ਰੂਸ-ਯੂਕਰੇਨ ਜੰਗ ਵਿੱਚ ਫੰਸੇ ਭਾਰਤੀ, ਏਜੰਟ ਧੋਖੇ ਨਾਲ ਕਰਵਾ ਰਹੇ ਰੂਸੀ ਆਰਮੀ ‘ਚ ਭਰਤੀ

ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਰੂਸ ਅਤੇ ਯੂਕਰੇਨ ਵਿੱਚ ਜੰਗ ਨੂੰ ਤਿੰਨ ਸਾਲ ਤੋਂ ਵੱਧ ਸਮਾਂ ਬੀਤ ਚੁੱਕਾ ਹੈ। ਕਈ ਦੇਸ਼ਾਂ ਦੀਆਂ ਕੋਸ਼ਿਸ਼ਾਂ ਦੇ ਬਾਵਜੂਦ ਇਹ ਜੰਗ ਅਜੇ ਵੀ ਜਾਰੀ ਹੈ। ਇਸ ਜੰਗ ਦੀ ਮਾਰ ਸਿਰਫ਼ ਉਥੇ ਦੇ ਲੋਕਾਂ ਤੱਕ ਹੀ ਸੀਮਤ ਨਹੀਂ ਰਹੀ, ਸਗੋਂ ਪੰਜਾਬ ਸਮੇਤ ਭਾਰਤ ਦੇ ਕਈ ਨੌਜਵਾਨ ਵੀ ਇਸ ਵਿੱਚ ਫਸਦੇ ਜਾ ਰਹੇ ਹਨ। ਜਲੰਧਰ ਦੇ ਇਕ ਨੌਜਵਾਨ ਨੇ ਖੁਲਾਸਾ ਕੀਤਾ ਹੈ ਕਿ ਇਥੋਂ ਦੇ ਕੁਝ ਏਜੰਟ ਪੈਸਿਆਂ ਦੇ ਲਾਲਚ ਵਿੱਚ ਭਾਰਤੀ ਨੌਜਵਾਨਾਂ ਨੂੰ ਠੱਗ ਕੇ ਰੂਸ ਭੇਜ ਰਹੇ ਹਨ ਤੇ ਉਨ੍ਹਾਂ ਦੀ ਜ਼ਬਰਦਸਤੀ ਰੂਸੀ ਆਰਮੀ ਵਿੱਚ ਭਰਤੀ ਕਰਵਾਈ ਜਾ ਰਹੀ ਹੈ।

ਜਲੰਧਰ ਦੇ ਨਿਵਾਸੀ ਰੋਹਿਤ ਕੁਮਾਰ ਨੇ ਦੱਸਿਆ ਕਿ ਉਹ 1 ਜੁਲਾਈ 2025 ਨੂੰ ਇਥੋਂ ਦੇ ਇਕ ਏਜੰਟ ਰਾਹੀਂ ਅਮ੍ਰਿਤਸਰ ਤੋਂ ਦੁਬਈ ਗਿਆ। ਤਿੰਨ ਦਿਨ ਦੁਬਈ ਵਿੱਚ ਰੁਕਣ ਤੋਂ ਬਾਅਦ ਉਸ ਨੂੰ ਮਾਸਕੋ ਭੇਜ ਦਿੱਤਾ ਗਿਆ। ਰੋਹਿਤ ਦੇ ਨਾਲ ਇਕ ਔਰਤ ਤੇ ਹੋਰ ਦੋ ਲੋਕ ਵੀ ਸਨ। ਰੋਹਿਤ ਨੇ ਦੱਸਿਆ ਕਿ ਏਜੰਟ ਨੇ ਪਹਿਲਾਂ ਹੀ ਉਸ ਤੋਂ ਲਗਭਗ 4 ਤੋਂ 5 ਲੱਖ ਰੁਪਏ ਵਸੂਲ ਕੀਤੇ, ਜਿਸ ਵਿੱਚੋਂ ਢਾਈ ਲੱਖ ਨਕਦ ਤੇ ਬਾਕੀ ਗੂਗਲ ਪੇ ਰਾਹੀਂ ਲਏ ਗਏ।

