ਐਲਪੀਯੂ ਵੱਲੋਂ ਏਆਈਸੀਜੀਐਸ-2026 ਦੀ ਪੰਜਵੀਂ ਕਾਨਫਰੰਸ ਦੀ ਮੇਜ਼ਬਾਨੀ, 20 ਤੋਂ ਵੱਧ ਦੇਸ਼ਾਂ ਦੇ ਯੂਨੀਵਰਸਿਟੀ ਮੁਖੀਆਂ ਤੇ ਅੰਤਰਰਾਸ਼ਟਰੀ ਡੈਲੀਗੇਟਾਂ ਨੇ ਕੀਤੀ ਸ਼ਮੂਲੀਅਤ, 7 ਦੇਸ਼ਾਂ ਨਾਲ 8 ਨਵੇਂ ਐਮਓਯੂ ਸਾਈਨ

ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਦੁਨੀਆ ਭਰ ਦੇ ਪ੍ਰਮੁੱਖ ਸਿੱਖਿਆ ਮਾਹਿਰਾਂ ਅਤੇ ਯੂਨੀਵਰਸਿਟੀ ਮੁਖੀਆਂ ਨੂੰ ਇੱਕ ਮੰਚ ’ਤੇ ਇਕੱਠਾ ਕਰਦਿਆਂ ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ (ਐਲਪੀਯੂ) ਵੱਲੋਂ ‘ਐਨੁਅਲ ਇੰਟਰਨੈਸ਼ਨਲ ਕਾਨਫਰੰਸ ਐਂਡ ਗਲੋਬਲ ਸਮਿਟ-2026’ (AICGS 2026) ਦੇ ਪੰਜਵੇਂ ਐਡੀਸ਼ਨ ਦੀ ਮੇਜ਼ਬਾਨੀ ਕੀਤੀ ਗਈ। ਤਿੰਨ ਦਿਨ ਚੱਲੀ ਇਸ ਅੰਤਰਰਾਸ਼ਟਰੀ ਕਾਨਫਰੰਸ ਵਿੱਚ 20 ਤੋਂ ਵੱਧ ਦੇਸ਼ਾਂ ਦੀਆਂ ਯੂਨੀਵਰਸਿਟੀਆਂ ਦੇ ਮੁਖੀਆਂ ਅਤੇ ਅੰਤਰਰਾਸ਼ਟਰੀ ਨੁਮਾਇੰਦਿਆਂ ਨੇ ਹਿੱਸਾ ਲਿਆ।
ਇਸ ਸਾਲ ਦੇ ਸਮਿਟ ਦਾ ਵਿਸ਼ਾ “ਕਨੈਕਟਿਡ ਫਿਊਚਰਜ਼: ਵੇਅਰ ਗਲੋਬਲ ਯੂਨੀਵਰਸਿਟੀ ਪਾਰਟਨਰਸ਼ਿਪਸ ਡਿਲੀਵਰ ਰੀਅਲ ਇੰਪੈਕਟ” ਰੱਖਿਆ ਗਿਆ। ਸਮਿਟ ਦਾ ਮੁੱਖ ਉਦੇਸ਼ ਉੱਚ ਸਿੱਖਿਆ, ਖੋਜ ਅਤੇ ਅੰਤਰਰਾਸ਼ਟਰੀ ਪੱਧਰ ’ਤੇ ਵਿਦਿਆਰਥੀਆਂ ਲਈ ਅਕਾਦਮਿਕ ਮੌਕਿਆਂ ਨੂੰ ਹੋਰ ਮਜ਼ਬੂਤ ਕਰਨ ਵਿੱਚ ਗਲੋਬਲ ਸਹਿਯੋਗ ਦੀ ਭੂਮਿਕਾ ’ਤੇ ਵਿਚਾਰ-ਵਟਾਂਦਰਾ ਕਰਨਾ ਰਿਹਾ।
