ਦੁਬਈ ਤੋਂ ਆਏ ਯਾਤਰੀ ਕੋਲੋਂ 31 ਲੱਖ ਦਾ ਸੋਨਾ ਬਰਾਮਦ, ਤਸਕਰੀ ‘ਚ ਹਵਾਈ ਅੱਡੇ ਦੇ ਮੁਲਾਜ਼ਮ ਸਮੇਤ ਦੋ ਗ੍ਰਿਫ਼ਤਾਰ

ਅੰਮ੍ਰਿਤਸਰ : ਬੀਤੇ ਦਿਨੀਂ ਕਸਟਮ ਵਿਭਾਗ ਵਲੋਂ ਅੰਮ੍ਰਿਤਸਰ ਸਥਿਤ ਸ੍ਰੀ ਗੁਰੂ ਰਾਮ ਦਾਸ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਕਰੀਬ 31 ਲੱਖ ਰੁਪਏ ਦਾ ਸੋਨਾ ਫ਼ੜਿਆ ਹੈ ਜਿਸਦੇ ਨਾਲ 2 ਵਿਅਕਤੀਆਂ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਹੈ। ਪੱਤਰਕਾਰਾਂ ਨੂੰ ਜਾਣਕਾਰੀ ਦਿੰਦੇ ਹੋਏ ਕਸਟਮ ਵਿਭਾਗ ਨੇ ਦੱਸਿਆ ਕਿ ਬੀਤੇ ਸ਼ਨੀਵਾਰ ਨੂੰ ਏਅਰ ਇੰਡੀਆ ਐਕਸਪ੍ਰੈਸ ਫਲਾਈਟ ਨੰਬਰ ਆਈਐਕਸ 192 ਦੁਆਰਾ ਦੁਬਈ ਤੋਂ ਅੰਮ੍ਰਿਤਸਰ ਪਹੁੰਚੇ ਇੱਕ ਯਾਤਰੀ ਨੂੰ ਗ੍ਰੀਨ ਚੈਨਲ ਤੋਂ ਬਾਹਰ ਨਿਕਲਦੇ ਸਮੇਂ ਕਸਟਮ ਪ੍ਰੇਵੈਂਟੀਵ ਕਮਿਸ਼ਨਰੇਟ ਅੰਮ੍ਰਿਤਸਰ ਦੇ ਅਧਿਕਾਰੀਆਂ ਦੁਆਰਾ ਰੋਕਿਆ ਗਿਆ। ਸਾਮਾਨ ਦੀ ਜਾਂਚ/ਖੋਜ ਦੌਰਾਨ 587 ਗ੍ਰਾਮ ਵਜ਼ਨ ਦੀ ਇੱਕ ਸੋਨੇ ਦੀ ਪੱਟੀ ਯਾਤਰੀ ਦੇ ਮੋਢੇ ਵਾਲੇ ਬੈਗ ਵਿੱਚ ਛੁਪੀ ਹੋਈ ਮਿਲੀ ਜਿਸਦੀ ਜਾਂਚ ਕਰਨ ਤੇ ਸੋਨੇ ਦੀ ਅੰਦਾਜ਼ਨ ਬਾਜ਼ਾਰੀ ਕੀਮਤ 31 ਲੱਖ ਰੁਪਏ ਦੱਸੀ ਜਾ ਰਹੀ ਹੈ। ਇਸੇ ਵਿਅਕਤੀ ਕੋਲੋਂ ਜਦੋਂ ਸਖ਼ਤੀ ਨਾਲ ਪੁੱਛਗਿੱਛ ਕਰਨ ‘ਤੇ ਉਕਤ ਵਿਅਕਤੀ ਨੇ ਮੰਨਿਆ ਕਿ ਉਹ ਇਕ ਕਿਲੋ ਸੋਨੇ ਦੀਆਂ ਦੋ ਬਿਸਕੁਟ ਵਾਂਗ ਬਣੀਆਂ ਪੱਟੀਆਂ ਲੈ ਕੇ ਜਾ ਰਿਹਾ ਸੀ। ਜਿਸ ਵਿਚੋਂ ਇਕ ਸੋਨੇ ਦੀ ਪੱਟੀ ਏਅਰਬ੍ਰਿਜ ‘ਤੇ ਖੜ੍ਹੇ ਗਰਾਊਂਡ ਸਟਾਫ ਨੂੰ ਸੌਂਪ ਦਿੱਤੀ ਗਈ ਸੀ ਤੇ ਇਕ ਨਾਲ ਹੀ ਰੱਖੀ ਸੀ। ਉਸਨੇ ਕਿਹਾ ਕਿ ਉਸਨੂੰ ਸੋਨਾ ਇੱਕ ਗਰਾਊਂਡ ਸਟਾਫ ਨੂੰ ਸੌਂਪਣ ਲਈ ਕਿਹਾ ਗਿਆ ਸੀ ਜੋ ਉਸਦੇ ਕੋਲ ਆਵੇਗਾ ਅਤੇ ਕੋਡ ਵਰਡ ਦੇਵੇਗਾ। ਯਾਤਰੀ ਦੁਆਰਾ ਦੱਸੀ ਗਈ ਗੱਲ ਦੀ ਪੁਸ਼ਟੀ ਕਰਨ ਲਈ, ਸੀਸੀਟੀਵੀ ਫੁਟੇਜ ਨੂੰ ਸਕੈਨ ਕੀਤਾ ਗਿਆ ਤੇ ਉਸ ਤੋਂ ਸਟਾਫ ਦੀ ਪਛਾਣ ਕੀਤੀ ਗਈ।

