ਦਿੱਲੀਓਂ ਆਏ ਮੂੰਹ ਬੋਲੇ ਪਤੀ ਦੇ ਜੀਜੇ ਤੇ ਦੋਸਤਾਂ ਨੇ ਬਣਾਇਆ ਹਵਸ ਦਾ ਸ਼ਿਕਾਰ, ਮੁਟਿਆਰ ਦੀ ਆਬਰੂ ਕੀਤੀ ਤਾਰ-ਤਾਰ

ਲੁਧਿਆਣਾ : ਦਿੱਲੀ ਤੋਂ ਲੁਧਿਆਣਾ ਆਏ ਤਿੰਨ ਵਿਅਕਤੀਆਂ ਨੇ ਲੁਧਿਆਣਾ ਦੇ ਧਾਂਦਰਾ ਇਨਕਲੇਵ ਦੀ ਰਹਿਣ ਵਾਲੀ ਮੁਟਿਆਰ ਦੀ ਆਬਰੂ ਲੁੱਟ ਲਈ। ਜਬਰ ਜਨਾਹ ਕਰਨ ਵਾਲਿਆਂ ‘ਚ ਮੁਟਿਆਰ ਦੇ ਮੂੰਹ ਬੋਲੇ ਪਤੀ ਦਾ ਜੀਜਾ ਵੀ ਸੀ। ਇਸ ਸਬੰਧੀ ਜਦ ਲੜਕੀ ਨੇ ਆਪਣੇ ਪਤੀ ਨੂੰ ਦੱਸਿਆ ਤਾਂ ਪੁਲਿਸ ਨੂੰ ਸ਼ਿਕਾਇਤ ਕਰਨ ਦੀ ਬਜਾਏ ਉਸ ਨੇ ਲੜਕੀ ਦੀ ਬੁਰੀ ਤਰ੍ਹਾਂ ਕੁੱਟਮਾਰ ਕਰ ਦਿੱਤੀ। ਲੜਕੀ ਨੇ ਸਾਰਾ ਮਾਮਲਾ ਥਾਣਾ ਸਦਰ ਦੇ ਧਿਆਨ ਵਿੱਚ ਲਿਆਂਦਾ। ਇਸ ਮਾਮਲੇ ਵਿੱਚ ਪੁਲਿਸ ਨੇ ਲੜਕੀ ਨਾਲ ਲਿਵ ਇਨ ਰਿਲੇਸ਼ਨ ‘ਚ ਰਹਿਣ ਵਾਲੇ ਧਾਂਦਰਾ ਇਨਕਲੇਵ ਦੇ ਵਾਸੀ ਮੁਲਜ਼ਮ ਦਾ ਜੀਜਾ ਤੇ ਦਿੱਲੀ ਤੋਂ ਆਏ ਦੋ ਅਣਪਛਾਤੇ ਵਿਅਕਤੀਆਂ ਦੇ ਖਿਲਾਫ ਮੁਕੱਦਮਾ ਦਰਜ ਕਰ ਲਿਆ ਹੈ।