ਸਮਿਟ ਦੌਰਾਨ ਐਲਪੀਯੂ ਵੱਲੋਂ 7 ਦੇਸ਼ਾਂ—ਸਵਿਟਜ਼ਰਲੈਂਡ, ਅਮਰੀਕਾ, ਐਸਟੋਨੀਆ, ਸਾਈਪ੍ਰਸ, ਜਰਮਨੀ, ਰੂਸ ਅਤੇ ਯੂਏਈ—ਦੇ ਪ੍ਰਮੁੱਖ ਅੰਤਰਰਾਸ਼ਟਰੀ ਸਿੱਖਿਆ ਸੰਸਥਾਨਾਂ ਨਾਲ 8 ਨਵੇਂ ਸਮਝੌਤਾ ਪੱਤਰ (ਐਮਓਯੂ) ਸਾਈਨ ਕੀਤੇ ਗਏ। ਇਨ੍ਹਾਂ ਵਿੱਚ ਸਵਿਸ ਸਕੂਲ ਆਫ ਮੈਨੇਜਮੈਂਟ, ਸੈਮੂਅਲ ਮੈਰਿਟ ਯੂਨੀਵਰਸਿਟੀ, ਐਸਟੋਨਿਅਨ ਐਂਟਰਪ੍ਰੇਨਿਊਰਸ਼ਿਪ ਯੂਨੀਵਰਸਿਟੀ ਆਫ ਅਪਲਾਈਡ ਸਾਇੰਸਿਜ਼, ਯੂਨੀਵਰਸਿਟੀ ਆਫ ਸੈਂਟਰਲ ਮਿਸੌਰੀ, ਯੂਰਪੀਅਨ ਯੂਨੀਵਰਸਿਟੀ ਸਾਈਪ੍ਰਸ, ਜਰਮਨ ਵਾਰਸਿਟੀ, ਸੇਂਟ ਪੀਟਰਜ਼ਬਰਗ ਸਟੇਟ ਯੂਨੀਵਰਸਿਟੀ ਆਫ ਇਕਨਾਮਿਕਸ ਅਤੇ ਸਿਟੀ ਯੂਨੀਵਰਸਿਟੀ ਅਜਮਾਨ ਸ਼ਾਮਲ ਹਨ।
ਇਸ ਮੌਕੇ ਸੰਬੋਧਨ ਕਰਦਿਆਂ ਐਲਪੀਯੂ ਦੀ ਪ੍ਰੋ-ਚਾਂਸਲਰ ਕਰਨਲ ਡਾ. ਰਸ਼ਮੀ ਮਿੱਤਲ ਨੇ ਕਿਹਾ ਕਿ ਅੰਤਰਰਾਸ਼ਟਰੀ ਭਾਈਵਾਲੀਆਂ ਸਿਰਫ਼ ਰਸਮੀ ਸਮਝੌਤਿਆਂ ਤੱਕ ਸੀਮਤ ਨਹੀਂ ਰਹਿਣੀਆਂ ਚਾਹੀਦੀਆਂ, ਸਗੋਂ ਇਨ੍ਹਾਂ ਰਾਹੀਂ ਵਿਦਿਆਰਥੀਆਂ ਅਤੇ ਫੈਕਲਟੀ ਲਈ ਲੰਬੇ ਸਮੇਂ ਦੇ ਸਿੱਖਿਆ ਤੇ ਖੋਜ ਦੇ ਮੌਕੇ ਪੈਦਾ ਹੋਣੇ ਚਾਹੀਦੇ ਹਨ। ਉਨ੍ਹਾਂ ਕਿਹਾ ਕਿ ਅੰਤਰਰਾਸ਼ਟਰੀਕਰਨ ਦੀ ਅਸਲ ਮਹੱਤਤਾ ਆਪਸੀ ਸਿੱਖਿਆ, ਅਕਾਦਮਿਕ ਆਦਾਨ-ਪ੍ਰਦਾਨ ਅਤੇ ਨਿਰੰਤਰ ਸੰਪਰਕ ਰਾਹੀਂ ਇਨ੍ਹਾਂ ਭਾਈਵਾਲੀਆਂ ਨੂੰ ਪ੍ਰਭਾਵਸ਼ਾਲੀ ਬਣਾਉਣ ਵਿੱਚ ਹੈ।
ਐਲਪੀਯੂ ਦੇ ਡਿਵੀਜ਼ਨ ਆਫ ਇੰਟਰਨੈਸ਼ਨਲ ਅਫੇਅਰਜ਼ ਨੇ ਆਪਣੀ ਯਾਤਰਾ ਦੇ 25 ਸਾਲ ਪੂਰੇ ਕਰਨ ਦੇ ਮੌਕੇ ’ਤੇ ਵੀ ਆਪਣੀਆਂ ਪ੍ਰਾਪਤੀਆਂ ਸਾਂਝੀਆਂ ਕੀਤੀਆਂ। ਡਿਵੀਜ਼ਨ ਵੱਲੋਂ ਹੁਣ ਤੱਕ 600 ਤੋਂ ਵੱਧ ਐਮਓਯੂ ਅਤੇ ਅੰਤਰਰਾਸ਼ਟਰੀ ਭਾਈਵਾਲੀਆਂ ਦਾ ਵਿਸ਼ਾਲ ਨੈੱਟਵਰਕ ਸਥਾਪਤ ਕੀਤਾ ਜਾ ਚੁੱਕਾ ਹੈ। ਇਹ ਨੈੱਟਵਰਕ ਵਿਸ਼ਵ ਪੱਧਰੀ ਉੱਚ ਸਿੱਖਿਆ ਭਾਈਚਾਰੇ ਨਾਲ ਐਲਪੀਯੂ ਦੇ ਲਗਾਤਾਰ ਵਧ ਰਹੇ ਸੰਪਰਕ ਅਤੇ ਸਹਿਯੋਗ ਨੂੰ ਦਰਸਾਉਂਦਾ ਹੈ।