ਜਿਸ ਦੇ ਆਧਾਰ ‘ਤੇ ਏਅਰੋਬ੍ਰਿਜ ਨੂੰ ਚਲਾਉਣ ਵਾਲੇ ਸਟਾਫ ਤੋਂ ਪੁੱਛਗਿੱਛ ਕੀਤੀ ਗਈ। ਸ਼੍ਰੀ ਗੁਰੂ ਰਾਮ ਦਾਸ ਅੰਤਰਰਾਸ਼ਟਰੀ ਏਅਰਪੋਰਟ, ਅੰਮ੍ਰਿਤਸਰ ਵਿਖੇ ਏਅਰੋ ਬ੍ਰਿਜ ਆਪਰੇਟਰ ਵਜੋਂ ਕੰਮ ਕਰਨ ਵਾਲਾ ਇੱਕ ਸਟਾਫ, ਜਿਸ ਕੋਲ ਏਅਰੋਬ੍ਰਿਜ ਸੰਚਾਲਨ ਦਾ ਇਕਰਾਰਨਾਮਾ ਸੀ, ਉਸ ਕੰਪਨੀ ਵਿੱਚ ਕੰਮ ਕਰਦਾ ਸੀ, ਜਿਸ ਨੂੰ ਯਾਤਰੀ ਦੁਆਰਾ ਇਕ ਸੋਨੇ ਦੀ ਪੱਟੀ ਸੌਂਪੀ ਗਈ ਸੀ। ਜਦੋਂ ਉਸ ਵਿਅਕਤੀ ਕੋਲੋਂ ਬਾਰੀਕੀ ਨਾਲ ਪੁੱਛਗਿੱਛ ਕੀਤੀ ਗਈ ਤਾਂ ਉਸਨੇ ਮੰਨਿਆ ਕਿ ਉਹ ਪਿਛਲੇ ਇੱਕ ਮਹੀਨੇ ਦੌਰਾਨ ਪਹਿਲਾਂ ਵੀ ਕਈ ਵਾਰ ਸੋਨਾ ਤਸਕਰੀ ਕਰ ਚੁੱਕਾ ਹੈ। ਉਸਨੇ ਅੱਗੇ ਮੰਨਿਆ ਕਿ ਉਹ ਉਕਤ ਤਸਕਰੀ ਵਾਲਾ ਸੋਨਾ ਕਿਸੇ ਹੋਰ ਸਟਾਫ ਮੈਂਬਰ ਨੂੰ ਸੌਂਪ ਰਿਹਾ ਸੀ ਜੋ ਕਿ ਉਸੇ ਕੰਪਨੀ ਵਿੱਚ ਏਅਰੋ ਬ੍ਰਿਜ ਆਪਰੇਟਰ ਵਜੋਂ ਕੰਮ ਕਰਦਾ ਹੈ। ਉਹ ਖੁਦ ਅਤੇ ਉਸਦਾ ਦੋਸਤ ਅੱਗੇ ਤਸਕਰੀ ਕੀਤਾ ਸੋਨਾ ਮਾਸਟਰਮਾਈਂਡਾਂ ਨੂੰ ਸੌਂਪ ਰਹੇ ਸਨ। ਕਸਟਮ ਵਿਭਾਗ ਨੇ ਦੱਸਿਆ ਕਿ ਅਗਲੇਰੀ ਜਾਂਚ ਕੀਤੀ ਜਾ ਰਹੀ ਹੈ। ਦੁਬਈ ਤੋਂ ਆਏ ਯਾਤਰੀ ਅਤੇ ਇੱਕ ਏਅਰੋਬ੍ਰਿਜ ਆਪਰੇਟਰ ਨੂੰ ਗ੍ਰਿਫ਼ਤਾਰ ਕਰਕੇ 14 ਦਿਨਾਂ ਦੀ ਨਿਆਂਇਕ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ ਹੈ। ਦੂਜੇ ਤਸਕਰ ਨੂੰ ਫੜਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਉਹਨਾਂ ਨੇ ਕਿਹਾ ਕਿ ਉਸਨੂੰ ਜਲਦੀ ਗ੍ਰਿਫਤਾਰ ਕੀਤਾ ਜਾਵੇਗਾ ਅਤੇ ਉਸ ਦੇ ਨਾਲ ਹੀ ਬਾਕੀ ਤਸਕਰਾਂ ਨੂੰ ਟ੍ਰੇਸ ਕੀਤਾ ਜਾਵੇਗਾ।