ਜਗਰਾਓਂ : ਪੰਜਾਬ ਸਮੇਤ ਗੁਆਂਢੀ ਸੂਬਿਆਂ ਦੀ ਪੁਲਿਸ ਨੇ ਜਿਸ ਖੂੰਖਾਰ ਗੈਂਗਸਟਰ ਜੈਪਾਲ ਭੁਲੱਰ ਫਿਰੋਜ਼ਪੁਰੀਆ ਦੀ ਭਾਲ ਵਿਚ ਜ਼ਮੀਨ-ਅਸਮਾਨ ਇਕ ਕੀਤਾ ਹੋਇਆ ਹੈ, ਇਹ ਗੈਂਗਸਟਰ ਬੜੀ ਸ਼ਾਨ ਨਾਲ ਕਈ ਮਹੀਨਿਆਂ ਤੋਂ ਸਾਥੀ ਗੁਰਗਿਆਂ ਨਾਲ ਇੱਥੋਂ ਦੇ ਕੋਠੇ ਬੱਗੂ ਵਿਚ ਐੱਨਆਰਆਈ ਦੀ ਕੋਠੀ ਵਿਚ ਕਿਰਾਏ ‘ਤੇ ਰਹਿ ਰਿਹਾ ਸੀ। ਇਹ ਖੁਲਾਸਾ ਹੋਣ ‘ਤੇ ਜਗਰਾਓਂ ਹੀ ਨਹੀਂ ਪੂਰੇ ਪੰਜਾਬ ਦੀ ਪੁਲਿਸ ਇਕ ਵਾਰ ਦੰਗ ਰਹਿ ਗਈ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਜਗਰਾਓਂ ਦੇ ਕੋਠੇ ਬੱਗੂ ਵਿਚ ਐੱਨਆਰਆਈ ਹਰਦੀਪ ਸਿੰਘ ਦੀਪਾ ਜੋ ਕੈਨੇਡਾ ਰਹਿੰਦਾ ਹੈ, ਉਸ ਨੇ ਪਿੰਡ ਵਿਚ ਆਪਣੀਆਂ ਦੋ ਕੋਠੀਆਂ ਵਿੱਚੋਂ ਪੁਰਾਣੀ ਕੋਠੀ ਦੇ ਪੋਰਸ਼ਨ ਕਿਰਾਏ ‘ਤੇ ਦਿੱਤੇ ਹੋਏ ਸਨ। ਇਨ੍ਹਾਂ ਵਿੱਚੋਂ ਇਕ ਪੋਰਸ਼ਨ ਜੈਪਾਲ ਫਿਰੋਜ਼ਪੁਰੀਆ ਨੇ ਸਾਲ 2020 ਦੇ 11ਵੇਂ ਮਹੀਨੇ ਤੋਂ ਕਿਰਾਏ ‘ਤੇ ਲਿਆ ਹੈ। ਸ਼ਨਿਚਰਵਾਰ ਨੂੰ ਜਗਰਾਓਂ ਦੀ ਦਾਣਾ ਮੰਡੀ ਵਿਚ ਝੜਪ ਦੌਰਾਨ ਸੀਆਈਏ ਸਟਾਫ ਦੇ ਥਾਣੇਦਾਰਾਂ ਭਗਵਾਨ ਸਿੰਘ ਅਤੇ ਦਲਵਿੰਦਰਜੀਤ ਸਿੰਘ ਦੇ ਗੋਲੀਆਂ ਵਰ੍ਹਾਉਂਦਿਆਂ ਕਤਲ ਕਰਨ ਵਾਲਾ ਜੈਪਾਲ ਆਪਣੇ ਗੈਂਗ ਸਮੇਤ ਪਿਛਲੇ 7 ਮਹੀਨਿਆਂ ਤੋਂ ਜਗਰਾਓਂ ਡੇਰਾ ਲਾਈ ਬੈਠਾ ਰਿਹਾ ਹੈ। ਇਸ ਦਾ ਖ਼ੁਲਾਸਾ ਬੀਤੇ ਕੱਲ੍ਹ ਜਗਰਾਓਂ ਪੁਲਿਸ ਨੇ ਗੈਂਗਸਟਰ ਜੈਪਾਲ ਫਿਰੋਜ਼ਪੁਰੀਆ, ਬਲਜਿੰਦਰ ਸਿੰਘ, ਜਸਪ੍ਰਰੀਤ ਸਿੰਘ ਤੇ ਦਰਸ਼ਨ ਸਿੰਘ ਦੇ ਥਾਣੇਦਾਰਾਂ ਦੇ ਕਤਲ ਵਿਚ ਸ਼ਾਮਲ ਹੋਣ ਬਾਰੇ ਪੋਸਟਰ ਜਾਰੀ ਕੀਤੇ ਗਏ, ਜਿਨ੍ਹਾਂ ਵਿੱਚੋਂ ਪਿੰਡ ਕੋਠੇ ਬੱਗੂ ਦੇ ਨੌਜਵਾਨਾਂ ਨੇ ਬਲਜਿੰਦਰ ਸਿੰਘ ਦੀ ਤਸਵੀਰ ਪਛਾਣੀ ਤਾਂ ਹੋ ਸਕਿਆ ਹੈ। ਬੱਸ ਫਿਰ ਕੀ ਸੀ, ਜਗਰਾਓਂ ਪੁਲਿਸ ਤਕ ਇਹ ਸੂਚਨਾ ਪੱੁਜੀ ਤਾਂ ਉਨ੍ਹਾਂ ਦੇ ਪੈਰਾਂ ਹੈਠੋਂ ਜ਼ਮੀਨ ਖਿਸਕ ਗਈ।
