ਖਡੂਰ ਸਾਹਿਬ : ਤਰਨਤਾਰਨ ਦੇ ਇਤਿਹਾਸਿਕ ਕਸਬਾ ਖਡੂਰ ਸਾਹਿਬ ਦੇ ਰਹਿਣ ਵਾਲੇ ਦੋ ਬੱਚੇ ਦੋ ਦਿਨ ਤੋਂ ਲਾਪਤਾ ਹਨ। ਸ਼ੁੱਕਰਵਾਰ 12 ਅਤੇ 14 ਸਾਲ ਦੇ ਇਹ ਬੱਚੇ ਸਕੂਲ ਲਈ ਰਵਾਨਾ ਤਾਂ ਹੋਏ ਪਰ ਮੁੜ ਘਰ ਨਹੀਂ ਪਰਤੇ। ਬੱਚਿਆਂ ਦੇ ਗਾਇਬ ਹੋਣ ਨੂੰ ਲੈ ਕੇ ਪਰਿਵਾਰ ਚਿੰਤਾ ਵਿਚ ਹੈ। ਹਾਲਾਂਕਿ ਪਰਿਵਾਰ ਵੱਲੋਂ ਦਿੱਤੀ ਸ਼ਿਕਾਇਤ ਦੇ ਅਧਾਰ ’ਤੇ ਇਲਾਕੇ ਦੀ ਪੁਲਿਸ ਨੇ ਬੱਚਿਆਂ ਦੀ ਤਲਾਸ਼ ਲਈ ਯਤਨ ਸ਼ੁਰੂ ਕਰ ਦਿੱਤੇ ਹਨ ਪਰ ਬੱਚਿਆਂ ਦੇ ਅਚਾਨਕ ਲਾਪਤਾ ਹੋਣ ਦੀ ਘਟਨਾ ਨਾਲ ਇਲਾਕੇ ਵਿਚ ਸਹਿਮ ਦਾ ਮਾਹੌਲ ਬਣਿਆ ਹੋਇਆ ਹੈ।
ਪਰਮਜੀਤ ਕੌਰ ਪਤਨੀ ਸਵਰਗੀ ਪ੍ਰੇਮ ਸਿੰਘ ਵਾਸੀ ਅਲੋਵਾਲ ਅਤੇ ਪਰਮਜੀਤ ਸਿੰਘ ਵਾਸੀ ਦੀਨੇਵਾਲ ਜੋ ਦੋਵੇਂ ਹੁਣ ਖਡੂਰ ਸਾਹਿਬ ਵਿਖੇ ਰਹਿ ਰਹੇ ਹਨ ਨੇ ਦੱਸਿਆ ਕਿ ਉਨ੍ਹਾਂ ਦੇ ਬੱਚੇ ਕ੍ਰਮਵਾਰ ਗੁਰਮੇਲ ਸਿੰਘ (14) ਅਤੇ ਪ੍ਰਿੰਸ (12), 12 ਅਗਸਤ ਨੂੰ ਘਰੋਂ ਖਡੂਰ ਸਾਹਿਬ ਦੇ ਸਰਕਾਰੀ ਸਕੂਲ ਲਈ ਗਏ ਸਨ ਪਰ ਦੋਵੇਂ ਬੱਚੇ ਭੇਦ ਭਰੇ ਹਲਾਤਾਂ ਵਿਚ ਗੁੰਮ ਹੋ ਗਏ ਅਤੇ ਅਜੇ ਤਕ ਘਰ ਵਾਪਸ ਨਹੀਂ ਪਰਤੇ। ਉਨ੍ਹਾਂ ਨੇ ਕਿਹਾ ਕਿ ਬੱਚਿਆਂ ਦੇ ਗੁੰਮ ਹੋਣ ਨਾਲ ਸਾਰਾ ਪਰਿਵਾਰ ਚਿੰਤਾ ਦੇ ਆਲਮ ਵਿਚ ਹੈ ਅਤੇ ਉਨ੍ਹਾਂ ਨੇ ਪੁਲਿਸ ਚੌਕੀ ਖਡੂਰ ਸਾਹਿਬ ਵਿਖੇ ਸ਼ਿਕਾਇਤ ਦੇ ਕੇ ਬੱਚਿਆਂ ਨੂੰ ਜਲਦ ਲੱਭਣ ਦੀ ਮੰਗ ਵੀ ਕੀਤੀ ਹੈ।
