਤ ਵੀ ਮਿਲ ਗਈ ਸੀ।
ਤਾਜ਼ਾ ਜਾਣਕਾਰੀ ਅਨੁਸਾਰ, ਸ਼ਹਿਰ ਦੇ ਇੱਕ ਮਸ਼ਹੂਰ ਉਦਯੋਗਪਤੀ ਅਤੇ ਰਾਜਨੀਤਿਕ ਸਰਗਰਮ ਵਿਅਕਤੀ ਨੇ ਦੋਹਾਂ ਵਿਚਕਾਰ ਇੱਕ ਪ੍ਰਤਿਸ਼ਠਿਤ ਕਲੱਬ ਵਿੱਚ ਮੁਲਾਕਾਤ ਕਰਵਾਈ ਅਤੇ ਰਾਜੀਨਾਮਾ ਕਰਵਾਇਆ।
ਪਰ ਇਹ ਮਾਮਲਾ ਹੁਣ ਹੋਰ ਵੀ ਉਲਝ ਗਿਆ ਹੈ, ਜਦੋਂ ਨਿਖਿਲ ਅਰੋੜਾ ਦੇ ਵੱਡੇ ਭਰਾ ਆਤਿਸ਼ ਅਰੋੜਾ ਨੇ ਪੂਰੀ ਤਰ੍ਹਾਂ ਰਾਜੀਨਾਮੇ ਦੀ ਗੱਲ ਨੂੰ ਨਕਾਰ ਦਿੱਤਾ। ਉਨ੍ਹਾਂ ਦੱਸਿਆ ਕਿ “ਸਾਡੀ ਵੱਲੋਂ ਕੋਈ ਰਾਜੀਨਾਮਾ ਨਹੀਂ ਹੋਇਆ। ਜੇਕਰ ਕੋਈ ਰਾਜੀਨਾਮਾ ਹੋਇਆ ਹੋਵੇਗਾ ਤਾਂ ਉਹ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ ਤਾਂ ਜੋ ਐਫ.ਆਈ.ਆਰ. ਰੱਦ ਹੋ ਸਕੇ।”
ਕੀ ਆਉਣ ਵਾਲੇ ਦਿਨਾਂ ‘ਚ ਹੋਵੇਗੀ ਸਚਾਈ ਦੀ ਪੁਸ਼ਟੀ?
ਇਸ ਪੂਰੇ ਮਾਮਲੇ ‘ਚ ਹੁਣ ਸਾਰੀਆਂ ਨਜ਼ਰਾਂ ਅਦਾਲਤ ਦੀ ਕਾਰਵਾਈ ‘ਤੇ ਟਿਕੀਆਂ ਹੋਈਆਂ ਹਨ। ਜੇਕਰ ਰਾਜੀਨਾਮਾ ਵਾਸਤਵ ਵਿੱਚ ਹੋਇਆ ਹੈ ਤਾਂ ਲਾਜ਼ਮੀ ਤੌਰ ‘ਤੇ ਉਸ ਦੀ ਕਾਪੀ ਅਦਾਲਤ ਵਿੱਚ ਪੇਸ਼ ਕੀਤੀ ਜਾਵੇਗੀ ਅਤੇ ਐਫ.ਆਈ.ਆਰ. ਨੂੰ ਕਵਾਸ਼ ਕਰਨ ਦੀ ਮੰਗ ਕੀਤੀ ਜਾਵੇਗੀ।
ਅਜੇ ਤੱਕ ਕਿਸੇ ਵੀ ਧਿਰ ਵੱਲੋਂ ਸਰਕਾਰੀ ਤਰੀਕੇ ਨਾਲ ਰਾਜੀਨਾਮੇ ਦੀ ਪੁਸ਼ਟੀ ਨਹੀਂ ਕੀਤੀ ਗਈ। ਇਹ ਵੇਖਣਾ ਦਿਲਚਸਪ ਹੋਵੇਗਾ ਕਿ ਇਹ ਮਾਮਲਾ ਅੱਗੇ ਕਿਹੜਾ ਰੁਖ ਲੈਂਦਾ ਹੈ।
