ਪੰਜਾਬੀ ਆ ਗਏ ਓਏ…! ਪੰਜਾਬ ਅੱਗੇ ਲਖਨਊ ਨੇ ਵੀ ਟੇਕੇ ਗੋਡੇ, ਦਰਜ ਕੀਤੀ ਸੀਰੀਜ਼ ਦੀ 5ਵੀਂ ਜਿੱਤ
ਮੋਗਾ, ਜੇਐੱਨਐੱਨ: ਮੋਗਾ ’ਚ ਇਕ ਇਮੀਗ੍ਰੇਸ਼ਨ ਸੰਚਾਲਕ ਨੇ ਇਕ ਨਹੀਂ ਤਿੰਨ-ਤਿੰਨ ਵਿਆਹ ਕਰ ਲਏ। ਇਕ ਪਤਨੀ ਜਾਰਜੀਆ ’ਚ ਰਹਿੰਦੀ ਹੈ, ਦੂਜੀ ਸਿਟੀ ਬਿਊਟੀਫੁੱਲ ਚੰਡੀਗੜ੍ਹ ਤੇ ਤੀਜੀ ਆਪਣੇ ਨਾਲ ਮੋਗਾ ’ਚ। ਤਲਾਕ ਇਕ ਨਾਲ ਵੀ ਨਹੀਂ। ਦੂਜੀ ਪਤਨੀ ਨੂੰ ਪਤੀ ਦੀ ਧੋਖਾਧੜੀ ਦਾ ਪਤਾ ਲੱਗਿਆ ਤਾਂ ਉਸ ਨੇ ਪਤੀ ਖ਼ਿਲਾਫ਼ ਧੋਖਾਧੜੀ ਤੇ ਗਬਨ ਦੇ ਦੋਸ਼ ’ਚ ਕੇਸ ਦਰਜ ਕਰਵਾ ਦਿੱਤਾ, ਪਰ ਮੋਗਾ ਪੁਲਿਸ ਤਿੰਨ ਪਤਨੀਆਂ ਵਾਲੇ ਪਤੀ ’ਤੇ ਮੇਹਰਬਾਨ ਹੈ।
ਪੁਲਿਸ ਨੇ ਧੋਖਾਧੜੀ ਕਾਰਨ ਜਦੋਂ ਮੁਲਜ਼ਮ ਦਾ ਪਾਸਪੋਰਟ ਅਦਾਲਤ ਨੇ ਜ਼ਬਤ ਕਰ ਲਿਆ ਤਾਂ ਪੁਲਿਸ ਨੇ ਨਵੇਂ ਪਾਸਪੋਰਟ ਲਈ ਉਸ ਨੂੰ ਪੁਲਿਸ ਕਲੀਅਰੈਂਸ ਸਰਟੀਫਿਕੇਟ ਦੇ ਦਿੱਤਾ। ਇਸ ਦੇ ਆਧਾਰ ’ਤੇ ਨਵਾਂ ਪਾਸਪੋਰਟ ਵੀ ਬਣ ਗਿਆ। ਦੂਜੀ ਪਤਨੀ ਨੇ ਇਸ ਧੋਖਾਧੜੀ ਦਾ ਵੀ ਪਰਦਾਫਾਸ਼ ਕਰ ਦਿੱਤਾ ਤਾਂ ਥਾਣਾ ਸਿਟੀ1 ਪੁਲਿਸ ਨੇ ਮੁਲਜ਼ਮ ਪਤੀ ਖ਼ਿਲਾਫ਼ ਧੋਖਾਧੜੀ ਤੇ ਪਾਸੋਪਰਟ ਐਕਟ ’ਚ ਇਕ ਹੋਰ ਕੇਸ ਦਰਜ ਕਰ ਲਿਆ, ਪਰ ਆਪਣੇ ਹੀ ਥਾਣੇ ਦੇ ਉਸ ਪੁਲਿਸ ਮੁਲਾਜ਼ਮ ਨੂੰ ਬਚਾ ਲਿਆ ਜਿਸ ਨੇ ਮੁਲਜ਼ਮ ਪਤੀ ਦੀ ਪੁਲਿਸ ਵੈਰੀਫਿਕੇਸ਼ਨ ’ਚ ਕਲੀਨ ਚਿੱਟ ਦੇ ਦਿੱਤੀ ਸੀ