ਆਈਜੀ ਨੌਨਿਹਾਲ ਸਿੰਘ, ਐੱਸਐੱਸਪੀ ਚਰਨਜੀਤ ਸਿੰਘ ਸਮੇਤ ਪੁਲਿਸ ਦੀ ਵੱਡੀ ਟੀਮ ਤੇ ਗੱਡੀਆਂ ਦਾ ਕਾਫ਼ਲਾ ਪਿੰਡ ਕੋਠੇ ਬੱਗੂ ਜਾ ਪਹੁੰਚਿਆ। ਇੱਥੇ ਪੁਲਿਸ ਨੇ ਜੈਪਾਲ ਦੀ ਕਿਰਾਏ ‘ਤੇ ਲਈ ਕੋਠੀ ਦਾ ਕੋਨਾ ਕੋਨਾ ਛਾਣ ਮਾਰਿਆ। ਇਸ ਦੌਰਾਨ ਪੁਲਿਸ ਨੂੰ ਕੁਝ ਖ਼ਾਸ ਹੱਥ ਤਾਂ ਨਹੀਂ ਲੱਗਾ ਪਰ ਕੋਠੀ ਵਿਚ ਜੋ ਵੀ ਸਮਾਨ, ਕੱਪੜੇ, ਬੂਟ, ਚੱਪਲਾਂ ਆਦਿ ਨਜ਼ਰੀਂ ਪਏ, ਉਸ ਨੂੰ ਕਬਜ਼ੇ ਵਿਚ ਲੈ ਲਿਆ ਤੇ ਕੋਠੀ ਨੂੰ ਜਿੰਦਰਾ ਮਾਰ ਦਿੱਤਾ। ਪਿੰਡ ਵਾਸੀਆਂ ਮੁਤਾਬਕ ਉਕਤ ਕੋਠੀ ਕਿਰਾਏ ਤੇ ਲੈਣ ਤੋਂ ਬਾਅਦ 15-20 ਦਿਨ ਗੈਂਗਸਟਰ ਇੱਥੇ ਲਗਾਤਾਰ ਰਹੇ। ਉਸ ਪਿੱਛੋਂ ਉਹ ਕਦੇ-ਕਦਾਈ ਆਉਂਦੇ ਜਾਂਦੇ ਰਹਿੰਦੇ ਸਨ।
ਪਿੰਡ ਵਿਚ ਉਨ੍ਹਾਂ ਦੀ ਪਛਾਣ ਹੋਣ ਲੱਗੀ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਵੱਲੋਂ ਥਾਣੇਦਾਰਾਂ ਦੇ ਕਤਲ ਮੌਕੇ ਵਰਤੀ ਗਈ ਕਾਰ ਇਸ ਕੋਠੀ ਵਿਚ ਅਕਸਰ ਖੜ੍ਹੀ ਰਹਿੰਦੀ ਸੀ। ਇਸ ਕੋਠੀ ਦਾ ਕਿਰਾਇਆਨਾਮਾ ਬਾਕਾਇਦਾ ਲਿਖਿਆ ਗਿਆ। ਇਹ ਕਿਰਾਇਆਨਾਮਾ ਬਲਜਿੰਦਰ ਸਿੰਘ ਵਾਸੀ ਮਾਹਲਾਂ ਖੁਰਦ ਮੋਗਾ ਦੇ ਨਾਂ ‘ਤੇ ਲਿਖਿਆ ਹੈ। ਕਿਰਾਇਆਨਾਮਾ ਦੇ ਨਾਲ ਅਧਾਰ ਕਾਰਡ ਲਾਇਆ ਗਿਆ ਤੇ ਇਸ ‘ਤੇ ਦਰਸ਼ਨ ਸਿੰਘ ਸਹੌਲੀ ਨੇ ਗਵਾਹੀ ਪਾਈ। ਹੁਣ ਪੰਜਾਬ ਪੁਲਿਸ ਦੇ ਆਲ੍ਹਾ ਅਧਿਕਾਰੀ ਤੇ ਸਥਾਨਕ ਅਫ਼ਸਰ ਹੈਰਾਨ ਹਨ ਕਿ ਇਹ ਗੈਂਗਸਟਰ ਸ਼ਰੇਆਮ ਜਗਰਾਓਂ ਵਿਚ ਪਨਾਹ ਲੈ ਕੇ ਲੈਂਦੇ ਰਹੇ ਤੇ ਆਖ਼ਰ ਸੂਹ ਤਕ ਕਿਉਂ ਨਹੀਂ ਲੱਗੀ।
