ਜਲੰਧਰ ਨੂਰਮਹਲ ‘ਚ ਗੁਰੂਘਰ ਵਿੱਚ ਬੇਅਦਬੀ ਦਾ ਮਾਮਲਾ, ਦੋ ਸੇਵਾਦਾਰ ਗ੍ਰਿਫ਼ਤਾਰ

ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਦੇ ਨੂਰਮਹਲ ਖੇਤਰ ਦੇ ਪਿੰਡ ਉੱਪਲ ਖਾਲਸਾ ਅਤੇ ਉੱਪਲ ਜਾਗੀਰ ਦੀਆਂ ਸੰਗਤਾਂ ਵਿੱਚ ਗਹਿਰਾ ਰੋਸ਼ ਫੈਲ ਗਿਆ ਹੈ। ਗੁਰੂਘਰ ਨਾਨਕਸਰ ਠਾਠ ਵਿੱਚ ਗ੍ਰੰਥੀ ਅਤੇ ਸੇਵਾਦਾਰ ‘ਤੇ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਪਵਿੱਤਰ ਸਰੂਪਾਂ ਨੂੰ ਗਾਇਬ ਕਰਨ ਦੇ ਗੰਭੀਰ ਇਲਜ਼ਾਮ ਲੱਗੇ ਹਨ। ਇਸ ਮਾਮਲੇ ਨੂੰ ਲੈ ਕੇ ਪਿੰਡ ਵਾਸੀਆਂ ਵੱਲੋਂ ਥਾਣਾ ਨੂਰਮਹਲ ਵਿੱਚ ਲਿਖਤੀ ਸ਼ਿਕਾਇਤ ਕਰਕੇ ਕਾਰਵਾਈ ਦੀ ਮੰਗ ਕੀਤੀ ਗਈ।

ਸ਼ਿਕਾਇਤ ਅਨੁਸਾਰ, ਗ੍ਰੰਥੀ ਮਨਜੀਤ ਸਿੰਘ ਪੁੱਤਰ ਜਗਤ ਸਿੰਘ ਨਿਵਾਸੀ ਪਿੰਡ ਮੀਰਾਪੁਰ (ਜਲੰਧਰ) ਅਤੇ ਸੇਵਾਦਾਰ ਗੁਰਚਰਨ ਸਿੰਘ ਪੁੱਤਰ ਆਸਰਾ ਸਿੰਘ ਨਿਵਾਸੀ ਪਿੰਡ ਬਰੂੰਦੀ ਠਾਠ (ਲੁਧਿਆਣਾ) ਨੂੰ ਆਨੰਦ ਈਸ਼ਵਰ ਠਾਠ ਗੁਰਦੁਆਰਾ ਸਾਹਿਬ (ਉੱਪਲ ਜਾਗੀਰ, ਉੱਪਲ ਖਾਲਸਾ, ਨਕੋਦਰ ਰੋਡ) ‘ਤੇ ਸੇਵਾ ਲਈ ਨਿਯੁਕਤ ਕੀਤਾ ਗਿਆ ਸੀ।

