ਜਲੰਧਰ ’ਚ ਨਿੱਜੀ ਹਸਪਤਾਲ ’ਚ ਹੰਗਾਮਾ, ਪਰਿਵਾਰ ਬੋਲਿਆ, ਮਰੇ ਹੋਏ ਬੱਚੇ ਦਾ ਇਲਾਜ ਕਰ ਰਹੇ ਡਾਕਟਰ, ਹਸਪਤਾਲ ਨੇ ਜ਼ਿੰਦਾ ਦਿਖਾਇਆ

ਜਲੰਧਰ, ਜੇਐੱਨਐੱਨ : ਜਲੰਧਰ ’ਚ ਬੱਚੇ ਦੇ ਇਲਾਜ ਨੂੰ ਲੈ ਕੇ ਪਰਿਵਾਰ ਨੇ ਸ਼੍ਰੀ ਗੁਰੂ ਰਵਿਦਾਸ ਚੌਕ ਦੇ ਕੋਲ ਨਿੱਜੀ ਹਸਪਤਾਲ ਦੇ ਬਾਹਰ ਧਰਨਾ ਦੇ ਕੇ ਪ੍ਰਦਰਸ਼ਨ ਕੀਤਾ ਹੈ। ਪਰਿਵਾਰ ਨੇ ਦੋਸ਼ ਲਗਾਇਆ ਹੈ ਕਿ ਬੱਚੇ ਦੀ ਮੌਤ ਹੋ ਚੁੱਕੀ ਹੈ ਤੇ ਹਸਪਤਾਲ ਪੈਸੇ ਵਸੂਲ ਕੇ ਲਾਸ਼ ਦੇਣ ਦੀ ਗੱਲ ਕਰ ਰਿਹਾ ਹੈ। ਹਸਪਤਾਲ ਪ੍ਰਸ਼ਾਸਨ ਨੇ ਪਰਿਵਾਰ ਨੂੰ ਬੱਚਾ ਆਈਸੀਯੂ ’ਚ ਜੀਵਤ ਦਿਖਾਇਆ। ਬੈਂਕ ਐਨਕਲੇਵ ’ਚ ਰਹਿਣ ਵਾਲੇ ਜਗਤ ਰਾਮ ਦੇ 7 ਸਾਲ ਦੇ ਬੇਟੇ ਬਾਦਲ ਤਾਂ ਬੁਖਾਰ ਹੋਣ ਤੋਂ ਬਾਅਦ ਅੰਕੁਰ ਕਿਡ੍ਰਸ ਹਸਪਤਾਲ ’ਚ ਭਰਤੀ ਕਰਵਾਇਆ ਗਿਆ। ਜਗਤ ਰਾਮ ਨੇ ਕਿਹਾ ਕਿ ਬੱਚੇ ਨੂੰ ਪਹਿਲਾਂ ਮਾਡਲ ਟਾਊਨ ਦੇ ਇਕ ਨਿੱਜੀ ਹਸਪਤਾਲ ’ਚ ਦਾਖਲ ਕਰਵਾਇਆ ਗਿਆ ਸੀ ਤੇ ਸਿਹਤ ਖ਼ਰਾਬ ਹੋਣ ਤੋਂ ਬਾਅਦ ਸੋਮਵਾਰ ਸ਼ਾਮ ਨੂੰ ਜਿੱਥੇ ਲੈ ਕੇ ਆਏ ਸੀ। ਹਸਪਤਾਲ ਪ੍ਰਸ਼ਾਸਨ ’ਤੇ ਸਵੇਰੇ 5 ਹਜ਼ਾਰ ਰੁਪਏ ਜਮ੍ਹਾ ਕਰਵਾ ਕੇ ਲਾਸ਼ ਲੈ ਕੇ ਜਾਣ ਦੇ ਦੋਸ਼ ਲਗਾਏ।

ਇਸ ਦੌਰਾਨ ਸ਼ਿਵਸੈਨਾ ਸਮਾਜਵਾਦੀ ਪਾਰਟੀ ਦੇ ਪ੍ਰਧਾਨ ਥਾਪਰ ਤੇ ਪਰਿਵਾਰ ਨੇ ਹਸਪਤਾਲ ਤੋਂ ਬਾਹਰ ਹੰਗਾਮਾ ਕੀਤਾ। ਮੌਕੇ ’ਤੇ ਪੁਲਿਸ ਥਾਣਾ ਨੰਬਰ 6 ਪਹੁੰਚੀ। ਡਾਕਟਰ ਨੇ ਪੁਲਿਸ, ਪਰਿਵਾਰ ਤੇ ਨਰਿੰਦਰ ਥਾਪਰ ਨੂੰ ਆਈਸੀਯੂ ’ਚ ਲਿਜਾ ਕੇ ਬੱਚੇ ਦੇ ਦਿਲ ਦੀ ਧੜਕਣ ਤੇ ਨਵਜ ਦੋਵੇਂ ਚਲਦੀਆਂ ਦਿਖਾਈਆਂ। ਇਸ ਤੋਂ ਬਾਅਦ ਸਾਰੇ ਸ਼ਾਂਤ ਹੋ ਕੇ ਚਲੇ ਗਏ। ਪਰਿਵਾਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਕੋਲ ਇਲਾਜ ਲਈ ਪੈਸੇ ਨਹੀਂ ਹਨ ਤੇ ਡਾਕਟਰ ਮਰੀਜ਼ ਦੇ ਠੀਕ ਹੋਣ ਦੀ ਗਰੰਟੀ ਵੀ ਨਹੀਂ ਲੈ ਰਿਹਾ ਹੈ।