ਖੰਨਾ : ਰਿਵਾਲਵਰ ਦੀ ਨੋਕ ’ਤੇ ਲੁੱਟ ਖੋਹ ਕਰਨ ਵਾਲੇ ਚਾਰ ਮੁਲਜ਼ਮਾਂ ਨੂੰ ਪੁਲਿਸ ਵੱਲੋਂ ਕਾਬੂ ਕਰਨ ਦਾ ਦਾਅਵਾ ਕੀਤਾ ਗਿਆ ਹੈ ਜਿਨ੍ਹਾਂ ਤੋਂ ਪੁਲਿਸ ਨੇ 3,60,000/- ਰੁਪਏ ਅਤੇ ਵਾਰਦਾਤ ਵਿੱਚ ਵਰਤੀ ਗਈ ਗੱਡੀ ਵੀ ਬਰਾਮਦ ਕੀਤੀ ਹੈ।
ਐੱਸਪੀ (ਆਈ) ਮਨਪ੍ਰੀਤ ਸਿੰਘ ਨੇ ਦੱਸਿਆ ਕਿ 3 ਅਗਸਤ ਨੂੰ ਕੁਝ ਵਿਅਕਤੀਆਂ ਵੱਲੋਂਨੀਰਜ ਕੁਮਾਰ ਪੁੱਤਰ ਓਮ ਪ੍ਰਕਾਸ਼ ਸ਼ਰਮਾ ਵਾਸੀ ਪਿੰਡ ਸਹਿਜੋਵਾਲ ਜ਼ਿਲ੍ਹਾ ਰੋਪੜ ਤੋਂ 16,94,000 ਦੀ ਰਿਵਾਲਵਰ ਦੀ ਨੋਕ ’ਤੇ ਲੁੱਟ ਖੋਹ ਕੀਤੀ ਸੀ।
ਨੀਰਜ ਕੁਮਾਰ ਨੂੰ ਪੰਜਾਬੀ ਢਾਬਾ ਲਾਗੇ ਗੜੀ ਪੁਲ ਕੋਲ ਜਾ ਰਿਹਾ ਸੀ ਤਾਂ ਮੁਲਜ਼ਮਾਂ ਨੇ ਉਸਦੀ ਘੇਰ ਕੇ ਰਿਵਾਲਵਰ ਦੀ ਨੋਕ ’ਤੇ ਕੁੱਲ 16,94,000 ਰੁਪਏ ਨਕਦੀ, ਮੋਬਾਈਲ ਫੋਨ, ਪਰਸ ਤੇ ਹੋਰ ਕਾਗਜਾਤ ਖੋਹ ਕੇ ਆਪਣੀ ਗੱਡੀ ’ਚ ਸਵਾਰ ਹੋ ਕੇ ਭੱਜ ਗਏ ਸੀ।
ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਜਾਂਚ ਕੀਤੀ ਤਾਂ ਸ਼ੁੱਕਰਵਾਰ ਨੂੰ ਸੁਆ ਪੁਲੀ ਉਟਾਲਾ ਕੋਲ ਨਾਕਾਬੰਦੀ ਕਰਕੇ ਖੰਨਾ ਵੱਲੋਂ ਆ ਰਹੀ ਗੱਡੀ ’ਚੋਂ ਜਤਿਨ ਸਰਮਾ, ਵਿਜੇ ਕੁਮਾਰ ਉਰਫ ਵਿੱਕੀ ਵਾਸੀ ਏਕਤਾ ਕਲੋਨੀ ਰਾਜਪੁਰਾ, ਸੰਦੀਪ ਸਿੰਘ ਉਰਫ ਦੀਪੂ , ਸਤਪਾਲ ਸਿੰਘ ਵਾਸੀ ਆਦਰਸ ਕਲੋਨੀ ਰੁਦਰਪੁਰ, ਉਤਰਾਖੰਡ ਨੂੰ ਗ੍ਰਿਫਤਾਰ ਕੀਤਾ ਗਿਆ। ਮੁਲਜ਼ਮਾਂ ਤੋਂ 3,60,000/- ਰੁਪਏ ਅਤੇ ਵਾਰਦਾਤ ’ਚ ਵਰਤੀ ਗਈ ਗੱਡੀ ਵੀ ਬ੍ਰਾਮਦ ਕੀਤੀ ਗਈ। ਉਨ੍ਹਾਂ ਖ਼ਿਲਾਫ਼ ਆਰਮਜ ਐਕਟ ਦਾ ਵਾਧਾ ਕੀਤਾ ਗਿਆ।
ਮੁਲਜ਼ਮਾਂ ਦਾ ਜੇਲ੍ਹ ’ਚ ਹੋਇਆ ਸੀ ਮੇਲ
ਐੱਸਪੀ (ਆਈ) ਮਨਪ੍ਰੀਤ ਸਿੰਘ ਨੇ ਦੱਸਿਆ ਕਿ ਪੁੱਛ ਗਿੱਛ ਦੌਰਾਨ ਪਤਾ ਲੱਗਿਆ ਕਿ ਜਤਿਨ ਸ਼ਰਮਾ ਤੇ ਵਿਜੇ ਕੁਮਾਰ ਆਪਸ ’ਚ ਰਿਸ਼ਤੇਦਾਰ ਹਨ। ਵਿਜੇ ਕੁਮਾਰ ਦੇ ਕਹਿਣ ’ਤੇ ਹੀ ਜਤਿਨ ਸ਼ਰਮਾ ਨੇ ਆਪਣੇ ਸਾਥੀਆਂ ਸੰਦੀਪ ਸਿੰਘ ਤੇ ਸੱਤਪਾਲ ਸਿੰਘ ਨਾਲ ਮਿਲ ਕੇ ਵਾਰਦਾਤ ਨੂੰ ਅੰਜ਼ਾਮ ਦਿੱਤਾ ਸੀ।
ਵਿਜੇ ਕੁਮਾਰ ’ਤੇ ਉਤਰਾਖੰਡ ਰੁਦਰਪੁਰ ’ਚ ਪਹਿਲਾ ਹੀ ਮਾਮਲਾ ਦਰਜ ਹੈ, ਜਿਸ ਦੀ ਮੁਲਾਕਾਤ ਜੇਲ੍ਹ ’ਚ ਸੰਦੀਪ ਸਿੰਘ ਤੇ ਸਤਪਾਲ ਸਿੰਘ ਵਾਸੀ ਰੂਦਰਪੁਰ ਨਾਲ ਹੋਈ ਸੀ, ਜਿਸ ਕਰਕੇ ਉਨ੍ਹਾਂ ਦੀ ਪਹਿਲਾ ਤੋਂ ਹੀ ਆਪਸ ’ਚ ਜਾਣ ਪਹਿਚਾਣ ਸੀ। ਜਿੰਨ੍ਹਾਂ ਨਾਲ ਮਿਲ ਕੇ ਵਰਦਾਤ ਨੂੰ ਅੰਜਾਮ ਦਿੱਤਾ ਸੀ। ਮਨਪ੍ਰੀਤ ਸਿੰਘ ਨੇ ਕਿਹਾ ਕਿ ਮੁਲਜ਼ਮਾਂ ਤੋਂ ਜਲਦੀ ਹੀ ਬਾਕੀ ਰਹਿੰਦੀ ਰਕਮ ਤੇ ਵਰਦਾਤ ’ਚ ਵਰਤਿਆ ਰਿਵਾਲਵਰ ਦੀ ਬ੍ਰਾਮਦਗੀ ਕਰਵਾਈ ਜਾਵੇਗੀ।
