ਪੰਜਾਬ ‘ਚ 4 ਹਜ਼ਾਰ ਰੁਪਏ ਪ੍ਰਤੀ ਟਨ ਤਕ ਵਧੇ ਸਟੀਲ ਦੇ ਭਾਅ

ਲੁਧਿਆਣਾ : ਮੁਲਕ ਵਿਚ ਸਟੀਲ ਦੀਆਂ ਕੀਮਤਾਂ ਵਿਚ ਲਗਾਤਾਰ ਵਾਧਾ ਹੋ ਰਿਹਾ ਹੈ। ਸੂਬੇ ਦੇ ਸੈਕੰਡਰੀ ਸਟੀਲ ਬਣਾਉਣ ਵਾਲੇ ਵੀ ਇਸ ਤੋਂ ਬਚੇ ਹੋਏ ਨਹੀਂ ਹਨ। ਦੋ ਮਹੀਨਿਆਂ ਦੌਰਾਨ ਸਰੀਏ ਦਾ ਭਾਅ 51 ਹਜ਼ਾਰ ਰੁਪਏ ਤੋਂ ਉੱਛਲ ਕੇ 56 ਹਜ਼ਾਰ ਰੁਪਏ ਪ੍ਰਤੀ ਟਨ ‘ਤੇ ਪੁੱਜ ਗਿਆ ਹੈ।

ਇਸ ਤੋਂ ਇਲਾਵਾ ਸੂਬੇ ਵਿਚ ਸਟੀਲ ਦੇ ਭਾਅ ਅਪ੍ਰੈਲ ਦੇ ਮੁਕਾਬਲੇ ਚਾਰ ਹਜ਼ਾਰ ਰੁਪਏ ਪ੍ਰਤੀ ਟਨ ਤਕ ਵਧ ਗਏ ਹਨ। ਪੰਜ ਅਪ੍ਰੈਲ ਨੂੰ ਲੁਧਿਆਣਾ ਵਿਚ ਇੰਗਟ ਸਟੀਲ ਦਾ ਭਾਅ 43000 ਰੁਪਏ ਪ੍ਰਤੀ ਟਨ ਸੀ ਜਦਕਿ ਸਕਰੈਪ ਦਾ ਭਾਅ 36000 ਰੁਪਏ ਪ੍ਰਤੀ ਟਨ ਸੀ। ਤਿੰਨ ਮਹੀਨਿਆਂ ਬਾਅਦ ਪੰਜ ਜੂਨ ਨੂੰ ਇੰਗਟ ਸਟੀਲ ਦੀ ਕੀਮਤ ਲੁਧਿਆਣਾ ਵਿਚ 46500 ਪ੍ਰਤੀ ਟਨ ਤੇ ਸਕਰੈਪ ਦੇ ਭਾਅ 39500 ਰੁਪਏ ਪ੍ਰਤੀ ਟਨ ਰਹੇ ਹਨ

ਇਸ ਦਾ ਖ਼ਾਸ ਕਾਰਨ ਇਹ ਹੈ ਕਿ ਕੋਰੋਨਾ ਮਹਾਮਾਰੀ ਕਾਰਨ ਕਈ ਸੂਬਿਆਂ ਵਿਚ ਤਾਲਾਬੰਦੀ ਲਾਗੂ ਹੈ, ਇਸ ਕਾਰਨ ਸਨਅਤੀ ਉਤਪਾਦਨ ‘ਤੇ ਅਸਰ ਪਿਆ ਹੈ। ਨਤੀਜਤਨ ਇੰਜੀਨੀਰਿੰਗ ਇੰਡਸਟਰੀ ਤੋਂ ਸਕਰੈਪ ਘੱਟ ਨਿਕਲ ਰਹੀ ਹੈ। ਘਰੇਲੂ ਬਜ਼ਾਰ ਵਿਚ ਸਕਰੈਪ ਦੀ ਘਾਟ ਹੈ ਤੇ ਸੰਸਾਰ ਭਰ ਦੇ ਬਜ਼ਾਰ ਵਿਚ ਸਕਰੈਪ ਦੇ ਭਾਅ ਬਹੁਤ ਜ਼ਿਆਦਾ ਹਨ।

ਨਾਰਦਰਨ ਇੰਡੀਆ ਇੰਡਕਸ਼ਨ ਐਂਡ ਫਰਨੇਸ ਐਸੋਸੀਏਸ਼ਨ ਦੇ ਮੁਖੀ ਕੇਕੇ ਗਰਗ ਮੁਤਾਬਕ ਸੈਕੰਡਰੀ ਸਟੀਲ ਨਿਰਮਾਤਾ ਆਪਣੀ ਜ਼ਰੂਰਤ ਦਾ ਪੰਜਾਹ ਫ਼ੀਸਦ ਤੋਂ ਵੱਧ ਸਕਰੈਪ ਪਰਦੇਸਾਂ ਤੋਂ ਮੰਗਵਾਉਂਦੇ ਹਨ ਪਰ ਵਿਦੇਸ਼ੀ ਸਕਰੈਪ ਹਾਲੇ ਮਹਿੰਗਾ ਪੈ ਰਿਹਾ ਹੈ। ਕੌਮਾਂਤਰੀ ਬਜ਼ਾਰ ਵਿਚ ਸਕਰੈਪ ਦੇ ਭਾਅ 500 ਤੋਂ 550 ਡਾਲਰ ਪ੍ਰਤੀ ਟਨ ਚੱਲ ਰਹੇ ਹਨ। ਅਜਿਹੇ ਵਿਚ ਇਹ ਸਕਰੈਪ ਇੱਥੇ ਆ ਕੇ ਇੰਡਸਟਰੀ ਨੂੰ 41 ਤੋਂ 42 ਹਜ਼ਾਰ ਰੁਪਏ ਪ੍ਰਤੀ ਟਨ ਵਿਚ ਪੈ ਰਿਹਾ ਹੈ। ਨਤੀਜਤਨ ਕਾਰਖ਼ਾਨੇਦਾਰਾਂ ਨੇ ਪਰਦੇਸਾਂ ਤੋਂ ਸਕਰੈਪ ਮੰਗਵਾਉਣੀ ਘਟਾ ਦਿੱਤੀ ਹੈ

ਓਧਰ, ਕੌਮਾਂਤਰੀ ਬਜ਼ਾਰ ਵਿਚ ਸਟੀਲ ਦੀ ਜਬਰਦਸਤ ਮੰਗ ਹੈ। ਗਰਗ ਮੁਤਾਬਕ ਕੱਚਾ ਮਾਲ ਮਹਿੰਗਾ ਹੋਣ ਕਾਰਨ ਸਟੀਲ ਦੀਆਂ ਕੀਮਤਾਂ ਅਸਮਾਨੀਂ ਚੜ੍ਹੀਆਂ ਹਨ ਜਦਕਿ ਇੰਡਕਸ਼ਨ ਫਰਨੇਸ ਇੰਡਸਟਰੀ ਨੂੰ ਸਕਰੈਪ ਤੋਂ ਇੰਗਟ ਤਕ ਅਤੇ ਇੰਗਟ ਤੋਂ ਸਰੀਆ ਬਣਾਉਣ ਤਕ ਸਿਰਫ਼ ਕਨਵਰਜ਼ਨ ਚਾਰਜਿਸ ਮਿਲ ਰਹੇ ਹਨ