ਇਸ ਸਬੰਧੀ ਜਦੋਂ ਪੁਲਿਸ ਚੌਕੀ ਖਡੂਰ ਸਾਹਿਬ ਦੇ ਇੰਚਾਰਜ ਏਐੱਸਆਈ ਮਨਜੀਤ ਸਿੰਘ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਨੇ ਕਿਹਾ ਕਿ ਬੱਚਿਆਂ ਦੇ ਘਰਾਂ ਤੋਂ ਸਕੂਲ ਤਕ, ਬਾਜ਼ਾਰ ਵਿਚ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁੱਟੇਜ਼ ਖੰਘਾਲੀ ਗਈ ਹੈ ਪਰ ਕੈਮਰਿਆਂ ਵਿਚ ਕਿਤੇ ਵੀ ਬੱਚੇ ਸਕੂਲ ਜਾਂਦੇ ਨਜ਼ਰ ਨਹੀਂ ਆ ਰਹੇ। ਉਨ੍ਹਾਂ ਦੱਸਿਆ ਕਿ ਪਰਮਜੀਤ ਸਿੰਘ ਮੁਤਾਬਿਕ ਉਸਦਾ ਲੜਕਾ ਪ੍ਰਿੰਸ ਘਰੋਂ ਤਿੰਨ ਹਜ਼ਾਰ ਰੁਪਏ ਵੀ ਲੈ ਗਿਆ ਹੈ।
ਉਨ੍ਹਾਂ ਕਿਹਾ ਕਿ ਪੁਲਿਸ ਪਾਰਟੀ ਵੱਲੋਂ ਬੱਚਿਆਂ ਦੀ ਭਾਲ ਪੂਰੀ ਮੁਸਤੈਦੀ ਨਾਲ ਕੀਤੀ ਜਾ ਰਹੀ ਹੈ ਅਤੇ ਜਲਦ ਉਨ੍ਹਾਂ ਦਾ ਪਤਾ ਲਗਾ ਲਿਆ ਜਾਵੇਗਾ। ਜਿਕਰਯੋਗ ਹੈ ਕਿ ਬੀਤੇ ਦਿਨੀਂ ਪਿੰਡ ਛਾਪਿਆਂ ਵਾਲੀ ਤੋਂ ਬੱਚਾ ਲਾਪਤਾ ਹੋਣ ਅਤੇ ਫਿਰ ਉਕਤ ਬੱਚੇ ਦੀ ਲਾਸ਼ ਮਿਲਣ ਦੀ ਘਟਨਾ ਨਾਲ ਪਹਿਲਾਂ ਹੀ ਸਹਿਮ ਦਾ ਮਾਹੌਲ ਹੈ ਤੇ ਹੁਣ ਖਡੂਰ ਸਾਹਿਬ ਤੋਂ ਦੋ ਬੱਚੇ ਲਾਪਤਾ ਹੋਣ ਕਾਰਨ ਇਲਾਕੇ ਵਿਚ ਵੀ ਡਰ ਪਾਇਆ ਜਾ ਰਿਹਾ ਹੈ। ਲਾਪਤਾ ਬੱਚਿਆਂ ਦੇ ਵਾਰਸਾਂ ਨੇ ਪੁਲਿਸ ਪ੍ਰਸ਼ਾਸਨ ਕੋਲੋਂ ਮੰਗ ਕੀਤੀ ਕਿ ਉਨ੍ਹਾਂ ਦੇੇ ਬੱਚਿਆਂ ਨੂੰ ਤਰੁੰਤ ਲੱਭਿਆ ਜਾਵੇ।