ਥਾਣਾ ਸਦਰ ਦੀ ਪੁਲਿਸ ਨੂੰ ਜਾਣਕਾਰੀ ਦਿੰਦਿਆਂ ਪੀਡ਼ਤ ਲਡ਼ਕੀ ਨੇ ਦੱਸਿਆ ਕਿ ਕੁਝ ਮਹੀਨੇ ਪਹਿਲੋਂ ਉਸ ਦੇ ਮੁਲਜ਼ਮ ਨਾਲ ਪ੍ਰੇਮ ਸਬੰਧ ਬਣ ਗਏ ਸਨ। ਪਿਛਲੇ ਸੱਤ ਮਹੀਨਿਆਂ ਤੋਂ ਉਹ ਰੋਹਿਤ ਦੇ ਘਰ ਧਾਂਦਰਾ ਇਨਕਲੇਵ ਰਹਿ ਰਹੀ ਸੀ। ਲੜਕੀ ਨੇ ਦੱਸਿਆ ਕਿ ਉਨ੍ਹਾਂ ਦੇ ਸਬੰਧਾਂ ਬਾਰੇ ਮੁਲਜ਼ਮ ਦੀ ਪਤਨੀ ਨੂੰ ਸਾਰਾ ਕੁਝ ਪਤਾ ਹੈ। ਉਹ ਘਰ ਵਿਚ ਮੁਲਜ਼ਮ ਨਾਲ ਪਤਨੀ ਦੀ ਤਰ੍ਹਾਂ ਰਹਿ ਰਹੀ ਸੀ। ਇਸ ਸਬੰਧ ਵਿਚ ਮੁਲਜ਼ਮ ਦੀ ਪਤਨੀ ਨੇ ਕਦੇ ਵੀ ਇਤਰਾਜ਼ ਨਹੀਂ ਜਤਾਇਆ। ਪੀੜਤ ਲੜਕੀ ਨੇ ਪੁਲਿਸ ਨੂੰ ਦੱਸਿਆ ਕਿ ਤਕਰੀਬਨ ਇੱਕ ਮਹੀਨਾ ਪਹਿਲੋਂ ਦਿੱਲੀ ਦੇ ਰਹਿਣ ਵਾਲੇ ਮੁਲਜ਼ਮ ਦੇ ਦੋ ਦੋਸਤ ਆਏ ਜੋ ਰਾਤ ਵੇਲੇ ਜ਼ਬਰਦਸਤੀ ਉਸ ਦੇ ਕਮਰੇ ਅੰਦਰ ਵੜ ਆਏ ਅਤੇ ਲੜਕੀ ਦੀ ਆਬਰੂ ਤਾਰ ਤਾਰ ਕਰ ਦਿੱਤੀ । ਮੁਟਿਆਰ ਦੇ ਮੁਤਾਬਕ ਤਕਰੀਬਨ ਇਕ ਹਫ਼ਤਾ ਪਹਿਲੋਂ ਦਿੱਲੀ ਤੋਂ ਮੁਲਜ਼ਮ ਦਾ ਜੀਜਾ ਆਇਆ। ਬੁਰੀ ਤਰ੍ਹਾਂ ਨਸ਼ੇ ਵਿਚ ਟੱਲੀ ਹੋਏ ਮੁਲਜ਼ਮ ਦੇ ਜੀਜੇ ਨੇ ਲੜਕੀ ਦੀ ਮਰਜ਼ੀ ਦੇ ਬਿਨਾਂ ਉਸ ਨਾਲ ਸਰੀਰਕ ਸਬੰਧ ਬਣਾਏ।

ਇਸ ਸਬੰਧੀ ਜਦ ਲੜਕੀ ਨੇ ਮੁਲਜ਼ਮ ਨੂੰ ਜਾਣਕਾਰੀ ਦਿੱਤੀ ਤਾਂ ਪੁਲਿਸ ਨੂੰ ਸ਼ਿਕਾਇਤ ਕਰਨ ਦੀ ਬਜਾਏ ਮੁਲਜ਼ਮ ਨੇ ਲੜਕੀ ਨਾਲ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ। ਲੜਕੀ ਨੇ ਇਹ ਮਾਮਲਾ ਥਾਣਾ ਸਦਰ ਦੀ ਪੁਲਿਸ ਦੇ ਧਿਆਨ ਵਿੱਚ ਲਿਆਂਦਾ। ਜਾਂਚ ਅਧਿਕਾਰੀ ਰਣਜੀਤ ਸਿੰਘ ਦਾ ਕਹਿਣਾ ਹੈ ਕਿ ਪੁਲਿਸ ਨੇ ਮੁਲਜ਼ਮ, ਉਸ ਦੇ ਜੀਜਾ ਅਤੇ ਦੋ ਅਣਪਛਾਤੇ ਵਿਅਕਤੀਆਂ ਦੇ ਖਿਲਾਫ ਕੇਸ ਦਰਜ ਕਰਕੇ ਮਾਮਲੇ ਦੀ ਤਫਤੀਸ਼ ਸ਼ੁਰੂ ਕਰ ਦਿੱਤੀ ਹੈ। ਮੁਲਜ਼ਮਾਂ ਨੂੰ ਜਲਦ ਹੀ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ।