ਗੋਬਿੰਦਗੜ੍ਹ : ਭਾਦਲਾ ਨੇੜੇ ਪੰਜਾਬ ਸਟੀਲ ਮਿੱਲ ਦੀ ਭੱਠੀ ‘ਚ ਹੋਏ ਧਮਾਕੇ ਨਾਲ 10 ਤੋਂ ਜ਼ਿਆਦਾ ਮਜ਼ਦੂਰ ਝੁਲਸ ਗਏ। ਇਨ੍ਹਾਂ ਵਿਚੋਂ 5 ਮਜ਼ਦੂਰ 100 ਫ਼ੀਸਦ ਝੁਲਸ ਗਏ ਹਨ। ਬਾਕੀ 50 ਤੋਂ 70 ਫ਼ੀਸਦ ਤਕ ਝੁਲਸੇ ਦੱਸੇ ਜਾ ਰਹੇ ਹਨ। ਧਮਾਕਾ ਵੀਰਵਾਰ ਦੇਰ ਰਾਤ ਹੋਇਆ। ਧਮਾਕੇ ‘ਚ ਜ਼ਖ਼ਮੀ ਹੋਏ ਸਾਰੇ ਲੋਕਾਂ ਨੂੰ ਡੀਐੱਮਸੀ ਹਸਪਤਾਲ ਲੁਧਿਆਣਾ ਭਰਤੀ ਕਰਵਾਇਆ ਗਿਆ ਜਿੱਥੇ ਪੰਜ ਮਜ਼ਦੂਰਾਂ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਮਿਲ ਅੰਦਰ ਭੱਠੀ ‘ਚ ਜਦੋਂ ਮਾਲ ਪਿਘਲਾਇਆ ਜਾ ਰਿਹਾ ਸੀ ਤਾਂ ਇਸੇ ਦੌਰਾਰਨ ਭੱਠੀ ‘ਚ ਕੋਈ ਅਜਿਹੀ ਚੀਜ਼ ਚਲੀ ਗਈ ਜਿਸ ਨਾਲ ਧਮਾਕਾ ਹੋਇਆ ਤੇ ਗਰਮ ਮਾਲ ਉੱਥੇ ਕੰਮ ਕਰ ਰਹੇ ਮਜ਼ਦੂਰਾਂ ਉੱਪਰ ਡਿੱਗ ਗਿਆ। ਇਸ ਕਾਰਨ ਮਿਲ ‘ਚ ਹਫੜਾ-ਦਫੜੀ ਮਚ ਗਈ। ਝੁਲਸੇ ਮਜ਼ਦੂਰ ਜ਼ਮੀਨ ‘ਤੇ ਤੜਫ ਰਹੇ ਸਨ। ਇਨ੍ਹਾਂ ਵਿਚੋਂ ਕੁਝ ਮਜ਼ਦੂਰਾਂ ਨੂੰ ਸਿੱਧੇ ਡੀਐੱਮਸੀ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ। 7 ਮਜ਼ਦੂਰਾਂ ਨੂੰ ਸਿਵਲ ਹਸਪਤਾਲ ਖੰਨਾ ‘ਚ ਦਾਖ਼ਲ ਕਰਵਾਇਆ ਗਿਆ। ਇਨ੍ਹਾਂ ਨੂੰ ਫਸਟ ਏਡ ਦੇਣ ਤੋਂ ਬਾਅਦ ਮਾਲਕਾਂ ਦੇ ਕਹਿਣ ‘ਤੇ ਡੀਐੱਮਸੀ ਰੈਫਰ ਕਰ ਦਿੱਤਾ ਗਿਆ। ਡਾਕਟਰ ਆਕਾਸ਼ ਗੋਇਲ ਨੇ ਦੱਸਿਆ ਕਿ ਪੰਜ ਮਜ਼ਦੂਰ ਤਾਂ 100 ਫੀਸਦ ਤਕ ਝੁਲਸ ਚੁੱਕੇ ਸਨ। ਬਾਕੀ 50 ਤੋਂ 70 ਫ਼ੀਸਦ ਝੁਲਸੇ ਹਨ। ਹਾਲਤ ਕਾਫੀ ਨਾਜ਼ੁਕ ਬਣੀ ਹੋਈ ਹੈ। ਉਨ੍ਹਾਂ ਫਸਟ ਏਡ ਦੇ ਕੇ ਵੀ ਸਾਰਿਆਂ ਨੂੰ ਰੈਫਰ ਕਰ ਦਿੱਤਾ।
ਕਿੱਥੇ ਹੋਈ ਲਾਪਰਵਾਹੀ, ਜਾਂਚ ਕਰ ਰਹੇ ਹਨ- ਐੱਸਪੀ
ਫ਼ਤਹਿਗੜ੍ਹ ਸਾਹਿਬ ਦੇ ਐੱਸਪੀ (ਆਈ) ਜਗਜੀਤ ਸਿੰਘ ਨੇ ਕਿਹਾ ਕਿ ਕਿੱਥੇ ਲਾਪਰਵਾਹੀ ਹੋਈ ਹੈ, ਇਸ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਪੁਲਿਸ ਦੇ ਨਾਲ ਤਕਨੀਕੀ ਟੀਮ ਨੂੰ ਵੀ ਮੌਕੇ ‘ਤੇ ਭੇਜਿਆ ਗਿਆ ਹੈ। ਜ਼ਖ਼ਮੀਆਂ ਦੇ ਬਿਆਨ ਲੈਣ ਵੀ ਇਕ ਟੀਮ ਡੀਐੱਮਸੀ ਗਈ ਹੈ ਜਿਸ ਦਾ ਵੀ ਕਸੂਰ ਹੋਵੇਗਾ, ਉਸ ਦੇ ਖਿਲਾਫ਼ ਕਾਰਵਾਈ ਕਰਾਂਗੇ।
