ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਭਾਰਗਵ ਕੈਂਪ ਇਲਾਕੇ ਵਿੱਚ ਉਸ ਸਮੇਂ ਹੜਕੰਪ ਮਚ ਗਿਆ ਜਦੋਂ ਘਰ ਦੇ ਬਾਹਰ ਖੜ੍ਹੀ ਬਾਈਕ ਲੈ ਕੇ ਦੋ ਲੁਟੇਰੇ ਫਰਾਰ ਹੋ ਗਏ। ਪਰੰਤੂ ਸਾਗਰ ਨਾਮਕ ਬਹਾਦੁਰ ਨੌਜਵਾਨ ਨੇ ਹਿੰਮਤ ਦਿਖਾਉਂਦਿਆਂ ਨਾ ਸਿਰਫ਼ ਲੁਟੇਰਿਆਂ ਨਾਲ ਮੁਕਾਬਲਾ ਕੀਤਾ, ਸਗੋਂ ਉਹਨਾਂ ਦੀ ਬਾਈਕ ਅਤੇ ਹਥਿਆਰ ਵੀ ਪੁਲਿਸ ਦੇ ਹਵਾਲੇ ਕਰ ਦਿੱਤੇ।
ਮਿਲੀ ਜਾਣਕਾਰੀ ਅਨੁਸਾਰ, ਸਾਗਰ ਆਪਣੇ ਭਰਾ ਨਾਲ ਫ਼ੋਨ ’ਤੇ ਗੱਲ ਕਰ ਰਿਹਾ ਸੀ ਜਦੋਂ ਉਸ ਨੇ ਕੈਮਰੇ ਰਾਹੀਂ ਵੇਖਿਆ ਕਿ ਲੁਟੇਰੇ ਉਸਦੀ ਬਾਈਕ ਲੈ ਕੇ ਭੱਜ ਰਹੇ ਹਨ। ਉਸ ਨੇ ਤੁਰੰਤ ਛੱਤ ਤੋਂ ਉਤਰ ਕੇ ਲੁਟੇਰਿਆਂ ਦਾ ਪਿੱਛਾ ਕੀਤਾ ਅਤੇ ਇੱਕ ਲੁਟੇਰੇ ਨੂੰ ਕਾਬੂ ਕਰਨ ਵਿੱਚ ਵੀ ਸਫਲ ਹੋ ਗਿਆ। ਇਸ ਦੌਰਾਨ ਜਦੋਂ ਉਹ ਲੁਟੇਰੇ ਦੀ ਬਾਈਕ ਨੂੰ ਸਾਈਡ ਕਰਨ ਲੱਗਾ ਤਾਂ ਮੌਕਾ ਦੇਖ ਕੇ ਲੁਟੇਰਾ ਫਰਾਰ ਹੋ ਗਿਆ।
ਬਹਾਦਰੀ ਨਾਲ ਕਾਰਵਾਈ ਕਰਦਿਆਂ ਸਾਗਰ ਨੇ ਲੁਟੇਰਿਆਂ ਦੀ ਬਾਈਕ ਤੇ ਹਥਿਆਰ ਪੁਲਿਸ ਦੇ ਹਵਾਲੇ ਕੀਤੇ। ਪੁਲਿਸ ਵੱਲੋਂ ਜਾਂਚ ਦੌਰਾਨ ਪਤਾ ਲੱਗਾ ਕਿ ਲੁਟੇਰਿਆਂ ਦੀ ਬਾਈਕ ਵੀ ਚੋਰੀ ਦੀ ਸੀ ਅਤੇ ਉਸ ’ਤੇ ਦੋ ਨੰਬਰ ਪਲੇਟ ਲੱਗੀਆਂ ਹੋਈਆਂ ਸਨ।
ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਤੇ ਲੁਟੇਰਿਆਂ ਦੀ ਤਲਾਸ਼ ਜਾਰੀ ਹੈ। ਸਾਗਰ ਦੀ ਬਹਾਦਰੀ ਦੀ ਚਰਚਾ ਇਲਾਕੇ ਵਿੱਚ ਹਰ ਪਾਸੇ ਹੋ ਰਹੀ ਹੈ।
