ਅੰਮ੍ਰਿਤਸਰ : ਸਾਬਕਾ ਸਿਹਤ ਮੰਤਰੀ ਮੰਤਰੀ ਪ੍ਰੋ. ਲਕਸ਼ਮੀਕਾਂਤਾ ਚਾਵਲਾ ਨੇ ਜਲ੍ਹਿਆਂਵਾਲਾ ਬਾਗ਼ ਦੇ ਹੋਏ ਸੁੰਦਰੀਕਰਨ ’ਤੇ ਸਵਾਲ ਉਠਾਏ ਹਨ। ਉਨ੍ਹਾਂ ਕਿਹਾ ਕਿ ਸ਼ਹੀਦੀ ਖੂਹ ਦਾ ਇਤਹਾਸ ਹੀ ਖ਼ਤਮ ਕਰ ਦਿੱਤਾ ਗਿਆ ਹੈ, ਜਦੋਂ ਕਿ ਅਮਰ ਜੋਤੀ ਨੂੰ ਪੁਰਾਣੀ ਜਗ੍ਹਾ ਤੋਂ ਹਟਾ ਦਿੱਤਾ ਗਿਆ ਹੈ, ਅਮਰ ਜੋਤੀ ਨੂੰ ਹੁਣ ਜਿੱਥੇ ਤਬਦੀਲ ਕੀਤਾ ਗਿਆ ਹੈ, ਉੱਥੇ ਕਦੇ ਪਖਾਨੇ ਹੁੰਦੇ ਸਨ। ਇਹ ਸ਼ਹੀਦਾਂ ਦਾ ਸਨਮਾਨ ਨਹੀਂ, ਅਪਮਾਨ ਹੈ। ਉਹ ਸੋਮਵਾਰ ਨੂੰ ਜਲ੍ਹਿਆਂਵਾਲਾ ਬਾਗ ਪੁੱਜੇ ਸਨ, ਜਿੱਥੇ ਉਹ ਜਲ੍ਹਿਆਂਵਾਲਾ ਬਾਗ਼ ਦੇ ਹੋਏ ਸੁੰਦਰੀਕਰਨ ਨੂੰ ਵੇਖ ਕੇ ਭਡ਼ਕ ਗਏ ਤੇ ਕਿਹਾ ਕਿ ਜਿਸ ਖੂਹ ਵਿਚ 120 ਤੋਂ ਜ਼ਿਆਦਾ ਲੋਕ ਮਾਰੇ ਗਏ ਸਨ, ਉਸ ਦੇ ਚਾਰੇ ਪਾਸੇ ਸ਼ੀਸ਼ੇ ਲਗਾ ਕੇ ਉਸ ਨੂੰ ਡੱਬਾ ਬਣਾ ਦਿੱਤਾ ਗਿਆ ਤੇ ਉਸ ਖੂਹ ਅੰਦਰ ਸ਼ਹੀਦੀ ਖੂਹ ਲਿਖ ਦਿੱਤਾ ਗਿਆ। ਇੰਨਾ ਹੀ ਨਹੀਂ, ਜਿਸ ਗਲੀ ਰਾਹੀਂ ਜਨਰਲ ਡਾਇਰ ਫੌਜ ਲੈ ਕੇ ਦਾਖ਼ਲ ਹੋਇਆ ਸੀ, ਉੱਥੇ ਹੱਸਦੇ ਹੋਏ ਚਿਹਿਰਆਂ ਦੇ ਸਟੈਚੂ ਲਗਾ ਦਿੱਤੇ ਗਏ, ਅਜਿਹਾ ਲੱਗਦਾ ਹੈ ਜਿਵੇਂ ਕਿਸੇ ਮੇਲੇ ਦਾ ਦ੍ਰਿਸ਼ ਹੋਵੇ। ਬਾਗ਼ ’ਤੇ 20 ਕਰੋਡ਼ ਰੁਪਏ ਖ਼ਰਚ ਕਰਨ ਉਤੇ ਉਨ੍ਹਾਂ ਸਵਾਲ ਖਡ਼੍ਹਾ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਉਤੇ ਜੇਕਰ ਕਰੋਡ਼ਾਂ ਰੁਪਏ ਖ਼ਰਚ ਹੋਏ ਹਨ ਤਾਂ ਉਸ ਦਾ ਇਕ ਵ੍ਹਾਈਟ ਪੇਪਰ ਜਾਰੀ ਕੀਤਾ ਜਾਣਾ ਚਾਹੀਦਾ ਹੈ ਤੇ ਲੋਕਾਂ ਨੂੰ ਦੱਸਿਆ ਜਾਣਾ ਚਾਹੀਦਾ ਹੈ ਕਿ ਕਿੰਨੇ ਪੈਸੇ ਕਿੱਥੇ ਖ਼ਰਚ ਹੋਏ ਹਨ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਪੱਤਰ ਲਿਖ ਕੇ ਕਿਹਾ ਹੈ ਕਿ ਜਲ੍ਹਿਆਂਵਾਲਾ ਬਾਗ਼ ਨਾਲ ਅਪਰਾਧ ਹੋਇਆ ਹੈ। ਖੂਹ ਦੀ ਡੂੰਘਾਈ ਘੱਟ ਕਰ ਦਿੱਤੀ ਗਈ, ਉਸ ਦਾ ਪਾਣੀ ਵੀ ਖਤਮ ਕਰ ਦਿੱਤਾ ਗਿਆ। ਪੁਰਾਣਾ ਸਭ ਕੁਝ ਮਿਟਾ ਦਿੱਤਾ ਗਿਆ ਅਤੇ ਨਵਾਂ ਬਣਾ ਦਿੱਤਾ ਗਿਆ। ਕਈ ਲੋਕਾਂ ਦੀਆਂ ਤਸਵੀਰਾਂ ਹੀ ਗਾਇਬ ਕਰ ਦਿੱਤੀਆਂ ਗਈਆਂ। ਇਹ ਕੋਈ ਦਿਲੋਂ ਕੰਮ ਨਹੀਂ ਕੀਤਾ ਗਿਆ ਹੈ, ਇਹ ਸਿਰਫ ਮਸ਼ੀਨ ਨਾਲ ਕੰਮ ਕੀਤਾ ਗਿਆ। ਜੇਕਰ ਕਿਸੇ ਨੇ ਜ਼ਮੀਨ ਨਾਲ ਜੁਡ਼ੇ ਲੋਕਾਂ ਨੇ ਕੰਮ ਕੀਤਾ ਹੁੰਦਾ ਤਾਂ ਸੁੰਦਰੀਕਰਨ ’ਤੇ ਸਵਾਲ ਨਹੀਂ ਉਠਦੇ। ਉਨ੍ਹਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੋਂ ਮੰਗ ਕੀਤੀ ਹੈ ਕਿ ਉਸ ਪੁਰਾਣੇ ਖੂਹ ਨੂੰ ਠੀਕ ਉਸੇ ਤਰ੍ਹਾਂ ਵਾਪਸ ਕੀਤਾ ਜਾਵੇ, ਜਿਵੇਂ ਪਹਿਲਾਂ ਸੀ। ਇਸ ਦੇ ਇਲਾਵਾ ਅਮਰ ਜੋਤੀ ਨੂੰ ਵਾਪਸ ਉਥੇ ਹੀ ਸ਼ਿਫਟ ਕੀਤਾ ਜਾਵੇ, ਜਿੱਥੇ ਪਹਿਲਾਂ ਸੀ। ਉਨ੍ਹਾਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਇਸ ਕੰਮ ਦੀ ਸ਼ਲਾਘਾ ਕਰਨ ’ਤੇ ਕਿਹਾ ਕਿ ਉਹ ਸਿਰਫ ਕੇਂਦਰ ਸਰਕਾਰ ਦੀ ਹਾਂ ਵਿਚ ਹਾਂ ਮਿਲਾ ਰਹੇ ਹਨ।