ਰੋਹਿਤ ਨੇ ਕਿਹਾ ਕਿ ਦੁਬਈ ਤੋਂ ਰੂਸ ਤੱਕ ਪਹੁੰਚਣ ਦੇ ਬਾਅਦ ਉਨ੍ਹਾਂ ਨੂੰ ਪਤਾ ਲੱਗਿਆ ਕਿ ਇਹ ਸਾਰੀ ਯੋਜਨਾ ਰੂਸੀ ਆਰਮੀ ਵਿੱਚ ਜ਼ਬਰਦਸਤੀ ਭਰਤੀ ਲਈ ਰਚੀ ਗਈ ਸੀ। ਮਾਸਕੋ ਪਹੁੰਚਣ ਉਪਰੰਤ ਏਜੰਟ ਨੇ ਉਨ੍ਹਾਂ ਦੀ ਕੋਈ ਮਦਦ ਨਹੀਂ ਕੀਤੀ ਤੇ ਉਨ੍ਹਾਂ ਨੂੰ ਖ਼ੁਦ ਹੀ 7500 ਰੂਬਲ ਦੇ ਕੇ ਹੋਟਲ ਲੈਣਾ ਪਿਆ। ਇਸ ਦੌਰਾਨ ਉਨ੍ਹਾਂ ਦੀ ਮੁਲਾਕਾਤ ਕੁਝ ਪੰਜਾਬੀਆਂ ਨਾਲ ਹੋਈ ਜਿਨ੍ਹਾਂ ਨੇ ਚੇਤਾਵਨੀ ਦਿੱਤੀ ਕਿ ਇੱਥੇ ਹਾਲਾਤ ਬਹੁਤ ਖ਼ਤਰਨਾਕ ਹਨ ਅਤੇ ਰੂਸੀ ਆਰਮੀ ਵਿੱਚ ਜਾਣ ਦਾ ਅਰਥ ਹੈ ਜੰਗੀ ਮੋਰਚੇ ‘ਤੇ ਭੇਜਿਆ ਜਾਣਾ।

ਰੋਹਿਤ ਦੇ ਅਨੁਸਾਰ, ਉਨ੍ਹਾਂ ਨੂੰ ਇਕ ਕਾਨਟ੍ਰੈਕਟ ‘ਤੇ ਸਾਈਨ ਕਰਨ ਲਈ ਮਜਬੂਰ ਕੀਤਾ ਜਾ ਰਿਹਾ ਸੀ। ਪਰ ਜਦੋਂ ਉਨ੍ਹਾਂ ਨੇ ਸਾਰੀ ਸਥਿਤੀ ਨੂੰ ਸਮਝਿਆ ਤਾਂ ਉਹ ਵਾਪਸ ਆਉਣ ਦੇ ਫ਼ੈਸਲੇ ‘ਤੇ ਅਡਿਗ ਰਹੇ ਅਤੇ ਕਿਸੇ ਤਰ੍ਹਾਂ ਮੁੜ ਭਾਰਤ ਪਰਤ ਆਏ। ਰੋਹਿਤ ਨੇ ਸਾਫ਼ ਕੀਤਾ ਕਿ ਉਸ ਨੇ ਰੂਸੀ ਆਰਮੀ ਜੁਆਇਨ ਨਹੀਂ ਕੀਤੀ, ਪਰ ਉਸ ਨੇ ਆਪਣੀਆਂ ਅੱਖਾਂ ਨਾਲ ਕਈ ਭਾਰਤੀਆਂ ਨੂੰ ਉੱਥੇ ਆਰਮੀ ਵਿੱਚ ਕੰਮ ਕਰਦੇ ਵੇਖਿਆ ਹੈ।

ਰੋਹਿਤ ਨੇ ਵੀਡੀਓ ਜਾਰੀ ਕਰਕੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਕੋਈ ਵੀ ਰੂਸ ਜਾਣ ਦੀ ਗ਼ਲਤੀ ਨਾ ਕਰੇ ਕਿਉਂਕਿ ਉੱਥੇ ਹਾਲਾਤ ਬੇਹੱਦ ਨਾਜ਼ੁਕ ਹਨ। ਉਸ ਨੇ ਇਹ ਵੀ ਕਿਹਾ ਕਿ ਜੋ ਭਾਰਤੀ ਨੌਜਵਾਨ ਉੱਥੇ ਫਸੇ ਹੋਏ ਹਨ, ਭਾਰਤ ਸਰਕਾਰ ਨੂੰ ਚਾਹੀਦਾ ਹੈ ਕਿ ਉਨ੍ਹਾਂ ਨੂੰ ਸੁਰੱਖਿਅਤ ਤਰੀਕੇ ਨਾਲ ਵਾਪਸ ਲਿਆਂਦਾ ਜਾਵੇ।