ਲੁਧਿਆਣਾ : ਲੁਧਿਆਣਾ ‘ਚ ਸੈਂਟਰਲ ਜੇਲ੍ਹ (Ludhiana Central Jail) ‘ਚ ਪਿਛਲੇ ਦਿਨੀਂ ਕੈਦੀਆਂ ਵੱਲੋਂ ਸ਼ਰਾਬ ਤੇ ਹੁੱਕਾ ਪਾਰਟੀ ਕਰਨ ਦੇ ਮਾਮਲੇ ‘ਚ (Hookah party in Jail) ਅਸਿਟੈਂਟ ਜੇਲ੍ਹ ਸੁਪਰਡੈਂਟ, ਵਾਰਡਨ ਤੇ ਹੈੱਡ ਵਾਰਡਨ ਨੂੰ ਸਸਪੈਂਡ ਕਰ ਦਿੱਤਾ ਹੈ। ਵੀਡੀਓ ਦੇ ਮਾਮਲੇ ‘ਚ ਜੇਲ੍ਹ ਮੰਤਰੀ ਨੇ ਜਾਂਚ ਬਿਠਾਈ ਸੀ।
ਦੱਸ ਦੇਈਏ ਕਿ ਪਿਛਲੇ ਦਿਨੀਂ ਸੈਂਟਰਲ ਜੇਲ੍ਹ ਲੁਧਿਆਣਾ ‘ਚ ਗੈਂਗਸਟਰ ਨਿੱਕਾ ਜਟਾਨਾ ਤੇ ਉਸ ਦੇ ਸਾਥੀਆਂ ਨੇ ਜੇਲ੍ਹ ਅੰਦਰ ਇਕ ਪਾਰਟੀ ਰੱਖੀ ਸੀ, ਜਿੱਥੇ ਸ਼ਰਾਬ ਦੇ ਜਾਮ ਛਲਕਣ ਤੇ ਹੁੱਕਾ ਪੀਂਦੇ ਹੋਏ ਕੈਦੀਆਂ ਦੀ ਵੀਡੀਓ ਇੰਟਰਨੈੱਟ ਮੀਡੀਆ ‘ਤੇ ਵਾਇਰਲ ਹੋਈ ਸੀ ਤੇ ਉਨ੍ਹਾਂ ਕੋਲ ਇਕ ਐੱਲਈਡੀ (LED) ਵੀ ਚੱਲ ਰਹੀ ਸੀ ਤੇ ਹੁੱਕੇ ਦੇ ਕਸ਼ ਲਾਏ ਜਾ ਰਹੇ ਸਨ। ਜੇਲ੍ਹ ਦੇ ਹੀ ਦੂਜੇ ਕੈਦੀਆਂ ਨੇ ਇਸ ਦੀ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ (Social Media) ‘ਤੇ ਪਾ ਦਿੱਤੀ ਸੀ ਜਿਸ ਤੋਂ ਬਾਅਦ ਪੁਲਿਸ ਨੇ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਸੀ।
ਜੇਲ੍ਹ ਮੰਤਰੀ ਨੇ ਏਡੀਜੀਪੀ ਜੇਲ੍ਹ ਨੂੰ ਸੌਂਪੀ ਸੀ ਮਾਮਲੇ ਦੀ ਜਾਂਚ
ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਜੇਲ੍ਹ ਮੰਤਰੀ ਨੇ ਤੁਰੰਤ ਏਡੀਜੀਪੀ ਜੇਲ੍ਹ ਨੂੰ ਮਾਮਲੇ ਦੀ ਜਾਂਚ ਸੌਂਪੀ। ਜਿਸ ‘ਤੇ ਪਹਿਲਾਂ ਜੇਲ੍ਹ ਸੁਪਰਡੈਂਟ ਰਾਜੀਵ ਅਰੋੜਾ ਦਾ ਤਬਾਦਲਾ ਕਰ ਦਿੱਤਾ ਤੇ ਹੁਣ ਜਾਂਚ ਤੋਂ ਬਾਅਦ ਅਸਿਸਟੈਂਟ ਜੇਲ੍ਹ ਸੁਪਰਡੈਂਟ ਸਮੇਤ ਦੋ ਵਾਰਡਨ ਨੂੰ ਵੀ ਸਸਪੈਂਡ ਕਰ ਦਿੱਤਾ ਗਿਆ ਹੈ।
