ਭੋਗਪੁਰ : ਜਲੰਧਰ-ਪਠਾਨਕੋਟ ਨੈਸ਼ਨਲ ਹਾਈਵੇਅ ’ਤੇ ਪਚਰੰਗਾ ਨਜ਼ਦੀਕ ਵਾਪਰੇ ਇਕ ਦਰਦਨਾਕ ਹਾਦਸੇ ਵਿਚ ਮੋਟਰ ਸਾਈਕਲ ਸਵਾਰ 4 ਸਾਲਾ ਬੱਚੀ ਦੀ ਮੌਤ ਅਤੇ 2 ਜਣਿਆਂ ਦੇ ਗੰਭੀਰ ਜ਼ਖ਼ਮੀ ਹੋਣ ਦਾ ਸਮਾਚਾਰ ਹੈ।
ਜਾਣਕਾਰੀ ਅਨੁਸਾਰ, ਮੋਟਰਸਾਈਕਲ ਸਵਾਰ ਮਾਂ-ਬੇਟੀ ਆਪਣੇ ਮਾਮੇ ਨਾਲ ਜਲੰਧਰ ਖਾਂਬੜਾ ਚਰਚ ਤੋਂ ਵਾਪਸ ਆਪਣੇ ਪਿੰਡ ਭੁਲੱਥ ਜ਼ਿਲ੍ਹਾਂ ਕਪੂਰਥਲਾ ਨੂੰ ਵਾਪਸ ਜਾ ਰਹੇ ਹਨ। ਜਦੋਂ ਹਾਈਵੇਅ ’ਤੇ ਪਚਰੰਗਾ ਨੇੜਲੇ ਪੰਪ ਕੋਲ ਪੁੱਜੇ ਤਾਂ ਪਿਛੋਂ ਆ ਰਹੇ ਇੱਕ ਤੇਜ਼ ਰਫਤਾਰ ਟਰਾਲੇ ਨੇ ਮੋਟਰਸਾਈਕਲ ਨੂੰ ਜ਼ੋਰਦਾਰ ਟੱਕਰ ਮਾਰ ਦਿੱਤੀ । ਭਿਆਨਕ ਟੱਕਰ ਹੋਣ ਕਰਕੇ 4 ਸਾਲਾ ਲੜਕੀ ਦੀ ਟਰਾਲੇ ਥੱਲੇ ਆਉਣ ਕਰਕੇ ਮੌਕੇ ਤੇ ਮੌਤ ਹੋ ਗਈ ।
ਹਾਦਸੇ ਦੀ ਸੂਚਨਾ ਮਿਲਣ ਤੇ ਸਥਾਨਕ ਪਿੰਡ ਵਾਸੀਆਂ, ਹਾਈਵੇਅ ਪੁਲਿਸ ਐਂਬੂਲੈਂਸ ਤੇ ਪਚਰੰਗਾ ਚੌਕੀ ਦੇ ਇੰਚਾਰਜ ਬਿਸਮਨ ਸਿੰਘ ਸ਼ਾਹੀ ਹਾਦਸੇ ਵਾਲੀ ਥਾਂ ‘ਤੇ ਪੁੱਜੇ ਤੇ ਮ੍ਰਿਤਕ ਲੜਕੀ ਦੀ ਲਾਸ਼ ਨੂੰ ਆਪਣੇ ਕਬਜ਼ੇ ਵਿਚ ਲੈ ਕੇ ਜ਼ਖ਼ਮੀਆਂ ਨੂੰ ਮੁਢਲੀ ਸਹਾਇਤਾ ਦੇਣ ਲਈ ਭੋਗਪੁਰ ਨਿੱਜੀ ਹਸਪਤਾਲ ਲੈ ਕੇ ਆਏ ।
ਮ੍ਰਿਤਕ ਲੜਕੀ ਦੀ ਪਹਿਚਾਣ ਮੰਨੂ ਪੁੱਤਰੀ ਅੰਨੂ ਵਾਸੀ ਪਿੰਡ ਭੁਲੱਥ ਤੇ ਜ਼ਖ਼ਮੀਆਂ ਦੀ ਪਹਿਚਾਣ ਅੰਨੂ ਪੁੱਤਰੀ ਦਿਆਨੰਦ ਵਾਸੀ ਪਿੰਡ ਭੁਲੱਥ ਤੇ ਸੰਦੀਪ ਸਿੰਘ ਪੁੱਤਰ ਦਿਆਨੰਦ ਵਾਸੀ ਪਿੰਡ ਢਿੱਲਵਾਂ ਵਜੋਂ ਹੋਈ ਹੈ । ਪੁਲਿਸ ਚੌਕੀ ਪਚਰੰਗਾ ਦੇ ਇੰਚਾਰਜ ਬਿਸਮਨ ਸਿੰਘ ਸ਼ਾਹੀ ਵੱਲੋਂ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ । ਟਰਾਲਾ ਚਾਲਕ ਹਾਦਸੇ ਵਾਲੀ ਜਗਾਹ ਤੋਂ ਥੋੜ੍ਹੀ ਦੂਰ ਟਰਾਲਾ ਖੜ੍ਹਾ ਕੇ ਭੱਜਣ ਵਿੱਚ ਕਾਮਯਾਬ ਹੋ ਗਿਆ ਅਤੇ ਪੁਲਿਸ ਵੱਲੋਂ ਟਰਾਲੇ ਨੂੰ ਆਪਣੇ ਕਬਜ਼ੇ ਵਿੱਚ ਲੈ ਲਿਆ ਹੈ ।
ਖਾਂਬੜਾ ਚਰਚ ਤੋਂ ਵਾਪਸ ਪਿੰਡ ਨੂੰ ਜਾ ਰਿਹਾ ਸੀ ਪੀੜਤ ਪਰਿਵਾਰ
ਸੜਕ ਹਾਦਸੇ ਦਾ ਸ਼ਿਕਾਰ ਹੋਇਆ ਪਰਿਵਾਰ ਜ਼ਿਲ੍ਹਾ ਕਪੂਰਥਲਾ ਦੇ ਪਿੰਡ ਭੁਲੱਥ ਦਾ ਵਸਨੀਕ ਹੈ । ਮੋਟਰਸਾਈਕਲ ਚਾਲਕ ਆਪਣੀ ਭੈਣ ਤੇ ਭਾਣਜੀ ਨਾਲ ਜਲੰਧਰ ਸਥਿਤ ਖਾਂਬੜਾ ਚਰਚ ਤੋਂ ਹਾਜ਼ਰੀ ਲਗਾ ਕੇ ਵਾਪਸ ਜਾ ਰਿਹਾ ਸੀ ।
