ਜਲੰਧਰ: (ਕੰਵਲਜੀਤ ਸਿੰਘ ਮੱਕੜ) -ਨਕੋਦਰ ਰੋਡ ‘ਤੇ ਸਥਿਤ ਪ੍ਰਸਿੱਧ ਫੈਂਸੀ ਬੇਕਰੀ ਵਿੱਚ ਉਸ ਵੇਲੇ ਹੰਗਾਮਾ ਖੜਾ ਹੋ ਗਿਆ ਜਦੋਂ ਇਕ ਮਹਿਲਾ ਗਾਹਕ ਨੇ ਫੰਗਸ ਲੱਗੇ ਫਰੂਟ ਕੇਕ ਨੂੰ ਲੈ ਕੇ ਕੜਾ ਵਿਰੋਧ ਕੀਤਾ।
ਜਾਣਕਾਰੀ ਅਨੁਸਾਰ, ਸੋਨੀਆ ਨਾਮਕ ਮਹਿਲਾ ਨੇ ਆਪਣੇ ਰਿਸ਼ਤੇਦਾਰ ਨੂੰ ਦੇਣ ਲਈ ਫੈਂਸੀ ਬੇਕਰੀ ਤੋਂ ਫਰੂਟ ਕੇਕ ਦਾ ਡੱਬਾ ਖਰੀਦਿਆ ਸੀ। ਜਦੋਂ ਰਿਸ਼ਤੇਦਾਰ ਨੇ ਅਗਲੇ ਦਿਨ ਫਗਵਾੜਾ ‘ਚ ਉਹ ਡੱਬਾ ਖੋਲ੍ਹਿਆ, ਤਾਂ ਉਸ ਦੇ ਅੰਦਰੋਂ ਫੰਗਸ ਲੱਗਿਆ ਕੇਕ ਨਿਕਲਿਆ। ਇਸ ਦੀ ਤਸਵੀਰ ਭੇਜਣ ਉਪਰੰਤ ਮਹਿਲਾ ਨੇ ਜਦੋਂ ਇਹ ਗੱਲ ਬੇਕਰੀ ਮਾਲਕ ਨੂੰ ਦੱਸੀ ਤਾਂ ਉਥੇ ਹੰਗਾਮਾ ਹੋ ਗਿਆ।
ਮਹਿਲਾ ਨੇ ਕਿਹਾ ਕਿ ਉਸ ਕੋਲ ਕੇਕ ਦਾ ਬਿੱਲ ਵੀ ਮੌਜੂਦ ਹੈ। ਉਹ ਕਹਿੰਦੀ ਹੈ ਕਿ “ਜੇ ਇਹ ਫੰਗਸ ਲੱਗਿਆ ਕੇਕ ਕੋਈ ਬੱਚਾ ਖਾ ਲੈਂਦਾ ਅਤੇ ਉਸਨੂੰ ਕੁਝ ਹੋ ਜਾਂਦਾ ਤਾਂ ਇਸ ਦੀ ਜ਼ਿੰਮੇਵਾਰੀ ਕੌਣ ਲੈਂਦਾ?”
ਹੰਗਾਮੇ ਤੋਂ ਬਾਅਦ ਬੇਕਰੀ ਮਾਲਕ ਨੇ ਦੁਕਾਨ ਤੋਂ ਬਾਹਰ ਆ ਕੇ ਮਾਫ਼ੀ ਮੰਗੀ ਅਤੇ ਗਲਤੀ ਕਬੂਲ ਕੀਤੀ। ਮਹਿਲਾ ਨੇ ਕਿਹਾ ਕਿ ਉਹ ਇਸ ਮਾਮਲੇ ਦੀ ਸ਼ਿਕਾਇਤ ਸਿਹਤ ਵਿਭਾਗ ਨੂੰ ਦੇਣਗੇ ਤਾਂ ਜੋ ਹੋਰ ਲੋਕਾਂ ਦੀ ਸਿਹਤ ਨਾਲ ਖਿਲਵਾਰ ਨਾ ਹੋਵੇ।
ਪਰਿਵਾਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਦੁਕਾਨ ਨਾਲ ਕੋਈ ਵਿਅਕਤੀਗਤ ਵਿਵਾਦ ਨਹੀਂ ਹੈ, ਪਰ ਉਹ ਲੋਕਾਂ ਨੂੰ ਜਾਗਰੂਕ ਕਰਨਾ ਚਾਹੁੰਦੇ ਹਨ ਕਿ ਖਾਣ-ਪੀਣ ਵਾਲੀਆਂ ਚੀਜ਼ਾਂ ਦੀ ਗੁਣਵੱਤਾ ‘ਤੇ ਧਿਆਨ ਦੇਣਾ ਜ਼ਰੂਰੀ ਹੈ।
ਹੁਣ ਇਹ ਦੇਖਣਾ ਰਹਿ ਗਿਆ ਹੈ ਕਿ ਸਿਹਤ ਵਿਭਾਗ ਇਸ ਮਾਮਲੇ ‘ਚ ਕਾਰਵਾਈ ਕਰਦਿਆਂ ਫੈਂਸੀ ਬੇਕਰੀ ਦੇ ਸੈਂਪਲ ਲੈਂਦਾ ਹੈ ਜਾਂ ਨਹੀਂ।
