ਜਗਰਾਓਂ : 11 ਦਿਨ ਪਹਿਲਾਂ 7 ਸਾਲਾਂ ਬੱਚੀ ਨੂੰ ਲੂਡੋ ਖੇਡਣ ਦੇ ਬਹਾਨੇ 28 ਸਾਲਾਂ ਗੁਆਂਢੀ ਵੱਲੋਂ ਹੀ ਘਰ ਲੈ ਜਾ ਕੇ ਉਸ ਨਾਲ ਬਲਾਤਕਾਰ ਕਰਨ ਤੋਂ ਬਾਅਦ ਫ਼ਰਾਰ ਹੋਏ ਇਸ ਵਿਅਕਤੀ ਨੂੰ ਪੁਲਿਸ ਨੇ ਗ੍ਰਿਫਤਾਰ ਕਰ ਲਿਆ। ਮੰਗਲਵਾਰ ਨੂੰ ਐੱਸਐੱਸਪੀ ਚਰਨਜੀਤ ਸਿੰਘ ਸੋਹਲ ਵੱਲੋਂ ਪ੍ਰੈਸ ਕਾਨਫਰੰਸ ਦੌਰਾਨ ਦੱਸਿਆ ਕਿ ਬੀਤੀ 9 ਜੁਲਾਈ ਨੂੰ ਰੂਮੀ ਪਿੰਡ ਦੀ 7 ਸਾਲਾਂ ਮਾਸੂਮ ਬੱਚੀ ਨੂੰ ਗੁਆਂਢੀ 28 ਸਾਲਾਂ ਕਰਮਜੀਤ ਸਿੰਘ ਉਰਫ ਕੰਮਾ ਪੁੱਤਰ ਸ਼ਾਮ ਸਿੰਘ ਲੂਡੋ ਖੇਡਣ ਦੇ ਬਹਾਨੇ ਆਪਣੇ ਘਰ ਲੈ ਗਿਆ, ਜਿਥੇ ਉਸ ਨੇ ਬੱਚੀ ਨੂੰ ਆਪਣੀ ਹਵਸ ਦਾ ਸ਼ਿਕਾਰ ਬਣਾਇਆ। ਬੱਚੀ ਵੱਲੋਂ ਪਰਿਵਾਰ ਨੂੰ ਘਟਨਾ ਦੀ ਜਾਣਕਾਰੀ ਦੇਣ ਦੀ ਭਣਕ ਲੱਗਦੇ ਹੀ ਕੰਮਾ ਘਰੋਂ ਫਰਾਰ ਹੋ ਗਿਆ। ਜਿਸ ਦੇ ਚੱਲਦਿਆਂ ਉਨ੍ਹਾਂ ਵੱਲੋਂ ਐਸਪੀ ਬਲਵਿੰਦਰ ਸਿੰਘ, ਡੀਐਸਪੀ ਜਤਿੰਦਰਜੀਤ ਸਿੰਘ, ਥਾਣਾ ਸਦਰ ਦੇ ਐਸਐਚਓ ਜਸਪਾਲ ਸਿੰਘ, ਚੌਂਕੀ ਇੰਚਾਰਜ ਚੌਂਕੀਮਾਨ ਸ਼ਰਨਜੀਤ ਸਿੰਘ ਤੇ ਹੌਲਦਾਰ ਸੁਖਦੇਵ ਸਿੰਘ ਦੀ ਅਗਵਾਈ ਵਿਚ ਇਕ ਟੀਮ ਦਾ ਗਠਨ ਕੀਤਾ। ਇਸ ਟੀਮ ਨੇ ਬਲਾਤਕਾਰ ਕਰਨ ਵਾਲੇ ਕੰਮਾ ਦੀ ਗ੍ਰਿਫਤਾਰੀ ਲਈ ਉਸ ਦੇ ਅਨੇਕਾਂ ਠਿਕਾਣਿਆਂ ’ਤੇ ਛਾਪਾਮਾਰੀ ਜਾਰੀ ਰੱਖੀ। ਅੱਜ ਟੀਮ ਨੂੰ ਸੂਚਨਾ ਮਿਲੀ ਕਿ ਕੰਮਾ ਢੋਲਣ ਬੱਸ ਸਟੈਂਡ ਕਿਸੇ ਵਾਹਨ ਦਾ ਇੰਤਜ਼ਾਰ ਕਰ ਰਿਹਾ ਹੈ, ਜਿਥੇ ਉਸ ਨੇ ਆਪਣੇ ਘਰੋਂ ਜ਼ਰੂਰੀ ਵਸਤਾਂ ਮੰਗਵਾ ਕੇ ਕਿਧਰੇ ਦੂਰ ਜਾਣ ਦਾ ਪਲਾਨ ਬਣਾਇਆ ਸੀ। ਜਿਸ ‘ਤੇ ਟੀਮ ਨੇ ਉਸ ਨੂੰ ਕਾਬੂ ਕਰ ਲਿਆ।
