ਮੋਹਾਲੀ ’ਚ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦਾ ਰਿਜ਼ਨਲ ਸੈਂਟਰ ਹੋਵੇਗਾ ਬੰਦ, ਸਟੂਡੈਂਟਸ ਨੂੰ ਕਿਹਾ, ਦੂਸਰੇ ਕਾਲਜਾਂ ’ਚ ਲਓ ਐਡਮਿਸ਼ਨ

ਮੋਹਾਲੀ : ਮੋਹਾਲੀ ਫੇਜ਼-7 ਸਥਿਤ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦਾ ਰਿਜ਼ਨਲ ਸੈਂਟਰ ਬੰਦ ਹੋ ਰਿਹਾ ਹੈ। ਲੰਬੇ ਸਮੇਂ ਤੋਂ ਇਸਨੂੰ ਬੰਦ ਕਰਨ ਦੀ ਤਿਆਰੀ ਚੱਲ ਰਹੀ ਹੈ। ਰਿਜ਼ਨਲ ਸੈਂਟਰ ’ਚ ਬੀਸੀਏ, ਬੀਬੀਏ, ਐੱਮਬੀਏ, ਐੱਮਸੀਏ ਡੁਅਲ ਡਿਗਰੀ ਦੇ ਜੋ ਸਟੂਡੈਂਟਸ ਪੜ੍ਹ ਰਹੇ ਹਨ, ਉਨ੍ਹਾਂ ਨੂੰ ਆਪਸ਼ਨ ਦਿੱਤਾ ਗਿਆ ਹੈ ਕਿ ਫੇਜ਼-6 ਦੇ ਸਰਕਾਰੀ ਕਾਲਜ, ਫੇਜ਼-3ਏ ਸਥਿਤ ਖ਼ਾਲਸਾ ਕਾਲਜ ਜਾਂ ਫਿਰ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਕੈਂਪਸ ’ਚ ਸ਼ਿਫਟ ਹੋ ਜਾਣ। ਕਿਉਂਕਿ ਇਸ ਸੈਂਟਰ ’ਚ ਹੁਣ ਪੜ੍ਹਾਈ ਨਹੀਂ ਹੋਵੇਗੀ ਅਤੇ ਇਸਨੂੰ ਕੁਝ ਦਿਨਾਂ ’ਚ ਬੰਦ ਕਰ ਦਿੱਤਾ ਜਾਵੇਗਾ ਪਰ ਸਟੂਡੈਂਟਸ ਇਸਦਾ ਵਿਰੋਧ ਕਰ ਰਹੇ ਹਨ।

ਰਿਜ਼ਨਲ ਸੈਂਟਰ ਨੂੰ ਬੰਦ ਕਰਨ ਦਾ ਸਭ ਤੋਂ ਵੱਡਾ ਕਾਰਨ ਸਟਾਫ ਦੀ ਕਮੀ ਹੈ। ਫੈਕਲਟੀ ਨਾ ਹੋਣ ਕਾਰਨ ਸੈਂਟਰ ’ਚ ਕਲਾਸਾਂ ਨਹੀਂ ਲੱਗ ਰਹੀਆਂ। ਸਟੂਡੈਂਟਸ ਨੇ ਕਿਹਾ ਕਿ ਪਿਛਲਾ ਡੇਢ ਸਾਲ ਕੋਵਿਡ ’ਚ ਨਿਕਲ ਗਿਆ ਅਤੇ ਹੁਣ ਸੈਂਟਰ ਬੰਦ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਪੰਜਾਬ ਦੇ ਹੋਰ ਕਾਲਜਾਂ ’ਚ ਵੀ ਫੈਕਲਟੀ ਨਹੀਂ ਹੈ। ਅਜਿਹੇ ’ਚ ਸਟੂਡੈਂਟਸ ਕੀ ਕਰਨ।

ਬੀਬੀਏ ਦੇ ਸਟੂਡੈਂਟਸ ਜਸਕਰਨ ਸਿੰਘ ਭੁੱਲਰ ਨੇ ਦੱਸਿਆ ਕਿ 90 ਤੋਂ ਵੱਧ ਸਟੂਡੈਂਟਸ ਅਲੱਗ-ਅਲੱਗ ਕੋਰਸਾਂ ’ਚ ਇਥੇ ਪੜ੍ਹਾਈ ਕਰ ਰਹੇ ਹਨ। ਰਿਜ਼ਨਲ ਸੈਂਟਰ ’ਚ ਕੁਝ ਸੋਚ-ਸਮਝ ਕੇ ਦਾਖ਼ਲਾ ਲਿਆ ਸੀ, ਪਰ ਹੁਣ ਸਟੂਡੈਂਟ ਨੂੰ ਕਿਹਾ ਜਾ ਰਿਹਾ ਹੈ ਕਿ ਵਿੱਤੀ ਸੰਕਟ ਹੈ ਯੂਨੀਵਰਸਿਟੀ ਸਟਾਫ ਨਹੀਂ ਭੇਜ ਰਹੀ ਹੈ ਅਤੇ ਨਾ ਹੀ ਨਵਾਂ ਸਟਾਫ ਭਰਤੀ ਕਰ ਰਹੀ ਹੈ। ਮਿਥੇਲਸ਼ ਨੇ ਦੱਸਿਆ ਕਿ ਪਿਛਲੇ ਦੋ ਮਹੀਨਿਆਂ ਤੋਂ ਇਹ ਕਿਹਾ ਜਾ ਰਿਹਾ ਸੀ ਕਿ ਫੈਕਲਟੀ ਆ ਰਹੀ ਹੈ। ਪਰ ਹੁਣ ਸੈਂਟਰ ਬੰਦ ਕਰਨ ਦੀ ਗੱਲ ਕਹੀ ਜਾ ਰਹੀ ਹੈ।

ਸਟੂਡੈਂਟਸ ਨੇ ਪੰਜਾਬ ਸਰਕਾਰ ਨੂੰ ਮਾਮਲੇ ’ਚ ਦਖ਼ਲ ਦੇਣ ਦੀ ਮੰਗ ਕਰਦੇ ਹੋਏ ਕਿਹਾ ਕਿ ਫੈਕਲਟੀ ਮੁਹੱਈਆ ਕਰਵਾਈ ਜਾਵੇ ਨਹੀਂ ਤਾਂ ਸੰਘਰਸ਼ ਦੇ ਨਾਲ ਕਾਨੂੰਨੀ ਸਹਾਇਤਾ ਵੀ ਲਈ ਜਾਵੇਗੀ। ਉਥੇ ਹੀ ਰਿਜ਼ਨਲ ਸੈਂਟਰ ਦੇ ਐਸੋਸੀਏਸ਼ਨ ਪ੍ਰੋਫੈਸਰ ਡਾ. ਅੰਬਿਕਾ ਭਾਟੀਆ ਨੇ ਕਿਹਾ ਕਿ ਉਹ ਇਸ ਮਾਮਲੇ ’ਚ ਕੁਝ ਨਹੀਂ ਕਹਿ ਸਕਦੀ। ਇਹ ਫ਼ੈਸਲਾ ਯੂਨੀਵਰਸਿਟੀ ਪ੍ਰਬੰਧਨ ਦਾ ਹੈ। ਇਸ ਮਾਮਲੇ ’ਚ ਯੂਨੀਵਰਸਿਟੀ ਪ੍ਰਬੰਧਨ ਹੀ ਸਫ਼ਾਈ ਦੇ ਸਕਦਾ ਹੈ। ਸੈਂਟਰ ਚਲਾਉਣ ਜਾਂ ਨਾ ਚਲਾਉਣ ਦਾ ਫ਼ੈਸਲਾ ਵੀ ਪ੍ਰਬੰਧਨ ਦਾ ਹੀ ਹੋਵੇਗਾ।