15 ਅਕਤੂਬਰ ਨੂੰ ਪੰਜਾਬ ਬੰਦ! ਪਰਵਿੰਦਰ ਸਿੰਘ ਝੋਟੇ ਦੇ ਕਤਲ ਮਗਰੋਂ ਪਰਿਵਾਰ ਨੇ ਕਰ”ਤਾ ਐਲਾਨ
ਜਲੰਧਰ : (ਕੰਵਲਜੀਤ ਸਿੰਘ ਮੱਕੜ): – ਜਲੰਧਰ ਦੇਹਾਤ ਦੀ ਪੁਲਿਸ ਨੇ ਹਵਾਲਾ ਰੈਕਟ ਦਾ ਪਰਦਾਫਾਸ਼ ਕਰਦੇ ਹੋਏ 56.61 ਲੱਖ ਰੁਪਏ ਨਕਦ ਬਰਾਮਦ ਕਰਕੇ ਤਿੰਨ ਨੌਜਵਾਨਾਂ ਨੂੰ ਗ੍ਰਿਫਤਾਰ ਕਰਨ ਵਿੱਚ ਵੱਡੀ ਕਾਮਯਾਬੀ ਹਾਸਲ ਕੀਤੀ ਹੈ। ਇਹ ਕਾਰਵਾਈ ਥਾਣਾ ਗੋਰਾਇਆ ਦੀ ਪੁਲਿਸ ਵੱਲੋਂ 12/13 ਸਤੰਬਰ ਦੀ ਅੱਧੀ ਰਾਤ ਕੀਤੀ ਗਈ।
ਥਾਣਾ ਗੋਰਾਇਆ ਦੇ ਐਸ.ਐਚ.ਓ. ਸਿਕੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਗੁਪਤ ਸੂਚਨਾ ਮਿਲੀ ਸੀ ਕਿ ਵਿਦੇਸ਼ ਤੋਂ ਹਵਾਲੇ ਰਾਹੀਂ ਪੈਸੇ ਆ ਰਹੇ ਹਨ। ਇਸ ਸੂਚਨਾ ਦੇ ਆਧਾਰ ‘ਤੇ ਚੌਕੀ ਰੁੜਕਾ ਕਲਾਂ ਦੇ ਇੰਚਾਰਜ ਏ.ਐਸ.ਆਈ. ਅਮਨਦੀਪ ਸਿੰਘ ਦੀ ਅਗਵਾਈ ਹੇਠ ਪੁਲਿਸ ਪਾਰਟੀ ਵੱਲੋਂ ਨਾਕਾਬੰਦੀ ਕਰਕੇ ਵਾਹਨਾਂ ਦੀ ਚੈਕਿੰਗ ਸ਼ੁਰੂ ਕੀਤੀ ਗਈ।
ਇਸ ਦੌਰਾਨ ਇੱਕ ਫੋਰਚੂਨਰ ਗੱਡੀ ਨੂੰ ਰੋਕਿਆ ਗਿਆ ਜਿਸ ਵਿੱਚ ਤਿੰਨ ਨੌਜਵਾਨ ਸਵਾਰ ਸਨ। ਪੁਲਿਸ ਵੱਲੋਂ ਪੁੱਛਗਿੱਛ ਕਰਨ ‘ਤੇ ਡਰਾਈਵਰ ਨੇ ਆਪਣਾ ਨਾਮ ਸ਼ੁਭਮ ਵਾਸੀ ਹੋਸ਼ਿਆਰਪੁਰ, ਨਾਲ ਬੈਠੇ ਨੌਜਵਾਨ ਨੇ ਹਰਮਨ ਸਿੰਘ ਤੇ ਪਿੱਛੇ ਬੈਠੇ ਨੇ ਕਰਨ ਕੁਮਾਰ ਦੱਸਿਆ। ਜਦੋਂ ਗੱਡੀ ਦੀ ਤਲਾਸ਼ੀ ਲਈ ਗਈ ਤਾਂ ਪੁਲਿਸ ਨੂੰ 56.61 ਲੱਖ ਰੁਪਏ ਦੀ ਭਾਰਤੀ ਕਰੰਸੀ ਬਰਾਮਦ ਹੋਈ।