ਸੰਗਤਾਂ ਦਾ ਇਲਜ਼ਾਮ , ਸੰਗਤਾਂ ਨੇ ਦੋਸ਼ ਲਗਾਇਆ ਕਿ ਇਨ੍ਹਾਂ ਸੇਵਾਦਾਰਾਂ ਨੇ ਮਿਲ ਕੇ ਪਿਛਲੇ ਕੁਝ ਦਿਨਾਂ ਦੌਰਾਨ ਗੁਰਦੁਆਰੇ ਵਿੱਚ ਰੱਖੇ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਪਵਿੱਤਰ ਸਰੂਪਾਂ ਦੀ ਚੋਰੀ ਕਰ ਲਈ। ਮਨਜੀ ਸਾਹਿਬ ਉੱਤੇ ਰੁਮਾਲਾ ਰੱਖ ਕੇ ਧੱਕੇ ਨਾਲ ਕੁਝ ਦਿਨਾਂ ਤਕ ਸੰਗਤਾਂ ਨੂੰ ਭਰਮਾਇਆ ਗਿਆ। ਜਦੋਂ ਸੰਗਤਾਂ ਨੇ ਵੇਖਿਆ ਤਾਂ ਪਵਿੱਤਰ ਸਰੂਪ ਗਾਇਬ ਸਨ। ਇਸ ਨਾਲ ਪੂਰੀ ਸੰਗਤ ਨੂੰ ਭਾਰੀ ਝਟਕਾ ਪਹੁੰਚਿਆ।
ਸ਼ਿਕਾਇਤ ਵਿੱਚ ਦਰਸਾਇਆ ਗਿਆ ਹੈ ਕਿ ਦੋਵੇਂ ਸੇਵਾਦਾਰ ਸਵੇਰ ਦੇ ਹਨੇਰੇ ਵਿੱਚ ਸਰੂਪ ਚੋਰੀ ਕਰਕੇ ਲੈ ਗਏ ਅਤੇ ਹੁਣ ਗੁਰਦੁਆਰੇ ਦਾ ਸਮਾਨ ਵੀ ਲਿਜਾਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਇਸ ਦੌਰਾਨ ਸੰਗਤ ਨਾਲ ਟਕਰਾਅ ਵਾਲੀ ਸਥਿਤੀ ਵੀ ਬਣੀ।
ਪੁਲਿਸ ਕਾਰਵਾਈ , ਜਿਵੇਂ ਹੀ ਜਾਣਕਾਰੀ ਮਿਲੀ, ਡੀਐਸਪੀ ਸੁਖਪਾਲ ਸਿੰਘ, ਥਾਣਾ ਮੁਖੀ ਪਰਮਜੀਤ ਸਿੰਘ, ਥਾਣਾ ਮੁਖੀ ਸਦਰ ਸੁਖਦੇਵ ਸਿੰਘ ਨਕੋਦਰ ਅਤੇ ਪੁਲਿਸ ਚੌਕੀ ਇੰਚਾਰਜ ਜਗਤਾਰ ਸਿੰਘ ਮੌਕੇ ‘ਤੇ ਪਹੁੰਚੇ। ਪੁਲਿਸ ਨੇ ਦੋਵੇਂ ਇਲਜ਼ਾਮੀਆਂ ਨੂੰ ਟਾਟਾ 709 ਗੱਡੀ (ਨੰਬਰ PB10HX-3897) ਸਮੇਤ ਗੁਰਦੁਆਰੇ ਦਾ ਸਮਾਨ ਲਾਦਦੇ ਹੋਏ ਕਾਬੂ ਕਰ ਲਿਆ।
ਪੁਲਿਸ ਵੱਲੋਂ ਦੋਵੇਂ ਗ੍ਰਿਫ਼ਤਾਰ ਕਰਕੇ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਅਤੇ ਚੋਰੀ ਦਾ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਅੱਗੇ ਦੀ ਜਾਂਚ ਜਾਰੀ ਹੈ।
ਸੰਗਤਾਂ ਦੀ ਮੰਗ , ਪਿੰਡ ਉੱਪਲ ਖਾਲਸਾ ਅਤੇ ਉੱਪਲ ਜਾਗੀਰ ਦੀਆਂ ਸੰਗਤਾਂ ਨੇ ਮੰਗ ਕੀਤੀ ਹੈ ਕਿ ਗੁਰਦੁਆਰੇ ਤੋਂ ਗਾਇਬ ਕੀਤੇ ਗਏ ਪਵਿੱਤਰ ਸਰੂਪ ਜਲਦੀ ਤੋਂ ਜਲਦੀ ਬਰਾਮਦ ਕਰਕੇ ਮਰਿਆਦਾ ਅਨੁਸਾਰ ਗੁਰਦੁਆਰੇ ਵਿੱਚ ਸਨਮਾਨਿਤ ਰੂਪ ਵਿੱਚ ਵਿਖੇ ਬਿਰਾਜਮਾਨ ਕੀਤੇ ਜਾਣ।