ਜਲੰਧਰ ਛਾਉਣੀ : ਜਲੰਧਰ ਫਗਵਾੜਾ ਹਾਈਵੇ ‘ਤੇ ਪੈਂਦੇ ਬੜਿੰਗ ਵਿਖੇ ਬਣੇ ਇਕ ਹੋਟਲ ਵਿਖੇ ਚਲ ਰਿਹਾ ਸਗਾਈ ਦਾ ਪ੍ਰੋਗਰਾਮ ਉਸ ਵੇਲੇ ਝਗੜੇ ‘ਚ ਤਬਦੀਲ ਹੋ ਗਿਆ ਜਦੋਂ ਸਗਾਈ ਕਰਨ ਆਏ ਮੁੰਡੇ ਵਾਲਿਆਂ ਨੇ ਕੁੜੀ ਵਾਲਿਆਂ ਤੋਂ ਸੋਨੇ ਦਾ ਕੜਾ ਤੇ ਹੀਰੇ ਦੀਆਂ ਮੁੰਦਰੀਆਂ ਦੀ ਮੰਗ ਕਰ ਦਿੱਤੀ ਤੇ ਉਨ੍ਹਾਂ ਨੂੰ ਉਲਟਾ ਸਿੱਧਾ ਬੋਲਣਾ ਸ਼ੁਰੂ ਕਰ ਦਿੱਤਾ। ਜਦੋਂ ਕਾਫੀ ਦੇਰ ਤਕ ਮੁੰਡੇ ਵਾਲੇ ਨਹੀਂ ਮੰਨੇ ਤਾਂ ਦੋਵਾਂ ਧਿਰਾਂ ਵਿਚਲੇ ਹੱਥੋਂਪਾਈ ਤਕ ਹੋ ਗਈ ਜਿਸ ਮਗਰੋਂ ਮੁੰਡੇ ਵਾਲੇ ਬਿਨਾ ਸਗਾਈ ਕੀਤੀਆਂ ਹੀ ਵਾਪਸ ਚਲੇ ਗਏ। ਕੁੜੀ ਵਾਲਿਆਂ ਵਲੋਂ 112 ‘ਤੇ ਫੋਨ ਕਰ ਕੇ ਪੁਲਿਸ ਨੂੰ ਬੁਲਾਇਆ ਗਿਆ ਪਰ ਜਦੋਂ ਤਕ ਪੁਲਿਸ ਪੁੱਜੀ ਮੁੰਡੇ ਵਾਲੇ ਜਾ ਚੁੱਕੇ ਸਨ। ਕੁੜੀ ਤੇ ਪਰਿਵਾਰ ਦੇ ਬਿਆਨਾਂ ਦੇ ਅਧਾਰ ‘ਤੇ ਪੁਲਿਸ ਵਲੋਂ ਸ਼ਿਕਾਇਤ ਦਰਜ ਕਰ ਲਈ ਗਈ ਹੈ ਤੇ ਜਲਦ ਹੀ ਅਗਲੀ ਲੋੜੀਂਦੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਮੁੰਡੇ ਵਾਲੇ ਹੁਸ਼ਿਆਰਪੁਰ ਤੋਂ ਸਗਾਈ ਕਰਨ ਜਲੰਧਰ ਆਏ ਸੀ ਤੇ ਰਾਮਾ ਮੰਡੀ ਦੇ ਸੈਨਿਕ ਵਿਹਾਰ ਵਿਖੇ ਆਪਣੀ ਭੈਣ ਦੇ ਘਰੇ ਰਹਿੰਦੀ ਸੀ। ਜਿਸ ਵੇਲੇ ਮੁੰਡੇ ਵਾਲੇ ਸਗਾਈ ‘ਚ ਛੱਡ ਜਾਉਣ ਲੱਗੇ ਸੀ ਤਾਂ ਲੜਕੀ ਨੇ ਵੀ ਉਨ੍ਹਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਪਰ ਇਸ ਦੌਰਾਨ ਮੁੰਡੇ ਦੀ ਮਾਂ ਤੇ ਭਾਬੀ ਨੇ ਕੁੜੀ ਨਾਲ ਵੀ ਕੁੱਟਮਾਰ ਕੀਤੀ ਤੇ ਉਥੋਂ ਚਲੇ ਗਏ। ਫਿਲਹਾਲ ਪੁਲਿਸ ਨੇ ਮੁੰਡੇ ਵਾਲੀਆਂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਵੀ ਕੀਤੀ ਪਰ ਦੂਜੇ ਪਾਸਿਓਂ ਕੋਈ ਜਵਾਬ ਨਹੀਂ ਮਿਲ ਸਕਿਆ। ਕੁੜੀ ਵਾਲਿਆਂ ਨੇ ਮੀਡੀਆ ਜ਼ਰੀਏ ਇਨਸਾਫ਼ ਦੀ ਗੁਹਾਰ ਲਗਾਈ ਹੈ।
