ਅੰਮ੍ਰਿਤਸਰ : ਭਾਵੇਂ ਤੁਸੀਂ ਸਿੰਗਾਪੁਰ ਪਡ਼੍ਹਨ ਜਾ ਰਹੇ ਹੋ, ਸੈਰ-ਸਪਾਟੇ ਜਾਂ ਕਾਰੋਬਾਰੀ ਮਕਸਦ ਲਈ ਜਾਣਾ ਚਾਹੁੰਦੇ ਹੋ ਤਾਂ ਇਹ ਖ਼ਬਰ ਖ਼ੁਸ਼ਖਬਰੀ ਵਾਲੀ ਹੈ। ਹੁਣ 2 ਸਾਲਾਂ ਬਾਅਦ ਮੁਡ਼ ਤੋਂ ਸ੍ਰੀ ਗੁਰੂ ਰਾਮਦਾਸ ਕੌਮਾਂਤਰੀ ਹਵਾਈ ਅੱਡੇ ਤੋਂ ਸਿੱਧੀ ਉਡਾਣ ਹਫ਼ਤੇ ਵਿਚ 5 ਦਿਨ ਉਡਾਣ ਭਰੇਗੀ। ਸਕੂਟ ਏਅਰਲਾਈਨ ਨੇ ਐਲਾਨ ਕੀਤਾ ਹੈ ਕਿ ਪਹਿਲੀ ਮਈ ਤੋਂ ਲਾਗੂ ਹੋਵੇਗਾ ਤੇ ਇਸ ਲਈ ਏਅਰਲਾਈਨ ਸਾਈਡ ਤੋਂ ਬੁਕਿੰਗ ਚੱਲ ਰਹੀ ਹੈ। ਸਿੰਗਾਪੁਰ ਤੇ ਅੰਮ੍ਰਿਤਸਰ ਵਿਚਕਾਰ ਸਿੱਧੀਆਂ ਉਡਾਣਾਂ ਮਾਰਚ 2020 ਤੋਂ ਬੰਦ ਕਰ ਦਿੱਤੀਆਂ ਗਈਆਂ ਹਨ। ਇਸ ਤੋਂ ਬਾਅਦ ਹਵਾਈ ਸਮਝੌਤੇ ਤਹਿਤ ਪਹਿਲੇ ਹਫ਼ਤੇ ਵਿਚ ਇਕ ਦਿਨ ਲਈ ਉਡਾਣ ਅਰੰਭ ਕੀਤੀ ਗਈ ਸੀ। ਜਦੋਂ ਯਾਤਰੀਆਂ ਦੀ ਗਿਣਤੀ ਵਧਣ ਲੱਗੀ ਫਰਵਰੀ 2022 ਵਿਚ, ਹਫ਼ਤੇ ਵਿਚ ਤਿੰਨ ਦਿਨ ਫਲਾਈਟਸ ਸ਼ੁਰੂ ਹੋਈਆਂ। ਹੁਣ ਸਕੂਟ ਏਅਰਲਾਈਨ ਨੇ ਹਫ਼ਤੇ ਦੌਰਾਨ ਪੰਜ ਦਿਨ ਫਲਾਈਟ ਸਡਿਊਲ ਨੂੰ ਨਿਯਮਤ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਮੌਜੂਦਾ ਸਮੇਂ ਫਲਾਈਟ ਹਫ਼ਤੇ ਵਿਚ ਤਿੰਨ ਦਿਨ ਉਡਾਣ ਭਰਦੀ ਹੈ। ਪੰਜਾਬ ਸਮੇਤ ਹਿਮਾਚਲ, ਜੰਮੂ-ਕਸ਼ਮੀਰ ਦੇ ਲੋਕਾਂ ਨੂੰ ਹਫ਼ਤੇ ਵਿਚ ਪੰਜ ਦਿਨ ਉਡਾਣਾਂ ਦਾ ਬਹੁਤ ਫ਼ਾਇਦਾ ਹੋਵੇਗਾ। ਵਪਾਰੀ ਤਬਕੇ ਨੂੰ ਹਫ਼ਤੇ ਵਿਚ ਪੰਜ ਦਿਨ ਸਿੰਗਾਪੁਰ ਉਡਾਣਾਂ ਦਾ ਸਭ ਤੋਂ ਵੱਡਾ ਫ਼ਾਇਦਾ ਮਿਲ ਸਕਦਾ ਹੈ।