ਸਖ਼ਤ ਪੁੱਛਗਿੱਛ ਦੌਰਾਨ ਨੌਜਵਾਨਾਂ ਨੇ ਕਬੂਲ ਕੀਤਾ ਕਿ ਇਹ ਸਾਰੇ ਪੈਸੇ ਦੁਬਈ ‘ਚ ਰਹਿਣ ਵਾਲੇ ਥਾਮਸ ਸਾਲਵੀ ਵੱਲੋਂ ਭੇਜੇ ਗਏ ਸਨ। ਪੁਲਿਸ ਵੱਲੋਂ ਜਦੋਂ ਪੈਸਿਆਂ ਬਾਰੇ ਦਸਤਾਵੇਜ਼ ਮੰਗੇ ਗਏ ਤਾਂ ਇਹ ਤਿੰਨੇ ਕੋਈ ਵੀ ਸਬੂਤ ਪੇਸ਼ ਕਰਨ ਵਿੱਚ ਅਸਮਰਥ ਰਹੇ। ਅੱਗੇ ਦੀ ਪੁੱਛਗਿੱਛ ‘ਚ ਇਹ ਖੁਲਾਸਾ ਹੋਇਆ ਕਿ ਇਹ ਹਵਾਲਾ ਰਾਹੀਂ ਮੰਗਵਾਏ ਪੈਸੇ ਸਨ।
ਦੋਸ਼ੀਆਂ ਨੇ ਦੱਸਿਆ ਕਿ ਇਸ ਲੈਣ-ਦੇਣ ਲਈ ਉਨ੍ਹਾਂ ਨੇ ਇਕ ਖ਼ਾਸ ਕੋਡ ਵਰਤਿਆ ਸੀ, ਜਿਸ ਦੇ ਤਹਿਤ ₹10 ਦਾ ਇੱਕ ਕੱਟਿਆ ਹੋਇਆ ਨੋਟ ਰੱਖਿਆ ਗਿਆ ਸੀ। ਨੋਟ ਦਾ ਇੱਕ ਹਿੱਸਾ ਉਹਨਾਂ ਕੋਲ ਸੀ ਜਦਕਿ ਦੂਜਾ ਹਿੱਸਾ ਉਸ ਵਿਅਕਤੀ ਕੋਲ ਸੀ ਜਿਸ ਨੇ ਇਹ ਪੈਸੇ ਸੌਂਪਣ ਸਨ। ਇਹ ਰਕਮ ਉਹ ਲੁਧਿਆਣਾ ਦੇ ਇੱਕ ਐਸ.ਆਰ.ਕੇ. ਕਾਰੋਬਾਰੀ ਕੋਲੋਂ ਇਸੀ ਤਰੀਕੇ ਨਾਲ ਲੈ ਕੇ ਆਏ ਸਨ।
ਪੁਲਿਸ ਨੇ ਤੁਰੰਤ ਹੀ ਇਸ ਸਾਰੇ ਮਾਮਲੇ ਦੀ ਜਾਣਕਾਰੀ ਆਮਦਨ ਕਰ (Income Tax) ਵਿਭਾਗ ਦੇ ਸੀਨੀਅਰ ਅਧਿਕਾਰੀ ਨੂੰ ਦੇ ਦਿੱਤੀ ਹੈ। ਤਿੰਨਾਂ ਨੂੰ 3 ਦਿਨਾਂ ਦਾ ਨੋਟਿਸ ਜਾਰੀ ਕੀਤਾ ਗਿਆ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਜੇ ਪੁੱਛਗਿੱਛ ਦੌਰਾਨ ਹੋਰ ਵੀ ਜਾਣਕਾਰੀ ਸਾਹਮਣੇ ਆਉਂਦੀ ਹੈ ਤਾਂ ਦੋਸ਼ੀਆਂ ਵਿਰੁੱਧ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
