ਜ਼ਮੀਨੀ ਝਗੜੇ ਚ ਕਲਯੁੱਗੀ ਪੁੱਤ ਨੇ ਗੋਲੀ ਮਾਰ ਕੇ ਕੀਤਾ ਮਾਂ ਦਾ ਕਤਲ

ਤਰਨਤਾਰਨ : ਤਰਨਤਾਰਨ ਦੇ ਪਿੰਡ ਨੌਰੰਗਾਬਾਦ ਵਿਖੇ ਧੀ ਜਵਾਈ ਕੋਲ ਰਹਿ ਰਹੀ ਮਾਂ ਦੀ ਕਲਯੁਗੀ ਪੁੱਤ ਨੇ ਅਖੌਤੀ ਤੌਰ ‘ਤੇ ਗੋਲ਼ੀ ਮਾਰ ਕੇ ਹੱਤਿਆ ਕਰ ਦਿੱਤੀ। ਇਹ ਹੱਤਿਆ ਜ਼ਮੀਨੀ ਝਗੜੇ ‘ਚ ਕੀਤੀ ਗਈ ਦੱਸੀ ਜਾ ਰਹੀ ਹੈ। ਮੌਕੇ ‘ਤੇ ਪੁੱਜੀ ਥਾਣਾ ਸਦਰ ਦੀ ਪੁਲਿਸ ਨੇ ਲਾਸ਼ ਕਬਜ਼ੇ ‘ਚ ਲੈ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।

ਥਾਣਾ ਸਦਰ ਤਰਨਤਾਰਨ ਦੇ ਮੁਖੀ ਇੰਸਪੈਕਟਰ ਪ੍ਰਭਜੀਤ ਸਿੰਘ ਨੇ ਦੱਸਿਆ ਕਿ ਸਵਿੰਦਰ ਕੌਰ (65) ਪਤਨੀ ਹਰਮੁੱਖ ਸਿੰਘ ਵਾਸੀ ਗੋਇੰਦਵਾਲ ਸਾਹਿਬ ਬਾਈਪਾਸ ਤਰਨਤਾਰਨ ਦਾ ਆਪਣੇ ਪੁੱਤਰ ਕਾਰਜ ਸਿੰਘ ਨਾਲ ਜ਼ਮੀਨ ਨੂੰ ਲੈ ਕੇ ਝਗੜਾ ਚਲਦਾ ਆ ਰਿਹਾ ਸੀ। ਜਿਸਦੇ ਚਲਦਿਆਂ ਉਹ ਆਪਣੀ ਨੌਰੰਗਾਬਾਦ ਵਿਆਹੀ ਧੀ ਲਵਪ੍ਰਰੀਤ ਕੌਰ ਤੇ ਜਵਾਈ ਹਰਦੀਪ ਕੋਲ ਰਹਿੰਦੀ ਸੀ। ਅੱਜ ਉਸਦਾ ਲੜਕਾ ਕਾਰਜ ਸਿੰਘ ਵੀ ਨੌਰੰਗਾਬਾਦ ਚਲਾ ਗਿਆ ਤੇ ਉਥੇ ਉਸਦੀ ਆਪਣੀ ਮਾਂ ਨਾਲ ਤਕਰਾਰ ਹੋ ਗਈ। ਜਿਸ ਤੋਂ ਬਾਅਦ ਉਸਨੇ ਆਪਣੀ ਮਾਂ ਨੂੰ ਗੋਲ਼ੀ ਮਾਰੀ ਦਿੱਤੀ ਤੇ ਉਸਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਉਨ੍ਹਾਂ ਦੱਸਿਆ ਕਿ ਲਾਸ਼ ਨੂੰ ਕਬਜ਼ੇ ‘ਚ ਲੈ ਲਿਆ ਗਿਆ ਹੈ ਤੇ ਮਿ੍ਤਕਾ ਦੇ ਜਵਾਈ ਹਰਦੀਪ ਸਿੰਘ ਦੇ ਭਤੀਜੇ ਜਗਜੀਤ ਸਿੰਘ ਪੁੱਤਰ ਸੁਖਦੇਵ ਸਿੰਘ ਦੇ ਬਿਆਨਾਂ ‘ਤੇ ਕਾਰਜ ਸਿੰਘ ਖ਼ਿਲਾਫ਼ ਕੇਸ ਦਰਜ ਕਰ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।