ਜੇਐੱਨਐੱਨ, ਤਰਨਤਾਰਨ : ਤਮਿਲਨਾਡੂ ’ਚ ਫ਼ੌਜ ਦੇ ਹੈਲੀਕਾਪਟਰ ਹਾਦਸੇ ’ਚ ਜਾਨ ਗੁਆਉਣ ਵਾਲੇ ਨਾਇਕ ਗੁਰਸੇਵਕ ਸਿੰਘ ਦੀ ਸ਼ਨਾਖ਼ਤ ਲਈ ਕਰਵਾਏ ਗਏ ਡੀਐੱਨਏ ਟੈੱਸਟ ਦੀ ਰਿਪੋਰਟ ਸ਼ੁੱਕਰਵਾਰ ਨੂੰ ਨਹੀਂ ਆਈ। ਇਸ ਕਾਰਨ ਗੁਰਸੇਵਕ ਦੀ ਲਾਸ਼ ਤਰਨਤਾਰਨ ਵਿਖੇ ਨਹੀਂ ਪੁੱਜੀ। ਪਰਿਵਾਰ ਨੂੰ ਆਸ ਸੀ ਕਿ ਸ਼ੁੱਕਰਵਾਰ ਨੂੰ ਗੁਰਸੇਵਕ ਦੇ ਅੰਤਿਮ ਦਰਸ਼ਨ ਹੋ ਸਕਣਗੇ, ਪਰ ਸ਼ਾਮ ਹੁੰਦੇ ਹੀ ਇਹ ਆਸ ਅਧੂਰੀ ਰਹਿ ਗਈ। ਸੰਭਾਵਨਾ ਹੈ ਕਿ ਸ਼ਨਿੱਚਰਵਾਰ ਨੂੰ ਲਾਸ਼ ਪਿੰਡ ਪਹੁੰਚ ਜਾਵੇ।
ਦੂਜੇ ਪਾਸੇ ਪਤਨੀ ਜਸਪ੍ਰੀਤ ਕੌਰ ਪਤੀ ਗੁਰਸੇਵਕ ਦੀ ਮੌਤ ਦੇ ਬਾਅਦ ਤੋਂ ਸੁੱਧ-ਬੁੱਧ ਖੋਹ ਬੈਠੀ ਹੈ। ਘਰ ਦੇ ਵਿਹਡ਼ੇ ਵਿਚ ਸ਼ੁੱਕਰਵਾਰ ਦੁਪਹਿਰੇ ਜਦੋਂ ਲੋਕ ਉਨ੍ਹਾਂ ਨੂੰ ਹੌਸਲਾ ਦੇ ਰਹੇ ਸਨ ਉਦੋਂ ਉਨ੍ਹਾਂ ਕਿਹਾ, ਮੈਨੂੰ ਤੰਗ ਨਾ ਕਰੋ। ਤੁਹਾਨੂੰ ਪਤਾ ਨਹੀਂ ਮੈਂ ਆਪਣੇ ਗੁਰਸੇਵਕ ਦੀ ਉਡੀਕ ਕਰ ਰਹੀ ਹਾਂ। ਪਤਾ ਨਹੀਂ ਕਿਉਂ ਉਨ੍ਹਾਂ ਦਾ ਮੋਬਾਈਲ ਬੰਦ ਹੈ। ਮੈਨੂੰ ਲੱਗਦਾ ਹੈ ਕਿ ਉਹ ਪੁੱਤਰ ਗੁਰਫਤਿਹ ਲਈ ਫ਼ੌਜੀ ਵਰਦੀ ਲੈਣ ਗਏ ਹਨ। ਜਸਪ੍ਰੀਤ ਨੂੰ ਉਨ੍ਹਾਂ ਦੀਆਂ ਨਨਾਣਾਂ ਕ੍ਰਿਸ਼ਨਾ ਤੇ ਮੱਟੂ ਵਾਰ-ਵਾਰ ਇਹ ਕਹਿੰਦੇ ਹੋਏ ਫੋਟੋ ਦਿਖਾ ਰਹੀਆਂ ਸਨ ਕਿ ਹੁਣ ਤੇਰਾ ਗੁਰਸੇਵਕ ਪਰਤਣ ਵਾਲਾ ਨਹੀਂ, ਪਰ ਉਹ ਮੰਨਣ ਨੂੰ ਤਿਆਰ ਨਹੀਂ। ਤਬੀਅਤ ਖ਼ਰਾਬ ਹੋਣ ਦੇ ਬਾਵਜੂਦ ਜਸਪ੍ਰੀਤ ਨੇ ਸ਼ੁੱਕਰਵਾਰ ਨੂੰ ਦਵਾਈ ਲੈਣ ਤੋਂ ਮਨ੍ਹਾਂ ਕਰ ਦਿੱਤਾ। ਬਡ਼ੀ ਮੁਸ਼ਕਲ ਨਾਲ ਪੁੱਤਰ ਗੁਰਫਤਿਹ ਨੇ ਆਪਣੀ ਮਾਂ ਨੂੰ ਪਿਤਾ ਦਾ ਵਾਸਤਾ ਦਿੰਦਿਆਂ ਦਵਾਈ ਖੁਆਈ।
–ਲਾਸ਼ ਆਉਣ ਦੀ ਉਡੀਕ ਕਰ ਰਹੇ ਪਿਤਾ ਤੇ ਭਰਾ ਬੇਹੱਦ ਦੁਖੀ
ਪਿਤਾ ਕਾਬਲ ਸਿੰਘ, ਭਰਾ ਗੁਰਬਖਸ਼ ਸਿੰਘ ਗੁਰਸੇਵਕ ਦੇ ਆਖਰੀ ਦਰਸ਼ਨ ਕਰਨ ਦੀ ਉਡੀਕ ਕਰ ਰਹੇ ਹਨ। ਪਿਤਾ ਕਾਬਲ ਸਿੰਘ ਨੇ ਕਿਹਾ ਕਿ ਗੁਰਸੇਵਕ ਦੇ ਜਾਣ ਦਾ ਬਹੁਤ ਦੁੱਖ ਹੈ, ਪਰ ਉਸ ’ਤੇ ਸਾਨੂੰ ਹਮੇਸ਼ਾ ਫ਼ਖ਼ਰ ਰਹੇਗਾ।
