ਸਿੱਧਵਾਂ ਬੇਟ : ਕਸਬਾ ਸਿੱਧਵਾਂ ਬੇਟ ਵਿਚ ਦੀ ਲੰਘ ਰਹੇ ਜਲੰਧਰ-ਜਗਰਾਓਂ ਮੁੱਖ ਮਾਰਗ ਸਥਿਤ ਦੁਕਾਨਦਾਰਾਂ ਵੱਲੋਂ ਸੜਕ ਕਿਨਾਰੇ ਕੀਤੇ ਨਾਜਾਇਜ਼ ਕਬਜ਼ਿਆਂ ਸਦਕਾ ਲੱਗਦੇ ਭਾਰੀ ਜਾਮ ਕਾਰਨ ਰਾਹਗੀਰਾਂ ਨੂੰ ਭਾਰੀ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਬਾਜ਼ਾਰ ਵਿੱਚੋਂ ਲੰਘਦੇ ਕਰੀਬ ਇੱਕ ਕਿਲੋਮੀਟਰ ਦੇ ਲਾਂਘੇ ਨੂੰ ਪਾਰ ਕਰਨ ਲਈ ਹੀ ਵਹੀਕਲ ਸਵਾਰਾਂ ਦੇ ਪਸੀਨੇ ਛੁੱਟ ਜਾਂਦੇ ਹਨ। ਸੜਕ ਕਿਨਾਰੇ ਦੇ ਦੁਕਾਨਦਾਰ ਆਪਣੇ ਸਮਾਨ ਨੂੰ ਦੁਕਾਨ ਦਾ ਬਾਹਰ ਕੱਢ ਕੇ ਪੱਕੀ ਸੜਕ ਦੇ ਕਿਨਾਰੇ ਤੱਕ ਲਗਾ ਦਿੰਦੇ ਹਨ ਜਿਸ ਕਾਰਨ ਦੁਕਾਨਾਂ ਤੋਂ ਖਰੀਦਦਾਰੀ ਕਰਨ ਆਏ ਲੋਕ ਆਪਣੇ ਵਹੀਕਲਾਂ ਨੂੰ ਸੜਕ ਉਪਰ ਹੀ ਲਗਾ ਦਿੰਦੇ ਹਨ ਜਿਸ ਸਦਕਾ ਲੰਘਣ ਵਾਲੇ ਵਹੀਕਲਾਂ ਨੂੰ ਜਾਮ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਦੁਕਾਨਾਂ ਦੇ ਬਾਹਰ ਸੜਕ ਦੇ ਬਿਲਕੁਲ ਕਰੀਬ ਲਗਾਏ ਸਮਾਨ ਕਾਰਨ ਪੈਦਲ ਚੱਲਣ ਵਾਲੇ ਰਾਹਗੀਰ ਵੀ ਹਾਦਸੇ ਦੇ ਸਾਏ ਹੇਠ ਸੜਕ ਤੋਂ ਗੁਜ਼ਰ ਰਹੇ ਹਨ। ਭਾਵੇਂ ਕਿ ਪੁਲਿਸ ਪ੍ਰਸ਼ਾਸਨ ਤਿਉਹਾਰ ਦੇ ਦਿਨਾਂ ਵਿੱਚ ਤਾਂ ਪੂਰਾ ਤੱਤਪਰ ਰਹਿੰਦਾ ਹੈ ਪਰ ਆਮ ਦਿਨਾਂ ਵਿੱਚ ਇਹਨਾਂ ਵੱਲੋਂ ਟ੍ਰੈਫਿਕ ਵੱਲ ਕੋਈ ਧਿਆਨ ਨਹੀਂ ਦਿੱਤਾ ਜਾਂਦਾ ਅਤੇ ਨਾ ਹੀ ਕਬਜ਼ਾਧਾਰੀ ਦੁਕਾਨਦਾਰਾਂ ਖਿਲਾਫ ਕੋਈ ਕਾਰਵਾਈ ਕੀਤੀ ਜਾਂਦੀ ਹੈ, ਜਿਸ ਕਾਰਨ ਕਸਬੇ ਦੇ ਬਜ਼ਾਰ ਵਿੱਚ ਲੱਗਦੇ ਜਾਮ ਦਾ ਹੱਲ ਹੋਣ ਦੀ ਬਿਜਾਏ ਦਿਨੋਂ-ਦਿਨ ਹੋਰ ਵਧਦਾ ਜਾ ਰਿਹਾ ਹੈ।
