ਜੇਐੱਨਐੱਨ, ਰਿਕਾਂਗਪੀਓ : Landslide in Kinnaur : ਕਿੰਨੌਰ ਦੇ ਨਿਗੁਲਸਰੀ ‘ਚ ਨੈਸ਼ਨਲ ਹਾਈਵੇ ਪੰਜ ‘ਤੇ ਇਕ ਪਹਾੜ ਖਿਸਕ ਗਿਆ ਜਿਸ ਦੇ ਹੇਠਾਂ HRTC ਦੀ ਯਾਤਰੀਆਂ ਨਾਲ ਭਰੀ ਬੱਸ ਸਣੇ 6 ਵਾਹਨ ਮਲਬੇ ਹੇਠਾਂ ਦੱਬੇ ਗਏ। ਦੱਸਿਆ ਜਾ ਰਿਹਾ ਹੈ ਕਿ ਬੱਸ ਹਰਿਦੁਆਰ ਜਾ ਰਹੀ ਸੀ ਤੇ ਇਸ ਵਿਚ 35 ਦੇ ਕਰੀਬ ਯਾਤਰੀ ਸਵਾਰ ਸਨ। ਜ਼ਿਲ੍ਹਾ ਪ੍ਰਸ਼ਾਸਨ ਸਮੇਤ ਹੋਰ ਅਧਿਕਾਰੀ ਘਟਨਾ ਸਥਾਨ ‘ਤੇ ਪਹੁੰਚ ਗਏ ਹਨ। ਡੀਐੱਸਪੀ ਭਾਵਾਨਗਰ ਰਾਜੂ ਮੁਤਾਬਕ ਰਿਕਾਂਗਪੀਓ ਤੋਂ ਹਰਿਦੁਆਰ ਜਾ ਰਹੀ ਹਿਮਾਚਲ ਟਰਾਂਸਪੋਰਟ ਨਿਗਮ ਦੀ ਬੱਸ ਦਾ ਡਰਾਈਵਰ ਹੀ ਬਚਿਆ ਹੈ। ਬਾਕੀ ਸਾਰੇ ਮਲਬੇ ਹੇਠਾਂ ਦੱਬੇ ਹੋਏ ਹਨ। ਡਰਾਈਵਰ ਮੁਤਾਬਕ ਬਸ ਵਿਚ 30 ਤੋਂ 35 ਯਾਤਰੀ ਸਵਾਰ ਸਨ। ਦੱਸਿਆ ਜਾ ਰਿਹਾ ਹੈ ਕਿ ਬੱਸ ਸਮੇਤ ਇਕ ਟਰੱਕ ਤੇ ਪੰਜ ਤੋਂ ਛੇ ਛੋਟੀਆਂ ਗੱਡੀਆਂ ਵੀ ਮਲਬੇ ਦੀ ਲਪੇਟ ‘ਚ ਆ ਹਈਆਂ ਹਨ।
ਛੋਟੇ ਵਾਹਨਾਂ ‘ਚ ਵੀ ਕਈ ਲੋਕ ਸਵਾਰ ਸਨ, ਅਜਿਹੇ ਵਿਚ ਕਿਆਸ ਲਗਾਏ ਜਾ ਰਹੇ ਹਨ ਕਿ 50 ਦੇ ਕਰੀਬ ਲੋਕ ਮਲਬੇ ਦੀ ਲਪੇਟ ‘ਚ ਆ ਗਏ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਸੜਕ ‘ਤੇ ਭਾਰੀ ਮਲਬਾ ਡਿੱਗਣ ਕਾਰਨ ਪ੍ਰਸ਼ਾਸਨ ਤੇ ਬਚਾਅ ਟੀਮ ਨੂੰ ਮੌਕੇ ‘ਤੇ ਪਹੁੰਚਣ ਲਈ ਕਾਫੀ ਮੁਸ਼ੱਕਤ ਕਰਨੀ ਪੈ ਰਹੀ ਹੈ।
ਬੀਤੇ ਦਿਨੀਂ ਕਿੰਨੌਰ ‘ਚ ਪਹਾੜੀ ਤੋਂ ਜ਼ਮੀਨ ਖਿਸਕੀ ਹੋਈ ਸੀ ਜਿਸ ਵਿਚ ਸੈਲਾਨੀਆਂ ਦਾ ਵਾਹਨ ਮਲਬੇ ਦੀ ਲਪੇਟ ‘ਚ ਆ ਗਿਆ ਸੀ ਤੇ ਨੌਂ ਲੋਕਾਂ ਦੀ ਮੌਤ ਹੋ ਗਈ ਸੀ। ਹੁਣ ਇਕ ਵਾਰ ਫਿਰ ਵੱਡੇ ਹਾਦਸੇ ਨੇ ਪੂਰੇ ਹਿਮਾਚਲ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ।
