ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਜਲੰਧਰ (ਥਾਣਾ ਤਿੰਨ): ਰੇਲਵੇ ਰੋਡ ‘ਤੇ ਸਥਿਤ ਮੁਥੂਟ ਫਾਇਨੈਂਸ ਦੀ ਬਰਾਂਚ ਦੇ ਬਾਹਰ ਅੱਜ ਉਸ ਸਮੇਂ ਹੰਗਾਮਾ ਹੋ ਗਿਆ, ਜਦੋਂ ਮੰਡੀ ਰੋਡ ਦੇ ਰਹਿਣ ਵਾਲੇ ਰਾਕੇਸ਼ ਕੁਮਾਰ ਨੇ ਬਰਾਂਚ ਕਰਮਚਾਰੀਆਂ ‘ਤੇ ਉਸਦਾ ਸੋਨਾ ਨਾਂ ਦੇਣ ਦੇ ਗੰਭੀਰ ਆਰੋਪ ਲਗਾਏ।
ਰਾਕੇਸ਼ ਕੁਮਾਰ ਨੇ ਦੱਸਿਆ ਕਿ ਉਸਨੇ ਰੇਲਵੇ ਰੋਡ ਬਰਾਂਚ ਤੋਂ ਤਿੰਨ ਗ੍ਰਾਮ ਸੋਨੇ ਦੀਆਂ ਬਾਲੀਆਂ ‘ਤੇ 12 ਹਜ਼ਾਰ ਰੁਪਏ ਲੋਨ ਲਿਆ ਸੀ ਅਤੇ ਉਹ ਸਮੇਂ-ਸਮੇਂ ‘ਤੇ ਲੋਨ ਦਾ ਬਿਆਜ਼ ਵੀ ਭਰਦਾ ਰਿਹਾ। ਰਾਕੇਸ਼ ਦੇ ਅਨੁਸਾਰ, ਤਿੰਨ ਦਿਨ ਪਹਿਲਾਂ ਹੀ ਉਸਨੇ ਲੋਨ ਦੀ ਪੂਰੀ ਰਕਮ ਅਦਾ ਕਰ ਦਿੱਤੀ ਸੀ, ਪਰ ਉਸਦੇ ਬਾਅਦ ਬਰਾਂਚ ਵਿੱਚ ਨਿੱਜੀ ਕਾਰਣਾਂ ਕਰਕੇ ਨਹੀਂ ਆ ਸਕਿਆ।
ਸ਼ਨੀਵਾਰ ਦੁਪਹਿਰ ਨੂੰ ਜਦੋਂ ਉਹ ਆਪਣੀ ਮਾਤਾ ਨਾਲ ਲੋਨ ਕਲੀਅਰ ਕਰਨ ਬਰਾਂਚ ਪਹੁੰਚਿਆ ਤਾਂ ਬਰਾਂਚ ਕਰਮਚਾਰੀਆਂ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਕੋਲ ਨਾਂ ਤਾਂ ਕੋਈ ਸੋਨਾ ਹੈ ਅਤੇ ਨਾਂ ਹੀ ਰਾਕੇਸ਼ ਨਾਲ ਸਬੰਧਤ ਕੋਈ ਰਿਕਾਰਡ। ਰਾਕੇਸ਼ ਨੇ ਜਦੋਂ ਉਨ੍ਹਾਂ ਨੂੰ ਆਪਣੀਆਂ ਰਸੀਦਾਂ ਦਿਖਾਈਆਂ ਤਾਂ ਵੀ ਕਰਮਚਾਰੀਆਂ ਨੇ ਉਸਦੇ ਸੋਨੇ ਦੇ ਹੋਣ ਤੋਂ ਇਨਕਾਰ ਕਰ ਦਿੱਤਾ। ਕਰਮਚਾਰੀਆਂ ਵੱਲੋਂ ਸੋਨਾ ਵਾਪਸ ਕਰਨ ਤੋਂ ਇਨਕਾਰ ਕਰਨ ‘ਤੇ ਦੋਵਾਂ ਪੱਖਾਂ ਵਿਚਕਾਰ ਗੱਲਬਾਤ ਤਣਾਅਪੂਰਨ ਹੋ ਗਈ।
ਆਰੋਪ ਹੈ ਕਿ ਜਦੋਂ ਰਾਕੇਸ਼ ਨੇ ਕਰਮਚਾਰੀਆਂ ਨਾਲ ਵਾਜਬ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਨੇ ਗੱਲ ਕਰਨ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ ਅਤੇ ਉਸਨੂੰ ਬਰਾਂਚ ਤੋਂ ਬਾਹਰ ਕੱਢ ਦਿੱਤਾ। ਇਸ ਤੋਂ ਬਾਅਦ ਰਾਕੇਸ਼ ਨੇ ਬਰਾਂਚ ਦੇ ਬਾਹਰ ਹੰਗਾਮਾ ਕਰ ਦਿੱਤਾ ਅਤੇ ਫੌਰੀ ਤੌਰ ‘ਤੇ ਥਾਣਾ ਤਿੰਨ ਦੀ ਪੁਲਿਸ ਨੂੰ ਸੂਚਿਤ ਕੀਤਾ।
ਸੂਚਨਾ ਮਿਲਣ ‘ਤੇ ਥਾਣਾ ਤਿੰਨ ਦੀ ਪੁਲਿਸ ਮੌਕੇ ‘ਤੇ ਪਹੁੰਚੀ ਅਤੇ ਪੂਰਾ ਮਾਮਲਾ ਸੁਣ ਕੇ ਜਾਂਚ ਸ਼ੁਰੂ ਕਰ ਦਿੱਤੀ। ਰਾਕੇਸ਼ ਨੇ ਦੱਸਿਆ ਕਿ ਪੁਲਿਸ ਦੇ ਪਹੁੰਚਣ ਤੋਂ ਬਾਅਦ ਹੀ ਬਰਾਂਚ ਅਧਿਕਾਰੀ ਉਸ ਨਾਲ ਮੁੜ ਗੱਲ ਕਰਣ ਲਈ ਤਿਆਰ ਹੋਏ ਅਤੇ ਭਰੋਸਾ ਦਿੱਤਾ ਕਿ ਬੁੱਧਵਾਰ ਤੱਕ ਮਾਮਲੇ ਦਾ ਕੋਈ ਨਾਂ ਕੋਈ ਹੱਲ ਕੱਢ ਦਿੱਤਾ ਜਾਵੇਗਾ।
ਰਾਕੇਸ਼ ਨੇ ਚੇਤਾਵਨੀ ਦਿੱਤੀ ਕਿ ਜੇਕਰ ਬੁੱਧਵਾਰ ਤੱਕ ਮਾਮਲੇ ਦਾ ਹੱਲ ਨਾ ਨਿਕਲਿਆ ਤਾਂ ਉਹ ਉੱਚ ਅਧਿਕਾਰੀਆਂ ਕੋਲ ਜਾ ਕੇ ਕਾਰਵਾਈ ਦੀ ਮੰਗ ਕਰੇਗਾ।
ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਜਾਰੀ ਹੈ।
