ਮਾਂ ਨੂੰ ਨਸ਼ੇ ਦੀ ਦਵਾਈ ਖੁਵਾ ਕੇ ਕੀਤਾ ਬੇਹੋਸ਼, ਫਿਰ ਨੌਜਵਾਨ ਨਾਲ ਭੱਜੀ 14 ਸਾਲ ਦੀ ਕੁੜੀ

ਜਲੰਧਰ : ਥਾਣਾ ਪਤਾਰਾ ਦੀ ਹੱਦ ‘ਚ ਪੈਂਦੇ ਇਲਾਕੇ ‘ਚੋਂ 14 ਸਾਲਾ ਲੜਕੀ ਵਲੋਂ ਇਕ ਨੌਜਵਾਨ ਦੇ ਝਾਂਸੇ ‘ਚ ਆ ਕੇ ਆਪਣੀ ਮਾਂ ਨੂੰ ਖਾਣੇ ‘ਚ ਨਸ਼ੀਲਾ ਪਦਾਰਥ ਮਿਲਾ ਕੇ ਖੁਆ ਦਿੱਤਾ ਤੇ ਰਾਤ ਵੇਲੇ ਆਪਣੀ ਮਾਂ ਦਾ ਮੋਬਾਈਲ ਫੋਨ ਚੁੱਕ ਕੇ ਉਸ ਨੌਜਵਾਨ ਨਾਲ ਫਰਾਰ ਹੋ ਗਈ। ਇਸ ਗੱਲ ਦਾ ਪਤਾ ਉਸ ਵੇਲੇ ਲੱਗਿਆ ਜਦੋਂ ਸਵੇਰੇ ਮਾਂ ਦੀ ਨੀਂਦ ਖੁੱਲ੍ਹੀ ਤਾਂ ਉਸ ਦੀ ਨਾਬਾਲਿਗ ਲੜਕੀ ਕਮਰੇ ‘ਚ ਨਹੀਂ ਸੀ ਤੇ ਨਾਲ ਹੀ ਉਸ ਦਾ ਮੋਬਾਈਲ ਫੋਨ ਵੀ ਗਾਇਬ ਸੀ। ਉਸ ਨੇ ਤੁਰੰਤ ਆਪਣੇ ਪਤੀ ਨੂੰ ਇਸ ਬਾਰੇ ਦੱਸਿਆ। ਪਿਤਾ ਦੀ ਸ਼ਿਕਾਇਤ ‘ਤੇ ਪੁਲਿਸ ਨੇ ਇਕ ਦੋਸ਼ੀ ਖ਼ਿਲਾਫ ਨਾਬਾਲਗ ਨੂੰ ਅਗਵਾ ਕਰਨ ਦਾ ਕੇਸ ਦਰਜ ਕੀਤਾ ਹੈ

ਪੁਲਿਸ ਨੂੰ ਦਿੱਤੀ ਗਈ ਸ਼ਿਕਾਇਤ ‘ਚ ਲੜਕੀ ਦੇ ਪਿਤਾ ਨੇ ਦੱਸਿਆ ਕਿ ਰਾਤ ਵੇਲੇ ਦੁਕਾਨ ਦਾ ਕੰਮ ਖ਼ਤਮ ਹੋਣ ਤੋਂ ਬਾਅਦ ਉਸ ਦੀ ਪਤਨੀ ਤੇ 14 ਸਾਲ ਦੀ ਬੇਟੀ ਦੁਕਾਨ ‘ਚ ਹੀ ਬਣੇ ਕਮਰੇ ‘ਚ ਸੌਂ ਗਈ ਸੀ। ਜਦੋਂ ਸਵੇਰੇ ਲੜਕੀ ਦੀ ਮਾਂ ਉੱਠੀ ਤਾਂ ਲੜਕੀ ਕਮਰੇ ‘ਚ ਨਹੀਂ ਸੀ। ਉਸ ਨੇ ਸੋਚਿਆ ਕਿ ਲੜਕੀ ਉੱਠ ਕੇ ਘਰ ਚਲੀ ਗਈ ਹੋਣੀ ਹੈ। ਇਹ ਸੋਚ ਕੇ ਉਹ ਆਪਣੀ ਦੁਕਾਨ ਤੋਂ ਘਰ ਵਾਪਸ ਆ ਗਈ ਪਰ ਜਦ ਉਸ ਨੇ ਲੜਕੀ ਨੂੰ ਘਰ ਨਹੀਂ ਦੇਖਿਆ ਤਾਂ ਦੋਵਾਂ ਨੇ ਉਸ ਨੂੰ ਲੱਭਣ ਦੀ ਕੋਸ਼ਿਸ਼ ਕੀਤੀ। ਲੜਕੀ ਦੀ ਮਾਂ ਨੇ ਦੱਸਿਆ ਕਿ ਜਦ ਦੋਹਾਂ ਨੇ ਖਾਣਾ ਖਾਧਾ ਤਾਂ ਉਸ ਤੋਂ ਬਾਅਦ ਉਸ ਨੂੰ ਬੇਹੋਸ਼ੀ ਜਿਹੀ ਲੱਗ ਰਹੀ ਸੀ ਜਿਸ ਕਾਰਨ ਉਸ ਨੂੰ ਪਤਾ ਹੀ ਨਾ ਲੱਗਾ ਕਿ ਲੜਕੀ ਕਿਸ ਵੇਲੇ ਉੱਠ ਕੇ ਚਲੀ ਗਈ ਹੈ। ਜਦੋਂ ਉਸ ਨੇ ਸਵੇਰੇ 7 ਵਜੇ ਦੇ ਕਰੀਬ ਅੱਖਾਂ ਖੋਲ੍ਹੀਆਂ, ਲੜਕੀ ਕਮਰੇ ਵਿਚ ਨਹੀਂ ਸੀ। ਜਿਸ ਤੋਂ ਬਾਅਦ ਗੁਆਂਢੀਆਂ ਨੂੰ ਪੁੱਛਿਆ ਪਰ ਕੁਝ ਪਤਾ ਨਹੀਂ ਚਲਿਆ। ਫਿਰ ਨੇੜੇ ਦੇ ਰਿਸ਼ਤੇਦਾਰਾਂ ਤੋਂ ਵੀ ਪੁੱਛਿਆ ਪਰ ਲੜਕੀ ਨਹੀਂ ਮਿਲੀ। ਲੜਕੀ ਦੇ ਪਿਤਾ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸ਼ੱਕ ਹੈ ਕਿ ਭਜਨ ਮਨੀ ਨਾਮਕ ਨੌਜਵਾਨ ਵਿਆਹ ਦਾ ਝਾਂਸਾ ਦੇ ਕੇ ਉਨ੍ਹਾਂ ਦੀ ਲੜਕੀ ਨੂੰ ਲੈ ਗਿਆ ਸੀ। ਪੁਲਿਸ ਨੇ ਨਾਬਾਲਗਾ ਦੇ ਪਿਤਾ ਦੇ ਬਿਆਨਾਂ ‘ਤੇ ਕੇਸ ਦਰਜ ਕਰਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਥਾਣਾ ਪਤਾਰਾ ਦੇ ਮੁਖੀ ਨੇ ਦੱਸਿਆ ਕਿ ਉਨ੍ਹਾਂ ਨੇ ਦੋਵਾਂ ਦੇ ਮੋਬਾਈਲ ਤੋਂ ਉਨ੍ਹਾਂ ਦੀ ਲੋਕੇਸ਼ਨ ਟਰੇਸ ਕਰਨੀ ਸ਼ੁਰੂ ਕਰ ਦਿੱਤੀ ਹੈ। ਉਮੀਦ ਹੈ ਕਿ ਜਲਦ ਹੀ ਦੋਵੇਂ ਪੁਲਸ ਵੱਲੋਂ ਕਾਬੂ ਕਰ ਲਏ ਜਾਣਗੇ।