ਜਲੰਧਰ ਕੰਵਲਜੀਤ ਸਿੰਘ ਮੱਕੜ – ਏਸ਼ੀਆ ਕੱਪ ਵਿੱਚ ਅੱਜ ਹੋ ਰਹੇ ਭਾਰਤ-ਪਾਕਿਸਤਾਨ ਦੇ ਕ੍ਰਿਕਟ ਮੈਚ ਨੂੰ ਲੈ ਕੇ ਪੰਜਾਬ ਦੇ ਸਾਬਕਾ ਖੇਡ ਮੰਤਰੀ ਤੇ ਮੌਜੂਦਾ ਵਿਧਾਇਕ ਪਰਗਟ ਸਿੰਘ ਨੇ ਵੱਡਾ ਬਿਆਨ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਪਹਲਗਾਮ ਅਟੈਕ ਦੇ ਜ਼ਖ਼ਮ ਹਜੇ ਭਰੇ ਨਹੀਂ ਹਨ, ਪਰ ਭਾਜਪਾ ਨੇ ਲੋਕਾਂ ਨੂੰ ਭਾਵਨਾਤਮਕ ਤੌਰ ‘ਤੇ ਇਕ ਪਾਸੇ ਗੁੱਸੇ ਨਾਲ ਭਰਿਆ, ਤੇ ਹੁਣ ਖੁਦ ਹੀ ਇਸ ਮੈਚ ਨੂੰ ਕਰਵਾਉਣ ਵਿੱਚ ਲੱਗੀ ਹੋਈ ਹੈ।
ਪਰਗਟ ਸਿੰਘ ਨੇ ਯਾਦ ਦਵਾਇਆ ਕਿ ਹਾਲ ਹੀ ‘ਚ ਖ਼ਤਮ ਹੋਏ ਹਾਕੀ ਏਸ਼ੀਆ ਕਪ ਵਿੱਚ ਪਾਕਿਸਤਾਨ ਨੇ ਆਪਣੀ ਟੀਮ ਨੂੰ ਭਾਰਤ ਨਹੀਂ ਭੇਜਿਆ ਸੀ। ਉਨ੍ਹਾਂ ਨੇ ਕੇਂਦਰੀ ਗ੍ਰਹਿ ਮੰਤਰੀ ‘ਤੇ ਵੀ ਤੰਜ਼ ਕੱਸਿਆ ਕਿ ਜਦੋਂ ਵੀ ਗ੍ਰਹਿ ਮੰਤਰੀ ਦਾ ਰੁਝਾਨ ਕਿਸੇ ਮਾਮਲੇ ਵਿੱਚ ਹੁੰਦਾ ਹੈ ਤਾਂ ਭਾਜਪਾ ਦੇ ਸਾਰੇ ਕਾਨੂੰਨ ਇਕ ਪਾਸੇ ਤੇ ਉਨ੍ਹਾਂ ਦੀ ਪਾਲਸੀ ਇਕ ਪਾਸੇ ਹੋ ਜਾਂਦੀ ਹੈ। ਉਸੇ ਪਾਲਸੀ ਦੇ ਤਹਿਤ ਅੱਜ ਇਹ ਮੈਚ ਕਰਵਾਇਆ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਖੇਡ ਤੇ ਸਭਿਆਚਾਰ ਲੋਕਾਂ ਨੂੰ ਜੋੜਦੇ ਹਨ, ਪਰ ਹਰ ਗੱਲ ਲਈ ਸਮਾਂ ਤੇ ਹਾਲਾਤ ਸਹੀ ਹੋਣੇ ਚਾਹੀਦੇ ਹਨ। ਭਾਜਪਾ ‘ਤੇ ਚੋਟ ਕਰਦਿਆਂ ਪਰਗਟ ਸਿੰਘ ਨੇ ਕਿਹਾ ਕਿ ਇਕ ਪਾਸੇ ਉਹ ਆਪਣੇ ਆਪ ਨੂੰ ਸਭ ਤੋਂ ਵੱਡੇ ਦੇਸ਼ ਭਗਤ ਵਜੋਂ ਪੇਸ਼ ਕਰਦੇ ਹਨ, ਪਰ ਦੂਜੇ ਪਾਸੇ ਜਦੋਂ ਪੈਸੇ ਦੀ ਗੱਲ ਆਉਂਦੀ ਹੈ ਤਾਂ ਉਨ੍ਹਾਂ ਦੀ ਪਾਲਸੀ ਤੁਰੰਤ ਬਦਲ ਜਾਂਦੀ ਹੈ। ਖੇਡ ਮੰਤਰੀ ਰਹਿੰਦੇ ਹੋਏ ਵੀ ਉਨ੍ਹਾਂ ਨੇ ਇਹ ਗੱਲ ਸਪੱਸ਼ਟ ਕੀਤੀ ਸੀ ਕਿ ਇਹ ਦੋਵੇਂ ਚੀਜ਼ਾਂ ਇਕੱਠੇ ਨਹੀਂ ਚੱਲ ਸਕਦੀਆਂ।
ਬਿੱਟੂ ਤੇ ਚੰਨੀ ਨੂੰ ਲੈ ਕੇ ਵੀ ਬਿਆਨ , ਰਾਹੁਲ ਗਾਂਧੀ ਦੇ ਪੰਜਾਬ ਦੌਰੇ ਅਤੇ ਕੇਂਦਰੀ ਮੰਤਰੀ ਰਵਨੀਤ ਬਿੱਟੂ ਦੇ ਬਿਆਨਾਂ ‘ਤੇ ਪਰਗਟ ਸਿੰਘ ਨੇ ਤਿੱਖੀ ਟਿੱਪਣੀ ਕੀਤੀ। ਉਨ੍ਹਾਂ ਕਿਹਾ ਕਿ ਸਭ ਨੂੰ ਪਤਾ ਹੈ ਕਿ ਬਿੱਟੂ ਕਿਸ ਕਿਸਮ ਦਾ “ਘੋੜਾ” ਹੈ। ਉਨ੍ਹਾਂ ਦੇ ਬਿਆਨ ਸੁਣ ਕੇ ਅਕਸਰ ਲੋਕ ਹੀ ਨਹੀਂ, ਉਹ ਖੁਦ ਵੀ ਕਨਫਿਊਜ਼ ਹੋ ਜਾਂਦੇ ਹਨ। ਚੰਨੀ ‘ਤੇ ਬਿੱਟੂ ਦੇ ਤੰਜ਼ ਦੇ ਮਾਮਲੇ ‘ਤੇ ਉਨ੍ਹਾਂ ਨੇ ਸਾਫ਼ ਕੀਤਾ ਕਿ ਐਸਾ ਕੁਝ ਨਹੀਂ ਹੋਇਆ।
“ਭਾਜਪਾ ਦੇ ਦੋ ਚਿਹਰੇ” ਪਰਗਟ ਸਿੰਘ ਨੇ ਦਾਅਵਾ ਕੀਤਾ ਕਿ ਦੇਸ਼ ਨੂੰ ਹੁਣ ਸਮਝ ਆ ਗਿਆ ਹੈ ਕਿ ਭਾਜਪਾ ਕੀ ਕਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਭਾਜਪਾ ਦੇ ਦੋ ਚਿਹਰੇ ਹਨ—ਇਕ ਜਿਸ ਵਿੱਚ ਉਹ ਲੋਕਾਂ ਨੂੰ ਆਪਣੀ ਫੇਸ ਵੈਲਿਊ ਦਿਖਾਉਂਦੇ ਹਨ ਅਤੇ ਦੂਜਾ ਜਿਸ ਵਿੱਚ ਉਹ ਪੰਜਾਬ ਵਿਰੋਧੀ ਕੰਮ ਕਰਦੇ ਹਨ। ਲੋਕ ਹੁਣ ਖੁੱਲ੍ਹ ਕੇ ਭਾਜਪਾ ਦਾ ਵਿਰੋਧ ਕਰ ਰਹੇ ਹਨ।
ਸ਼ੁਭਕਰਨ ਦੀ ਮੌਤ ਅਤੇ ਰਾਹਤ ਰਕਮ, ਸ਼ੁਭਕਰਨ ਦੀ ਮੌਤ ਦੇ ਮਾਮਲੇ ਵਿੱਚ ਵੀ ਪਰਗਟ ਸਿੰਘ ਨੇ ਭਾਜਪਾ ‘ਤੇ ਸਵਾਲ ਉਠਾਏ। ਉਨ੍ਹਾਂ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਪੰਜਾਬ ਲਈ ਐਲਾਨੀ 1600 ਕਰੋੜ ਰੁਪਏ ਦੀ ਰਾਹਤ ਰਕਮ ‘ਤੇ ਕਿਹਾ ਕਿ ਇਹ ਰਕਮ ਪੰਜਾਬ ਦੇ ਨੁਕਸਾਨ ਦੀ ਭਰਪਾਈ ਲਈ ਕਾਫ਼ੀ ਨਹੀਂ ਹੈ। ਉਨ੍ਹਾਂ ਨੇ ਕੇਂਦਰ ਤੇ ਪੰਜਾਬ ਸਰਕਾਰ ਦੋਵਾਂ ਨੂੰ ਅਪੀਲ ਕੀਤੀ ਕਿ ਆਪਸੀ ਸਹਿਯੋਗ ਨਾਲ ਪੰਜਾਬ ਦੀ ਮਦਦ ਕਰਨ।
