ਜਲੰਧਰ : ਕਿਸਾਨਾਂ ਦੇ ਧਰਨੇ, ਲੰਬੇ ਟ੍ਰੈਫਿਕ ਜਾਮ ਤੇ ਰੂਟ ਡਾਇਵਰਸ਼ਨ ਦੀਆਂ ਤਮਾਮ ਪਰੇਸ਼ਾਨੀਆਂ ਦੇ ਬਾਵਜੂਦ ਭਰਾ ਦੇ ਗੁੱਟ ‘ਤੇ ਰੱਖੜੀ ਬੰਨ੍ਹਣ ਨਿਕਲੀਆਂ ਭੈਣਾਂ ਦੇ ਪਿਆਰ ਅੱਗੇ ਸੂਬੇ ਦੀਆਂ ਬੱਸਾਂ ਸੇਵਾ ਬੌਣੀ ਸਾਬਿਤ ਹੋ ਗਈ। ਜਲੰਧਰ ਦੇ ਸ਼ਹੀਦ-ਏ-ਆਜ਼ਮ ਭਗਤ ਸਿੰਘ ਇੰਟਰਸਟੇਟ ਬੱਸ ਟਰਮੀਨਲ ‘ਤੇ ਔਰਤ ਯਾਤਰੀਆਂ ਦੀ ਵੱਡੀ ਗਿਣਤੀ ਪਹੁੰਚਣ ਕਾਰਨ ਬੱਸਾਂ ਘੱਟ ਪੈ ਗਈਆਂ ਹਨ।
ਬੱਸ ਸਟੈਂਡ ਕੰਪਲੈਕਸ ਦੇ ਅੰਦਰ ਪਹੁੰਚ ਰਹੀਆਂ ਬੱਸਾਂ ਨੂੰ ਕਾਊਂਟਰ ਦੇ ਉੱਪਰ ਵੀ ਲੱਗਣ ਦਾ ਮੌਕਾ ਨਹੀਂ ਮਿਲ ਰਿਹਾ ਤੇ ਪਹਿਲਾਂ ਹੀ ਬੱਸਾਂ ਫੁੱਲ ਹੋ ਰਹੀਆਂ ਹਨ। ਅੰਮ੍ਰਿਤਸਰ, ਬਟਾਲਾ, ਪਠਾਨਕੋਟ, ਨਵਾਂਸ਼ਹਿਰ, ਚੰਡੀਗੜ੍ਹ, ਮੋਗਾ ਆਦਿ ਰੂਟ ਲਈ ਲੋੜੀਂਦੀ ਗਿਣਤੀ ‘ਚ ਬੱਸਾਂ ਉਪਲਬਧ ਹੀ ਨਹੀਂ ਹਨ। ਯਾਤਰੀਆਂ ਨੂੰ ਬੱਸਾਂ ਲਈ ਇੰਤਜ਼ਾਰ ਕਰਨਾ ਪੈ ਰਿਹਾ ਹੈ। ਜਿੰਨੀ ਦੇਰ ‘ਚ ਸੰਬੰਧਤ ਰੂਟ ‘ਤੇ ਬੱਸ ਆਉਂਦੀ ਹੈ, ਯਾਤਰੀਆਂ ਦੀ ਗਿਣਤੀ ਦੁੱਗਣੀ ਹੋ ਜਾਂਦੀ ਹੈ।
ਡਾਇਵਰਟਿਡ ਰੂਟਾਂ ‘ਤੇ ਚਲਾਈਆਂ ਜਾ ਰਹੀਆਂ ਬੱਸਾਂ
ਹਾਲਾਂਕਿ ਲਗਾਤਾਰ ਤੀਸਰੇ ਦਿਨ ਐਤਵਾਰ ਨੂੰ ਵੀ ਬੱਸ ਸੇਵਾ ਡਾਇਵਰਟਿਡ ਰੂਟਾਂ ਦੇ ਉੱਪਰ ਹੀ ਚਲਾਈਆਂ ਜਾ ਰਹੀਆਂ ਹਨ। ਇਸ ਕਾਰਨ ਮੰਜ਼ਿਲ ਤਕ ਪਹੁੰਚਣ ‘ਚ ਜਿੱਥੇ ਲੰਬਾ ਰਸਤਾ ਤੈਅ ਕਰਨਾ ਪੈ ਰਿਹਾ ਹੈ ਉੱਥੇ ਹੀ ਸਮਾਂ ਵੀ ਵਾਧੂ ਲੱਗ ਰਿਹਾ ਹੈ। ਇਹੀ ਵਜ੍ਹਾ ਹੈ ਕਿ ਦੇਰ ਨਾਲ ਬੱਸ ਸਟੈਂਡ ‘ਤੇ ਪਹੁੰਚ ਰਹੀਆਂ ਬੱਸਾਂ ਦੇ ਅੱਗੇ ਵਾਲੇ ਰੂਟਾਂ ਦੇ ਟਾਈਮ ਮਿਸ ਹੋ ਰਹੇ ਹਨ। ਇਸ ਕਾਰਨ ਬੱਸਾਂ ਨੂੰ ਵੀ ਜਲੰਧਰ ਬੱਸ ਸਟੈਂਡ ‘ਤੇ ਵੀ ਸ਼ਾਰਟ ਟਰਮੀਨੇਟਿਡ ਕਰ ਦੇਣਾ ਪੈ ਰਿਹਾ ਹੈ।
ਬੱਸਾਂ ਦਾ ਇੰਤਜ਼ਾਮ ਕਰਨ ‘ਚ ਲੱਗ ਰਿਹਾ ਸਮਾਂ
ਆਮ ਬੱਸਾਂ ਤੋਂ ਇਲਾਵਾ ਚੰਡੀਗੜ੍ਹ, ਅੰਮ੍ਰਿਤਸਰ, ਚੰਡੀਗੜ੍ਹ, ਬਟਾਲਾ ਰੂਟ ‘ਤੇ ਚੱਲਣ ਵਾਲੀਆਂ ਨਿੱਜੀ ਏਅਰ ਕੰਡੀਸ਼ਨਡ ਬੱਸਾਂ ਦੀ ਹਾਲਤ ਵੀ ਇਹੀ ਹੈ। ਏਸੀ ਬੱਸਾਂ ‘ਚ ਸਟੂਲ ਲਗਾ ਕੇ ਯਾਤਰੀ ਬਿਠਾਏ ਜਾ ਰਹੇ ਹਨ। ਪੰਜਾਬ ਰੋਡਵੇਜ਼ ਜਲੰਧਰ ਬੱਸ ਸਟੈਂਡ ‘ਤੇ ਮੌਜੂਦ ਅਧਿਕਾਰੀਆਂ ਨੇ ਕਿਹਾ ਕਿ ਪੂਰੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਕਿ ਯਾਤਰੀਆਂ ਦੀ ਸਹੂਲਤ ਲਈ ਲੋੜੀਂਦੀ ਗਿਣਤੀ ‘ਚ ਬੱਸਾਂ ਉਪਲਬਧ ਹੋ ਸਕਣ, ਪਰ ਯਾਤਰੀਆਂ ਦੀ ਗਿਣਤੀ ਏਨੀ ਜ਼ਿਆਦਾ ਵੱਧ ਗਈ ਹੈ ਕਿ ਬੱਸਾਂ ਦਾ ਇੰਤਜ਼ਾਰ ਕਰਨ ਵਿਚ ਸਮਾਂ ਲੱਗ ਰਿਹਾ ਹੈ।
