ਟਾਂਡਾ ਉੜਮੁੜ : ਥਾਣਾ ਟਾਂਡਾ ਪੁਲਿਸ ਨੇ ਬੀਤੀ ਰਾਤ ਪਿੰਡ ਤਲਵੰਡੀ ਡੱਡੀਆਂ ਵਿਖੇ ਹਥਿਆਰ ਬੰਦ ਨੌਜਵਾਨਾਂ ਵੱਲੋਂ ਇਕ ਪਾਦਰੀ ਨੂੰ ਜ਼ਖਮੀ ਕਰਕੇ ਹਥਿਆਰ ਵਿਖਾ ਕਾਰ ਖੋਹ ਕਰਨ ਵਾਲੇ ਦੋ ਨੌਜਵਾਨਾਂ ਖਿਲਾਫ ਮਾਮਲਾ ਦਰਜ ਕੀਤਾ ਹੈ। ਮੁਲਜਮਾਂ ਦੀ ਪਛਾਣ ਮੰਗਲ ਪੁੱਤਰ ਸਰੂਪ ਸਿੰਘ ਵਾਸੀ ਜੰਬੋਵਾਲ ਥਾਣਾ ਬੇਗੋਵਾਲ ਤੇ ਇਕ ਅਣਪਛਾਤੇ ਵਿਅਕਤੀ ਵਜੋਂ ਹੋਈ
ਟਾਂਡਾ ਪੁਲਿਸ ਨੂੰ ਦਿੱਤੇ ਬਿਆਨਾਂ ‘ਚ ਪਾਦਰੀ ਵਿਜੈ ਨੰਦਾ ਪੁੱਤਰ ਹੁਕਮ ਨੰਦਾ ਵਾਸੀ ਬੀਰ ਸੇਵਾ ਚਰਚ ਸੱਲਾਂ ਰੋਡ ਟਾਂਡਾ ਨੇ ਦੱਸਿਆ ਕਿ ਸ਼ੁੱਕਰਵਾਰ ਰਾਤ ਉਹ ਆਪਣੀ ਪਤਨੀ ਸਮੇਤ ਪਿੰਡ ਡੱਡੀਆਂ ਵਿਖੇ ਨੀਲਮ ਕੁਮਾਰੀ ਪਤਨੀ ਰਮੇਸ਼ ਕੁਮਾਰ ਵਾਸੀ ਡੱਡੀਆਂ ਘਰੇ ਅਰਦਾਸ ਬੇਨਤੀ ਕਰਨ ਗਿਆ ਸੀ। ਦੇਰ ਰਾਤ ਪੀੜਤ ਵਿਜੈ ਨੰਦਾ ਜਦੋਂ ਵਕਤ ਕਰੀਬ 10 ਵਜੇ ਵਾਪਸ ਜਾ ਰਿਹਾ ਸੀ ਉਸ ਦੀ ਕਾਰ ਨੇੜੇ ਦੋ ਸਕੂਟਰੀ ਸਵਾਰ ਨੌਜਵਾਨ ਪਿੰਡ ਡੱਡੀਆਂ ਦੇ ਇਕ ਨੌਜਵਾਨ ਕਰਨ ਪੁੱਤਰ ਰੁਲਦਾ ਰਾਮ ਕੋਲੋਂ ਕਿਸੇ ਦਾ ਪਤਾ ਪੁੱਛ ਰਹੇ ਸਨ ਜੋ ਨਾ ਦੱਸਣ ਤੇ ਝਗੜਾ ਕਰਨ ਲੱਗ ਪਏ। ਪੀੜਤ ਆਪਣੀ ਕਾਰ ‘ਚ ਪਤਨੀ ਸਮੇਤ ਬੈਠ ਗਿਆ ਤੇ ਕਾਰ ਸਟਾਰਟ ਕਰਕੇ ਜਾਣ ਲੱਗਾ। ਅਚਾਨਕ ਕਰਨ ਉਕਤ ਨੌਜਵਾਨਾਂ ਕੋਲੋਂ ਛੁੱਟ ਕੇ ਖੇਤਾਂ ਵੱਲ ਦੌੜ ਗਿਆ ਤੇ ਦੋਨੋਂ ਨੌਜਵਾਨਾਂ ਪੀੜਤ ਵਿਜੈ ਨੰਦਾ ਦੀ ਕਾਰ ਵੱਲ ਆ ਗਏ ਤੇ ਇਕ ਨੇ ਪਿਸਤੌਲ ‘ਚੋਂ ਹਵਾਈ ਫਾਇਰ ਕਰਕੇ ਪਿਸਤੌਲ ਪੀੜਤ ਤੇ ਤਾਣ ਦਿੱਤਾ ਤੇ ਫਿਰ ਪਿਸਤੌਲ ਦੀ ਮੁੱਠ ਪੀੜਤ ਦੇ ਸਿਰ ‘ਤੇ ਮਾਰ ਜ਼ਖਮੀ ਕਰ ਦਿੱਤਾ। ਉਨ੍ਹਾਂ ‘ਚੋਂ ਇਕ ਨੌਜਵਾਨ ਨੇ ਪੀੜਤ ਤੇ ਉਸ ਦੀ ਪਤਨੀ ਨੂੰ ਹਥਿਆਰ ਵਿਖਾ ਕਾਰ ‘ਚੋਂ ਬਾਹਰ ਕੱਢ ਕੇ ਕਾਰ ਖੋਹ ਕੇ ਫ਼ਰਾਰ ਹੋ ਗਿਆ ਤੇ ਦੂਜਾ ਨੌਜਵਾਨ ਮੰਗਲ ਆਪਣੀ ਸਕੂਟਰੀ ਤੇ ਫ਼ਰਾਰ ਹੋ ਗਿਆ। ਪੀੜਤ ਦੀ ਪਤਨੀ ਨੇ ਪਿੰਡ ਦੇ ਜਾਣਕਾਰ ਲੋਕਾਂ ਦੀ ਮਦਦ ਨਾਲ ਜ਼ਖਮੀ ਹਾਲਤ ‘ਚ ਵਿਜੈ ਨੰਦਾ ਨੂੰ ਸਰਕਾਰੀ ਹਸਪਤਾਲ ਟਾਂਡਾ ਪਹੁੰਚਾਇਆ, ਜਿੱਥੇ ਉਹ ਜੇਰੇ ਇਲਾਜ ਹਨ।
