ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਕਿਸ਼ਨਪੁਰਾ ਚੌਂਕ ਦੇ ਨੇੜੇ ਸਥਿਤ ਇੱਕ ਕੈਮਿਕਲ ਫੈਕਟਰੀ ਵਿੱਚ ਪੁਲਿਸ ਵੱਲੋਂ ਅੱਜ ਵੱਡੀ ਕਾਰਵਾਈ ਕੀਤੀ ਗਈ। ਜਾਣਕਾਰੀ ਮੁਤਾਬਕ, ਨਕਲੀ ਸਮਾਨ ਵੇਚਣ ਦੇ ਦੋਸ਼ਾਂ ‘ਤੇ ਅਦਾਲਤ ਦੇ ਹੁਕਮਾਂ ਅਧੀਨ ਇਹ ਰੇਡ ਮਾਰੀ ਗਈ। ਇਸ ਦੌਰਾਨ ਫੈਕਟਰੀ ਵਿੱਚੋਂ “ਡਾਕਾ” ਮਾਰਕਾ ਦੀਆਂ 100 ਬੋਰੀਆਂ ਬਰਾਮਦ ਹੋਈਆਂ ਹਨ, ਜਿਨ੍ਹਾਂ ਨੂੰ ਪੁਲਿਸ ਨੇ ਕਬਜ਼ੇ ਵਿੱਚ ਲੈ ਲਿਆ ਹੈ।
ਥਾਣਾ ਨੰਬਰ 3 ਦੇ ਇੰਚਾਰਜ ਨੇ ਦੱਸਿਆ ਕਿ 9 ਅਗਸਤ ਨੂੰ ਸੰਜੈ ਕਪੂਰ ਦੇ ਖ਼ਿਲਾਫ਼ ਸ਼ਿਕਾਇਤ ਦਰਜ ਹੋਈ ਸੀ। ਸ਼ਿਕਾਇਤਕਾਰ, ਜੋ ਖੁਦ ਜਾਲੰਧਰ ਦਾ ਹੀ ਇੱਕ ਡੀਲਰ ਹੈ, ਦਾ ਦੋਸ਼ ਸੀ ਕਿ ਉਸਦੀ ਕੰਪਨੀ ਦੇ ਬ੍ਰਾਂਡ “ਡਾਕਾ” ਦਾ ਗਲਤ ਵਰਤੋਂ ਕਰਕੇ ਨਕਲੀ ਕੈਮਿਕਲ ਸਸਤੇ ਰੇਟਾਂ ‘ਤੇ ਵੇਚਿਆ ਜਾ ਰਿਹਾ ਸੀ। ਇਸ ਕਾਰਨ ਉਸਨੂੰ ਵੱਡਾ ਨੁਕਸਾਨ ਝੱਲਣਾ ਪੈ ਰਿਹਾ ਸੀ। ਸ਼ਿਕਾਇਤ ਤੋਂ ਬਾਅਦ ਅਦਾਲਤ ਤੋਂ ਤਲਾਸ਼ੀ ਵਾਰੰਟ ਜਾਰੀ ਕੀਤਾ ਗਿਆ ਅਤੇ ਅੱਜ ਪੁਲਿਸ ਵੱਲੋਂ ਫੈਕਟਰੀ ਵਿੱਚੋਂ ਨਕਲੀ ਸਮਾਨ ਬਰਾਮਦ ਕੀਤਾ ਗਿਆ।
ਸ਼ਿਕਾਇਤਕਾਰ ਅਨੁਸਾਰ, ਇਹ ਕੈਮਿਕਲ ਪਿਘਲੇ ਹੋਏ ਲੋਹੇ ਦੇ ਵਰਤੋਂ ਵਿੱਚ ਆਉਂਦਾ ਹੈ। ਹੁਣ ਪੁਲਿਸ ਇਹ ਪਤਾ ਲਗਾ ਰਹੀ ਹੈ ਕਿ ਫੈਕਟਰੀ ਮਾਲਕ ਵੱਲੋਂ ਡਾਕਾ ਕੰਪਨੀ ਦੇ ਨਕਲੀ ਬ੍ਰਾਂਡ ਨਾਲ ਕਿੰਨੇ ਸਮੇਂ ਤੋਂ ਮਾਲ ਤਿਆਰ ਤੇ ਵੇਚਿਆ ਜਾ ਰਿਹਾ ਸੀ।
ਦੂਜੇ ਪਾਸੇ, ਘਟਨਾ ਸਥਲ ‘ਤੇ ਪਹੁੰਚੀ ਸੰਜੈ ਕਪੂਰ ਦੀ ਇਕ ਰਿਸ਼ਤੇਦਾਰ ਨੇ ਕਿਹਾ ਕਿ ਉਸਨੂੰ ਕੈਨੇਡਾ ਤੋਂ ਫ਼ੋਨ ਰਾਹੀਂ ਫੈਕਟਰੀ ‘ਚ ਰਿਕਵਰੀ ਹੋਣ ਦੀ ਖ਼ਬਰ ਮਿਲੀ ਸੀ, ਜਿਸ ਕਾਰਨ ਉਹ ਤੁਰੰਤ ਪਹੁੰਚ ਗਈ। ਉਸਦਾ ਕਹਿਣਾ ਸੀ ਕਿ ਸ਼ਿਕਾਇਤਕਾਰ ਵੀ ਉਸਦਾ ਹੀ ਭਤੀਜਾ ਲੱਗਦਾ ਹੈ ਅਤੇ ਦੋਵੇਂ ਪਰਿਵਾਰਾਂ ਦੇ ਰਿਸ਼ਤੇ ਪਹਿਲਾਂ ਬਹੁਤ ਨੇੜਲੇ ਸਨ। ਪਰ ਕਿਸੇ ਗਲਤਫ਼ਹਮੀ ਕਾਰਨ ਦਿਲਾਂ ‘ਚ ਮਨਮੁਟਾਅ ਹੋ ਗਿਆ, ਜਿਸ ਕਰਕੇ ਇਹ ਮਾਮਲਾ ਖੜਾ ਹੋਇਆ। ਉਸਨੇ ਆਸ ਜਤਾਈ ਕਿ ਜਲਦ ਹੀ ਦੋਵੇਂ ਪੱਖਾਂ ਨੂੰ ਬੈਠਾਕ ਕਰਵਾ ਕੇ ਗੱਲਬਾਤ ਰਾਹੀਂ ਮਾਮਲਾ ਨਿਪਟਾ ਦਿੱਤਾ ਜਾਵੇਗਾ।
