ਲੁਧਿਆਣਾ : ਕ੍ਰਾਈਮ ਬ੍ਰਾਂਚ ਲੁਧਿਆਣਾ ਦੀ ਟੀਮ ਨੇ ਇਕ ਅਜਿਹੇ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ ਜੋ ਆਧਾਰ ਕਾਰਡ ਬਣਵਾਉਣ ਤੇ ਉਨ੍ਹਾਂ ਦੀ ਸੋਧ ਕਰਨ ਲਈ ਫ਼ਰਜ਼ੀ ਸੈਂਟਰ ਚਲਾ ਕੇ ਉਥੇ ਫ਼ਰਜ਼ੀ ਆਧਾਰ ਕਾਰਡ ਬਣਾ ਰਹੇ ਸਨ
ਪੁਲਿਸ ਮੁਤਾਬਕ ਗ੍ਰਿਫਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਪਛਾਣ ਨਿਊ ਸੁਭਾਸ਼ ਨਗਰ ਦੇ ਰਹਿਣ ਵਾਲੇ ਰਾਜਕੁਮਾਰ ਉਰਫ ਰਾਜ, ਤਿਲਕ ਨਗਰ ਰਾਹੋਂ ਰੋਡ ਦੇ ਵਾਸੀ ਵਿਨੋਦ ਕੁਮਾਰ ਉਰਫ ਭੱਲਾ ਤੇ ਪਿੰਡ ਬਾਜੜਾ ਕਲੋਨੀ ਮੇਹਰਬਾਨ ਦੇ ਰਹਿਣ ਵਾਲੇ ਰਾਜ ਕੁਮਾਰ ਉਰਫ ਸੰਨੀ ਵਜੋਂ ਹੋਈ ਹੈ। ਮੁਲਜ਼ਮਾਂ ਦਾ ਚੌਥਾ ਸਾਥੀ ਹਰਜਾਪ ਨਗਰ ਮੂੰਡੀਆਂ ਕਲਾਂ ਦਾ ਰਹਿਣ ਵਾਲਾ ਕੁਲਦੀਪ ਕੁਮਾਰ ਫ਼ਰਾਰ ਹੋ ਗਿਆ।
ਪੱਤਰਕਾਰ ਨੂੰ ਜਾਣਕਾਰੀ ਦਿੰਦਿਆਂ ਡੀਸੀਪੀ ਕ੍ਰਾਈਮ ਸਿਮਰਤਪਾਲ ਸਿੰਘ ਢੀਂਡਸਾ ਨੇ ਦੱਸਿਆ ਕਿ ਕ੍ਰਾਈਮ ਬ੍ਰਾਂਚ ਦੀ ਟੀਮ ਨੂੰ ਜਾਣਕਾਰੀ ਮਿਲੀ ਕਿ ਸਾਰੇ ਮੁਲਜ਼ਮ ਤਿਲਕ ਨਗਰ ਇਲਾਕੇ ਵਿਚ ਪੈਂਦੇ ਅਬੀ ਸਟੂਡੀਓ ਵਿੱਚ ਫ਼ਰਜ਼ੀ ਆਧਾਰ ਕਾਰਡ ਬਣਾਉਣ ਦਾ ਕਾਲਾ ਕਾਰੋਬਾਰ ਕਰ ਰਹੇ ਹਨ। ਮੁਲਜ਼ਮ ਭੋਲੇ ਭਾਲੇ ਲੋਕਾਂ ਨੂੰ ਤੁਰੰਤ ਆਧਾਰ ਕਾਰਡ ਬਣਾਉਣ ਦਾ ਝਾਂਸਾ ਦੇ ਕੇ ਪੈਸੇ ਠੱਗ ਲੈਂਦੇ ਸਨ। ਸੂਚਨਾ ਤੋਂ ਬਾਅਦ ਪੁਲਿਸ ਨੇ ਅਭੀ ਸਟੂਡੀਓ ਵਿਚ ਛਾਪਾਮਾਰੀ ਕਰਕੇ ਮੁਲਜ਼ਮ ਰਾਜ ਕੁਮਾਰ, ਵਿਨੋਦ ਕੁਮਾਰ ਅਤੇ ਰਾਜ ਕੁਮਾਰ ਉਰਫ ਸਨੀ ਨੂੰ ਗ੍ਰਿਫਤਾਰ ਕੀਤਾ। ਪੁਲਿਸ ਮੁਲਜ਼ਮਾਂ ਦੇ ਚੌਥੇ ਸਾਥੀ ਕੁਲਦੀਪ ਕੁਮਾਰ ਦੀ ਤਲਾਸ਼ ਕਰ ਰਹੀ ਹੈ। ਕ੍ਰਾਈਮ ਬ੍ਰਾਂਚ ਦੀ ਟੀਮ ਨੇ ਮੌਕੇ ਤੋਂ ਤਿੰਨ ਲੈਪਟਾਪ, ਫਿੰਗਰ ਪਿ੍ੰਟ ਸਕੈਨਰ, ਮਸ਼ੀਨ, ਕਈ ਪਿ੍ੰਟਰ, ਵੱਖ ਵੱਖ ਨਾਮਾਂ ਦੇ 16 ਆਧਾਰ ਕਾਰਡ, 5 ਪੈਨ ਕਾਰਡ, 5 ਵੋਟਰ ਕਾਰਡ, 9 ਡੰਮੀ ਫਿੰਗਰਪਿ੍ੰਟ ਦੇ ਛਾਪੇ ਫੈਵੀਕੋਲ ਵਾਲੇ ਅਤੇ 36 ਸਰਟੀਫਿਕੇਟ ਆਧਾਰ ਕਾਰਡ ਲਈ ਭਰੇ ਹੋਏ ਫਾਰਮ ਬਰਾਮਦ ਕੀਤੇ ਹਨ
ਫ਼ਰਜ਼ੀ ਵਿਧਾਇਕ ਦੀ ਫਰਜ਼ੀ ਮੋਹਰ ਵੀ ਬਰਾਮਦ
ਕਰਾਈਮ ਬ੍ਰਾਂਚ ਦੀ ਟੀਮ ਨੇ ਮੁਲਜ਼ਮਾਂ ਦੇ ਕਬਜ਼ੇ ’ਚੋਂ ਹਰੀਸ਼ ਪੁਸ਼ਕਰ ਨਾਮ ਦੇ ਫ਼ਰਜ਼ੀ ਐਮਐਲਏ ਦੀ ਫ਼ਰਜ਼ੀ ਮੋਹਰ ਵੀ ਬਰਾਮਦ ਕੀਤੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਚੌਥੇ ਮੁਲਜਮ ਦੇ ਫੜੇ ਜਾਣ ਤੋਂ ਬਾਅਦ ਹੋਰ ਖੁਲਾਸੇ ਹੋਣਗੇ।
ਇੰਝ ਬਣਾਉਂਦੇ ਸਨ ਲੋਕਾਂ ਨੂੰ ਠੱਗੀ ਦਾ ਸ਼ਿਕਾਰ
ਸ਼ਾਤਰ ਗਿਰੋਹ ਭੋਲੇ ਭਾਲੇ ਲੋਕਾਂ ਨੂੰ ਆਧਾਰ ਕਾਰਡ ਅਤੇ ਹੋਰ ਪਰੂਫ ਤਿਆਰ ਕਰਵਾਉਣ ਲਈ ਉਨ੍ਹਾਂ ਕੋਲੋ ਰਕਮ ਲੈਂਦਾ ਅਤੇ ਡਿਪਟੀ ਕਮਿਸ਼ਨਰ ਡੁਬਰੀ ਅਸਾਮ ਦੀ ਵੈਬਸਾਈਟ ’ਤੇ ਫਾਰਮ ਭਰ ਕੇ ਜਾਅਲੀ ਦਸਤਾਵੇਜ਼ ਤਿਆਰ ਕਰਕੇ, ਦਸਤਾਵੇਜ਼ਾਂ ’ਤੇ ਫਰਜੀ ਐਮਐਲਏ ਹਰੀਸ਼ ਪੁਸ਼ਕਰ ਦੀ ਜਾਅਲੀ ਮੋਹਰ ਲਗਾ ਦਿੰਦੇ ਸਨ।
ਗੈਰ ਕਾਨੂੰਨੀ ਤਰੀਕੇ ਨਾਲ ਚਲਾ ਰਹੇ ਸਨ ਆਈਡੀ
ਪੁਲਿਸ ਮੁਤਾਬਕ ਇਹ ਆਈ ਡੀ ਅਸਾਮ ਦੇ ਡੁਬਰੀ ਇਲਾਕੇ ਲਈ ਤਿਆਰ ਕੀਤੀ ਗਈ ਸੀ, ਇਸ ਦਾ ਇਸਤੇਮਾਲ ਵੀ ਉਥੇ ਹੀ ਹੋਣਾ ਸੀ ਪਰ ਮੁਲਜ਼ਮ ਗੈਰਕਾਨੂੰਨੀ ਤਰੀਕੇ ਨਾਲ ਰਾਹੋਂ ਰੋਡ ਦੇ ਤਿਲਕ ਨਗਰ ਇਲਾਕੇ ਵਿੱਚ ਪੈਂਦੇ ਅਭੀ ਸਟੂਡੀਓ ਵਿੱਚ ਇਸਤੇਮਾਲ ਕਰ ਰਹੇ ਸਨ।