ਮੰਗਲਵਾਰ ਤੇ ਸ਼ਨਿੱਚਰਵਾਰ ਨੂੰ ਛੱਡ ਕੇ ਸਾਰੇ ਦਿਨ ਉਡਾਣ ਭਰੇਗੀ
ਨਵੇਂ ਸ਼ਡਿਊਲ ਮੁਤਾਬਕ ਸਕੂਟ ਏਅਰਲਾਈਨ ਦੀਆਂ ਉਡਾਣਾਂ ਮੰਗਲਵਾਰ ਤੇ ਸ਼ਨਿੱਚਰਵਾਰ ਨੂੰ ਛੱਡ ਕੇ ਬਾਕੀ ਸਾਰੇ ਦਿਨ ਉਡਾਣ ਭਰਨਗੀਆਂ। ਜਦਕਿ ਮੌਜੂਦਾ ਸਮੇਂ ਦੌਰਾਨ ਸੋਮਵਾਰ, ਬੁੱਧਵਾਰ ਤੇ ਸ਼ੁੱਕਰਵਾਰ ਨੂੰ ਸਿੱਧੀਆਂ ਫਲਾਈਟਸ ਮੁਹੱਈਆ ਹਨ। ਬੋਇੰਗ 787 ਅੰਮ੍ਰਿਤਸਰ-ਸਿੰਗਾਪੁਰ ਵਿਚਕਾਰ ਉਡਾਣ ਭਰੇਗਾ। ਇਸ ਵਿਚ 335 ਮੁਸਾਫ਼ਰਾਂ ਨੂੰ ਲੈ ਕੇ ਜਾਣ ਦੀ ਸਮਰੱਥਾ ਹੈ। ਅਜਿਹੀ ਸਥਿਤੀ ਵਿਚ 1005 ਯਾਤਰੀ ਹਰ ਹਫ਼ਤੇ ਤਿੰਨ ਉਡਾਣਾਂ ਰਾਹੀਂ ਸਿੰਗਾਪੁਰ ਆ ਸਕਦੇ ਹਨ। ਇਸ ਲਈ ਏਅਰਲਾਈਨ ਕੰਪਨੀ ਨੇ ਇਕਤਰਫ਼ਾ ਕਿਰਾਇਆ 5980 ਰੁਪਏ ਰੱਖਿਆ ਹੈ। ਉਡਾਣ ਟੇਕ ਆਫ ਤੋਂ ਬਾਅਦ ਛੇ ਘੰਟਿਆਂ ਵਿਚ ਸਿੰਗਾਪੁਰ ਪੁੱਜਿਆ ਕਰੇਗੀ। ਨਵੇਂ ਸੈਡਿਊਲ ਵਿੱਚ ਐਤਵਾਰ ਤੇ ਵੀਰਵਾਰ ਦੇ ਦਿਨ ਵਧਾਏ ਜਾ ਰਹੇ ਹਨ। ਹਫ਼ਤੇ ਵਿਚ 1675 ਮੁਸਾਫ਼ਰ ਜਾ ਸਕਣਗੇ।
ਫਲਾਈਟ ਸਵੇਰੇ 4.10 ਵਜੇ ਅੰਮ੍ਰਿਤਸਰ ਪਹੁੰਚੇਗੀ
ਸਿੰਗਾਪੁਰ ਤੋਂ ਉਡਾਣ ਭਰਨ ਤੋਂ ਬਾਅਦ ਇਹ ਫਲਾਈਟ ਸਵੇਰੇ 4.10 ਵਜੇ ਅੰਮ੍ਰਿਤਸਰ ਹਵਾਈ ਅੱਡੇ ’ਤੇ ਪੁੱਜੇਗੀ। ਇਸ ਪਿੱਛੋਂ ਇਹੀ ਫਲਾਈਟ ਸਾਮ 7.40 ਵਜੇ ਅੰਮ੍ਰਿਤਸਰ ਤੋਂ ਸਿੰਗਾਪੁਰ ਲਈ ਰਵਾਨਾ ਹੋਵੇਗੀ।
