ਜਲੰਧਰ : ਜੇ ਐਸ ਸੰਧੂ ਤੇ ਕੰਵਲਜੀਤ ਸਿੰਘ ਮੱਕੜ – ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਵੱਲੋਂ Vuenow Infratech Limited ਅਤੇ ਇਸਦੇ ਡਾਇਰੈਕਟਰ ਰਾਹੁਲ ਆਨੰਦ ਭਾਰਗਵ ਖ਼ਿਲਾਫ਼ ਮਨੀ ਲਾਂਡਰਿੰਗ ਮਾਮਲੇ ਵਿੱਚ ਵੱਡੀ ਕਾਰਵਾਈ ਕੀਤੀ ਗਈ ਹੈ। ਜਾਣਕਾਰੀ ਅਨੁਸਾਰ, 14 ਅਗਸਤ ਨੂੰ ED ਦੀਆਂ ਟੀਮਾਂ ਨੇ ਪੰਜਾਬ, ਹਰਿਆਣਾ ਅਤੇ ਮਹਾਰਾਸ਼ਟਰ ਵਿੱਚ ਕੁੱਲ 10 ਰਿਹਾਇਸ਼ੀ ਤੇ ਵਪਾਰਕ ਥਾਵਾਂ ‘ਤੇ ਛਾਪੇ ਮਾਰੇ ਅਤੇ 73.72 ਕਰੋੜ ਰੁਪਏ ਦੀ ਸੰਪਤੀ ਫ੍ਰੀਜ਼ ਕਰ ਦਿੱਤੀ।
ਕਾਰਵਾਈ ਦੌਰਾਨ 23.90 ਲੱਖ ਰੁਪਏ ਨਕਦ, ਕਈ ਇਲੈਕਟ੍ਰੌਨਿਕ ਡਿਵਾਈਸ ਅਤੇ ਸੰਸਥਾਗਤ ਰਿਕਾਰਡ ਬਰਾਮਦ ਕੀਤੇ ਗਏ। ਇਸ ਤੋਂ ਇਲਾਵਾ 63.49 ਕਰੋੜ ਰੁਪਏ ਦੇ ਸ਼ੇਅਰ ਅਤੇ 9.99 ਕਰੋੜ ਰੁਪਏ ਦੀ ਅਚਲ ਸੰਪਤੀ ਨੂੰ ਵੀ ਜ਼ਬਤ ਕੀਤਾ ਗਿਆ। ਇਹ ਕਾਰਵਾਈ ਪ੍ਰੀਵੇਂਸ਼ਨ ਆਫ਼ ਮਨੀ ਲਾਂਡਰਿੰਗ ਐਕਟ (PMLA) 2002 ਦੇ ਤਹਿਤ ਕੀਤੀ ਗਈ।
ED ਦੀ ਜਾਂਚ ਵਿੱਚ ਖੁਲਾਸਾ ਹੋਇਆ ਕਿ Vuenow Marketing Services Limited ਅਤੇ ਇਸ ਨਾਲ ਸੰਬੰਧਿਤ ਹੋਰ ਕੰਪਨੀਆਂ ਨੇ ਨਿਵੇਸ਼ਕਾਂ ਤੋਂ ਵੱਡੇ ਰਿਟਰਨ ਦੇ ਲਾਲਚ ਅਤੇ “ਕਲਾਊਡ ਪਾਰਟਿਕਲਜ਼ ਵੇਚਣ ਅਤੇ ਲੀਜ਼ ‘ਤੇ ਵਾਪਸ ਦੇਣ” (SLB ਮਾਡਲ) ਦੇ ਨਾਂ ‘ਤੇ ਵੱਡੀ ਰਕਮ ਇਕੱਠੀ ਕੀਤੀ। ਹਾਲਾਂਕਿ ਕੰਪਨੀ ਕੋਲ ਇੰਫ੍ਰਾਸਟ੍ਰਕਚਰ ਦੇ ਨਾਂ ‘ਤੇ ਕੁਝ ਵੀ ਨਹੀਂ ਸੀ।
ਯਾਦ ਰਹੇ ਕਿ ਇਸੇ ਕੰਪਨੀ ‘ਤੇ ਜਨਵਰੀ ਮਹੀਨੇ ਵਿੱਚ ਵੀ ED ਵੱਲੋਂ 72 ਘੰਟੇ ਲੰਬੀ ਰੇਡ ਮਾਰੀ ਗਈ ਸੀ, ਜਿਸ ਦੌਰਾਨ ਪੰਜਾਬ, ਹਰਿਆਣਾ ਅਤੇ ਮੁੰਬਈ ਵਿੱਚ 11 ਥਾਵਾਂ ਤੋਂ ਕਈ ਲਗਜ਼ਰੀ ਕਾਰਾਂ ਅਤੇ 3 ਲੱਖ ਰੁਪਏ ਨਕਦ ਜ਼ਬਤ ਕੀਤੇ ਗਏ ਸਨ। ਉਸ ਸਮੇਂ ਵੀ Vuenow Marketing Services, Big Boy Toyz ਸਮੇਤ 6 ਕੰਪਨੀਆਂ ‘ਤੇ ਕਾਰਵਾਈ ਕੀਤੀ ਗਈ ਸੀ।
ED ਅਨੁਸਾਰ, ਇਹ ਪੂਰਾ ਧੋਖਾਧੜੀ ਮਾਮਲਾ ਹੈ ਜਿਸ ਵਿੱਚ ਨਿਵੇਸ਼ਕਾਂ ਨੂੰ ਧੋਖੇ ਨਾਲ ਕਰੋੜਾਂ ਰੁਪਏ ਤੋਂ ਵਾਂਝਾ ਕੀਤਾ ਗਿਆ। ਜਾਂਚ ਅਜੇ ਜਾਰੀ ਹੈ ਅਤੇ ਹੋਰ ਖੁਲਾਸਿਆਂ ਦੀ ਸੰਭਾਵਨਾ ਹੈ।