ਕੌਣ ਹੈ ਪਤਨੀਆਂ ਦਾ ਸ਼ੌਕੀਨ
ਮੋਗਾ ’ਚ ਇਮੀਗ੍ਰੇਸ਼ਨ ਸੈਂਟਰ ਤੇ ਜਗਰਾਓਂ ’ਚ ਮਾਲਵਾ ਫਾਇਨਾਂਸ ਕੰਪਨੀ ਚਲਾਉਣ ਵਾਲੇ ਮੋਗਾ ਦੇ ਵਾਰਡ ਨੰਬਰ 7 ਦੇ ਗੋਧੇਵਾਲਾ ਛੱਪੜ ਨੇੜੇ ਦਾ ਨਿਵਾਸੀ ਨਵੀਦਪ ਸਿੰਘ ਦਾ ਪਹਿਲਾ ਵਿਆਹ ਸੰਨ 2006 ’ਚ ਕਸਬਾ ਤਰਨਤਾਰਨ ਦੇ ਪਿੰਡ ਖੇੜਾ ਦੀ ਨਿਵਾਸੀ ਲੜਕੀ ਨਾਲ ਹੋਇਆ ਸੀ। ਛੇ ਸਾਲ ਬਾਅਦ ਹੀ ਨਵਦੀਪ ਸਿੰਘ ਨੇ ਉਸ ਨੂੰ ਤਲਾਕ ਦੇ ਦਿੱਤੇ ਬਿਨਾਂ ਚੰਡੀਗੜ੍ਹ ਦੀ ਇਕ ਲੜਕੀ ਨਾਲ ਦੂਜਾ ਵਿਆਹ ਸੰਨ 2012 ’ਚ ਰਚਾ ਲਈ। ਨਵਦੀਪ ਦੀ ਇਹ ਅਰੇਂਜ ਮੈਰਿਜ ਸੀ
ਇਸ ਦੌਰਾਨ, ਪਤੀ ਦੇ ਨਾਲ ਰਹਿੰਦੇ ਹੋਏ ਦੂਜੀ ਪਤਨੀ ਨੂੰ ਕੁਝ ਸ਼ੱਕ ਹੋਇਆ। ਉਸ ਨੇ ਆਪਣੇ ਪੱਧਰ ’ਤੇ ਪਤੀ ਦੀ ਛਾਣਬੀਨ ਕੀਤੀ ਤਾਂ ਨਵਦੀਪ ਚੌਕਸ ਹੋ ਗਿਆ ਅਤੇ ਉਹ ਦੂਜੀ ਪਤਨੀ ਨੂੰ ਲੈ ਕੇ ਜਾਰਜੀਆ ਚਲਾ ਗਿਆ। ਜਾਰਜੀਆ ’ਚ ਹੀ ਨਵਦੀਪ ਸਿੰਘ ਨੇ ਆਪਣੀ ਪਹਿਲੀ ਪਤਨੀ ਨੂੰ ਵੀ ਇਹ ਕਹਿ ਕੇ ਬੁਲਾ ਲਿਆ ਕਿ ਉਸ ਉਸ ਦੀ ਫੈਮਿਲੀ ਫਰੈਂਡ ਹੈ। ਪਹਿਲੀ ਪਤਨੀ ਜਾਰਜੀਆ ’ਚ ਨਵਦੀਪ ਸਿੰਘ ਦੀ ਪੂਜੀ ਪਤਨੀ ਦੇ ਨਾਲ ਹੀ ਰਹੀ।
ਥਾਣਾ ਸਿਟੀ 1 ’ਚ ਦਰਜ ਐੱਫਆਈਆਰ ਦੇ ਅਨੁਸਾਰ ਦੂਜੀ ਪਤਨੀ ਨੇ ਦੋਸ਼ ਲਾਇਆ ਕਿ ਨਵਦੀਪ ਸਿੰਘ ਨੇ ਆਪਣੇ ਬਿਜਨਸ ਲਈ ਉਸ ਤੋਂ ਪੰਜ ਲੱਖ ਰੁਪਏ ਦੀ ਮੰਗ ਕੀਤੀ ਸੀ, ਜੋ ਉਸ ਦੇ ਭਰਾ ਨੇ ਚੰਡੀਗੜ੍ਹ ਤੋਂ ਉਸ ਦੇ ਜਾਰਜੀਆ ਸਥਿਤ ਬੈਂਕ ਖ਼ਾਤੇ ’ਚ ਜਮ੍ਹਾ ਕਰਵਾ ਦਿੱਤੇ ਸਨ। ਬਾਅਦ ’ਚ ਸੰਨ 2014 ’ਚ ਨਵਦੀਪ ਸਿੰਘ ਤੇ ਉਸ ਦੀ ਦੂਜੀ ਪਤਨੀ ਵਾਪਸ ਮੋਗਾ ਆ ਗਏ
ਇੱਥੇ ਦੂਜੀ ਪਤਨੀ ਆਪਣੇ ਸਹੁਰੇ ਘਰ ਤਿੰਨ ਦਿਨ ਰਹੀ। ਇਸ ਦੌਰਾਨ ਉਸ ਨੂੰ ਪਹਿਲੀ ਪਤਨੀ ਦਾ ਆਧਾਰ ਕਾਰਡ ਮਿਲ ਗਿਆ, ਜਿਸ ’ਚ ਪਤੀ ਦਾ ਨਾਂ ਨਵਦੀਪ ਸਿੰਘ ਲਿਖਿਆ ਸੀ। ਇਸ ਨਾਲ ਦੂਜੀ ਪਤਨੀ ਨੂੰ ਸਭ ਕੁਝ ਸਪੱਸ਼ਟ ਹੋ ਗਿਆ। ਉਸ ਦਾ ਸ਼ੱਕ ਸਹੀ ਨਿਕਲਿਆ। ਦੋਵਾਂ ’ਚ ਝਗੜਾ ਹੋ ਗਿਆ। ਉਸ ਨੇ ਆਪਣੇ ਪਤੀ ਖ਼ਿਲਾਫ਼ ਚੰਡੀਗੜ੍ਹ ਦੇ ਥਾਣਾ ਸੈਕਟਰ 31 ’ਚ ਧੋਖਾਧੜੀ ਤੇ ਬਿਨਾਂ ਤਲਾਕ ਦੂਜਾ ਵਿਆਹ ਕਰਨ ਦੇ ਮਾਮਲੇ ’ਚ ਕੇਸ ਦਰਜ ਕਰਵਾ ਦਿੱਤਾ। ਇਸ ਕੇਸ ਦੇ ਸਿਲਸਿਲੇ ’ਚ ਜੇਐੱਮਆਈਸੀ ਚੰਡੀਗੜ੍ਹ ਮੀਨਾਕਸ਼ੀ ਗੁਪਤਾ ਨੇ ਮੁਲਜ਼ਮ ਨਵਦੀਪ ਸਿੰਘ ਦਾ ਪਾਸਪੋਰਟ 26 ਦਸੰਬਰ 2014 ਨੂੰ ਅਦਾਲਤ ’ਚ ਜਮ੍ਹਾ ਕਰਵਾ ਲਿਆ ਸੀ।
ਪਾਸਪੋਰਟ ਲਈ ਰਚੀ ਸਾਜ਼ਿਸ਼
ਪਾਸਪੋਰਟ ਅਦਾਲਤ ’ਚ ਜ਼ਬਤ ਹੋਦ ਤੋਂ ਬਾਅਦ ਨਵਦੀਪ ਸਿੰਘ ਨੇ ਜਗਰਾਓਂ ਦੇ ਸਾਂਝ ਕੇਂਦਰ ’ਚ ਪਾਸਪੋਰਟ ਗੁੰਮ ਹੋਣ ਦੀ ਰਿਪੋਰਟ ਦਰਜ ਕਰਵਾ ਦਿੱਤਾ। ਉਸੇ ਰਿਪੋਰਟ ਦੇ ਆਧਾਰ ’ਤੇ ਉਸ ਨੇ ਮੋਗਾ ’ਚ ਦੁਬਾਰਾ ਨਵੇਂ ਪਾਸਪੋਰਟ ਲਈ ਅਪਲਾਈ ਕਰ ਦਿੱਤਾ। ਪੁਲਿਸ ਨੇ ਪਾਸਪੋਰਟ ਦੀ ਪੁਲਿਸ ਵੈਰੀਫਿਕੇਸ਼ਨ ’ਚ ਮੁਲਜ਼ਮ ਨੂੰ ਕਲੀਨ ਚਿੱਟ ਦੇ ਦਿੱਤੀ, ਜਿਸ ਨਾਲ ਨਵਦੀਪ ਸਿੰਘ ਦਾ ਦੂਜਾ ਪਾਸਪੋਰਟ ਬਣ ਗਿਆ। ਇਸ ਦੌਰਾਨ, ਉਸ ਨੇ ਮਾਲੇਰਕੋਟਲਾ ਦੀ ਇਕ ਹੋਰ ਲੜਕੀ ਨਾਲ ਤੀਜਾ ਵਿਆਹ ਕਰ ਲਿਆ। ਗਲਤ ਸੂਚਨਾ ਦੇ ਆਧਾਰ ’ਤੇ ਨਵਾਂ ਪਾਸਪੋਰਟ ਬਣਵਾਉਣ ਤੇ ਤੀਜਾ ਵਿਆਹ ਕਰਵਾਉਣ ਦੇ ਮਾਮਲੇ ’ਚ ਦੂਜੀ ਪਤਨੀ ਨੇ ਹੁਣ ਮੋਗਾ ਦੇ ਥਾਣਾ ਸਿਟੀ 1 ’ਚ ਧੋਖਾਧੜੀ ਦਾ ਨਵਾਂ ਮਾਮਲਾ ਦਰਜ ਕਰਵਾ ਦਿੱਤਾ ਹੈ।
ਥਾਣਾ ਸਿਟੀ 1 ’ਚ ਤਾਇਨਾਤ ਐੱਸਆਈ ਬੱਗਾ ਸਿੰਘ ਨੇ ਦੱਸਿਆ ਕਿ ਸ਼ਿਕਾਇਤਕਰਤਾ ਨਵਦੀਪ ਸਿੰਘ ਦੀ ਦੂਜੀ ਪਤਨੀ ਚੰਡੀਗੜ੍ਹ ਦੇ ਸੈਕਟਰ 47 ਡੀ ’ਚ ਰਹਿੰਦੀ ਹੈ। ਉਸ ਨੇ ਐੱਸਐੱਸਪੀ ਨੂੰ ਸ਼ਿਕਾਇਤ ਦਿੱਤੀ ਸੀ, ਜਿਸ ’ਚ ਦੋਸ਼ ਲਾਇਆ ਸੀ ਕਿ ਨਵਦੀਪ ਸਿੰਘ ਦੇ ਖ਼ਿਲਾਫ਼ ਧਾਰਾ 406, 420, 495, 498 ਤਹਿਤ ਮਾਮਲਾ ਥਾਣਾ ਸੈਕਟਰ 31 ਚੰਡੀਗੜ੍ਹ ’ਚ ਦਰਜ ਸੀ। ਇਸੇ ਦੋਸ਼ ’ਚ ਉਸ ਦਾ ਪਾਸਪੋਰਟ ਚੰਡੀਗੜ੍ਹ ਦੀ ਅਦਾਲਤ ’ਚ ਜਮ੍ਹਾ ਹੈ, ਪਰ ਉਸ ਨੇ ਪਾਸਪੋਰਟ ਗੁੰਮ ਹੋਣ ਦੀ ਗਲਤ ਸੂਚਨਾ ਦੇ ਕੇ ਨਵਾਂ ਪਾਸਪੋਰਟ ਜਾਰੀ ਕਰਵਾ ਲਿਆ। ਸ਼ਿਕਾਇਤ ਦੀ ਜਾਂਚ ਤੋਂ ਬਾਅਦ ਪੁਲਿਸ ਨੇ ਮੁਲਾਜ਼ਮ ਨਵਦੀਪ ਸਿੰਘ ਖ਼ਿਲਾਫ਼ ਧੋਖਾਧੜੀ ਤੇ ਪਾਸਪੋਰਟ ਐਕਟਰ ’ਚ ਨਵਾਂ ਮਾਮਲਾ ਦਰਜ ਕਰ ਲਿਆ ਹੈ।
