48 ਸਾਲਾਂ ਜੋਗਾ ਸਿੰਘ ਨੇ ਬੋਸਟਨ ਮੈਰਾਥਨ ‘ਚ ਲਹਿਰਾਇਆ ਪਰਚਮ, ਸ਼ਾਨਦਾਰ ਸਮੇਂ ਨਾਲ ਕੀਤੀ ਦੌੜ ਪੂਰੀ

ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਬੋਸਟਨ (ਅਮਰੀਕਾ): ਦੁਨੀਆ ਦੀਆਂ ਸਭ ਤੋਂ ਪ੍ਰਸਿੱਧ ਅਤੇ ਮਾਣਯੋਗ ਦੌੜਾਂ ਵਿੱਚੋਂ ਇੱਕ 130ਵੀਂ ਬੋਸਟਨ ਮੈਰਾਥਨ ਵਿੱਚ ਭਾਗ ਲੈਂਦੇ ਹੋਏ 48 ਸਾਲਾਂ ਦੇ ਜੋਗਾ ਸਿੰਘ ਰੇਲਵੇ ਵਿੱਚ ਬਤੋਰ ਚੀਫ ਇੰਸਪੈਕਟਰ ਆਫ ਟਿਕਟ ਲੁਧਿਆਣਾ ਵਿਖੇ ਤੈਨਾਤ ਹਨ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਦੌੜ ਨੂੰ ਕਾਮਯਾਬੀ ਨਾਲ ਪੂਰਾ ਕੀਤਾ।

ਜੋਗਾ ਸਿੰਘ (Bib ਨੰਬਰ 5925) ਨੇ ਇਹ ਮੈਰਾਥਨ 3 ਘੰਟੇ 02 ਮਿੰਟ 12 ਸਕਿੰਟ ਦੇ ਸ਼ਾਨਦਾਰ ਸਮੇਂ ਵਿੱਚ ਪੂਰੀ ਕੀਤੀ। ਉਨ੍ਹਾਂ ਦੀ ਔਸਤ ਗਤੀ 6 ਮਿੰਟ 57 ਸਕਿੰਟ ਪ੍ਰਤੀ ਮੀਲ ਰਹੀ, ਜੋ ਉਨ੍ਹਾਂ ਦੀ ਵਧੀਆ ਫਿਟਨੈੱਸ ਅਤੇ ਮਿਹਨਤ ਦਾ ਸਬੂਤ ਹੈ।
ਕੁੱਲ 29,375 ਦੌੜਾਕਾਂ ਵਿੱਚੋਂ ਜੋਗਾ ਸਿੰਘ ਨੇ 5,187ਵਾਂ ਸਥਾਨ ਹਾਸਲ ਕੀਤਾ, ਜਦਕਿ ਆਪਣੇ ਕੈਟੇਗਰੀ ਵਿੱਚ ਵੀ ਉਨ੍ਹਾਂ ਦਾ ਪ੍ਰਦਰਸ਼ਨ ਕਾਬਿਲ-ਏ-ਤਾਰੀਫ਼ ਰਿਹਾ। Overall ਸ਼੍ਰੇਣੀ ਵਿੱਚ ਉਨ੍ਹਾਂ ਨੇ 16,492 ਭਾਗੀਦਾਰਾਂ ਵਿੱਚੋਂ 4,864ਵਾਂ ਸਥਾਨ ਪ੍ਰਾਪਤ ਕੀਤਾ। ਇਸ ਤੋਂ ਇਲਾਵਾ, ਪੁਰਸ਼ ਵਰਗ ਵਿੱਚ ਉਨ੍ਹਾਂ ਨੇ 2,426 ਦੌੜਾਕਾਂ ਵਿੱਚੋਂ 423ਵਾਂ ਸਥਾਨ ਹਾਸਲ ਕੀਤਾ।
ਇਸ ਉਮਰ ਵਿੱਚ ਇਸ ਤਰ੍ਹਾਂ ਦਾ ਪ੍ਰਦਰਸ਼ਨ ਨਾ ਸਿਰਫ਼ ਪ੍ਰੇਰਣਾਦਾਇਕ ਹੈ, ਸਗੋਂ ਨੌਜਵਾਨਾਂ ਲਈ ਵੀ ਇੱਕ ਵੱਡਾ ਸੰਦੇਸ਼ ਹੈ ਕਿ ਜੇਕਰ ਹੌਂਸਲਾ ਅਤੇ ਲਗਨ ਹੋਵੇ ਤਾਂ ਕੋਈ ਵੀ ਮੰਜ਼ਿਲ ਹਾਸਲ ਕੀਤੀ ਜਾ ਸਕਦੀ ਹੈ।
ਜੋਗਾ ਸਿੰਘ ਦੀ ਇਸ ਕਾਮਯਾਬੀ ਨਾਲ ਉਨ੍ਹਾਂ ਦੇ ਪਰਿਵਾਰ, ਇਲਾਕੇ ਅਤੇ ਪੰਜਾਬ ਦਾ ਨਾਮ ਰੌਸ਼ਨ ਹੋਇਆ ਹੈ। ਖੇਡ ਪ੍ਰੇਮੀਆਂ ਵੱਲੋਂ ਉਨ੍ਹਾਂ ਨੂੰ ਵਧਾਈਆਂ ਦਿੱਤੀਆਂ ਜਾ ਰਹੀਆਂ ਹਨ ਅਤੇ ਉਮੀਦ ਕੀਤੀ ਜਾ ਰਹੀ ਹੈ ਕਿ ਉਹ ਅੱਗੇ ਵੀ ਇਸੇ ਤਰ੍ਹਾਂ ਦੇ ਮਾਣਯੋਗ ਪ੍ਰਦਰਸ਼ਨ ਕਰਦੇ ਰਹਿਣਗੇ।