ਫਿਰੋਜ਼ਪੁਰ ; ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੀ ਮੌਤ ਨੂੰ ਲੈ ਕੇ ਕੇਂਦਰੀ ਜੇਲ੍ਹ ਫ਼ਿਰੋਜ਼ਪੁਰ ਵਿਚ ਦੁਪਹਿਰ ਅਤੇ ਸ਼ਾਮ ਨੂੰ ਦੋ ਵਾਰ ਜੇਲ੍ਹ ਵਿਚ ਬੰਦ ਕੈਦੀ ,ਹਵਾਲਾਤੀ ਅਤੇ ਗੈਂਗਸਟਰ ਆਪੋ ਵਿਚ ਭਿੜ ਪਏ। ਇਸ ਦੌਰਾਨ ਭਾਵੇਂ ਦਰਜਨ ਤੋਂ ਵੱਧ ਬੰਦੀ ਜ਼ਖ਼ਮੀ ਹੋਏ ਦੱਸੇ ਜਾ ਰਹੇ ਹਨ ਪਰ ਸਥਾਨਕ ਸਿਵਲ ਹਸਪਤਾਲ ਦੇ ਸੂਤਰਾਂ ਅਨੁਸਾਰ ਜੇਲ੍ਹ ਪ੍ਰਸ਼ਾਸਨ ਵੱਲੋਂ ਗੰਭੀਰ ਜ਼ਖਮੀ ਚਾਰ ਲੋਕਾਂ ਨੂੰ ਹੀ ਸਿਵਲ ਹਸਪਤਾਲ ਲਿਆਂਦਾ ਗਿਆ, ਜਿੱਥੋਂ ਉਨ੍ਹਾਂ ਨੂੰ ਲੋੜੀਂਦੀ ਮਰ੍ਹਮ ਪੱਟੀ ਅਤੇ ਦਵਾ ਦਾਰੂ ਕਰ ਕੇ ਵਾਪਸ ਜੇਲ੍ਹ ਭੇਜ ਦਿੱਤਾ ਗਿਆ।
ਉਧਰ ਜੇਲ੍ਹ ਸੂਤਰਾਂ ਮੁਤਾਬਕ ਕੈਦੀਆਂ ਦੀ ਆਪਸੀ ਲੜਾਈ ਵਿਚ ਘੱਟ ਸੱਟਾਂ ਵਾਲੇ ਕੈਦੀਆਂ ਦਾ ਜੇਲ੍ਹ ਦੇ ਅੰਦਰ ਹੀ ਇਲਾਜ ਕਰ ਦਿੱਤਾ ਗਿਆ । ਜੇਲ੍ਹ ਸੂਤਰਾਂ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਬੀਤੇ ਦਿਨ ਦੁਪਹਿਰ ਵੇਲੇ ਕੈਦੀਆਂ ਅਤੇ ਹਵਾਲਾਤੀਆਂ ਦੀ ਬੰਦੀ ਸਮੇਂ ਸਿੱਧੂ ਮੂਸੇਵਾਲਾ ਮੌਤ ਨੂੰ ਲੈ ਕੇ ਦੋ ਧੜੇ ਆਪਸ ਵਿੱਚ ਭਿੜ ਪਏ। ਇਨ੍ਹਾਂ ਚੋਂ ਕੁਝ ਲੋਕ ਮੂਸੇਵਾਲਾ ਦੀ ਮੌਤ ‘ਤੇ ਅਫ਼ਸੋਸ ਕਰ ਰਹੇ ਸਨ ਤਾਂ ਕੁਝ ਲੋਕ ਇਸ ਨੂੰ ਸਹੀ ਆਖ ਰਹੇ ਸਨ। ਇਸੇ ਗੱਲ ਤੋਂ ਵਧੀ ਤਲਖੀ ਦੋ ਧੜਿਆਂ ਵਿਚ ਲੜਾਈ ਦਾ ਕਾਰਨ ਬਣ ਗਈ।
ਉਧਰ ਉਸੇ ਦਿਨ ਸ਼ਾਮ ਨੂੰ ਸਾਢੇ ਛੇ ਤੋਂ ਸੱਤ ਵਜੇ ਦੇ ਕਰੀਬ ਜੇਲ੍ਹ ਦੇ ਹਾਈ ਸਕਿਓਰਿਟੀ ਜ਼ੋਨ ਵਿਚ ਬੰਦ ਗੈਂਗਸਟਰ ਵੀ ਆਪਸ ਵਿੱਚ ਭਿੜ ਪਏ। ਜੇਲ੍ਹ ਸੂਤਰਾਂ ਮੁਤਾਬਕ ਸਿੱਧੂ ਮੁੱਸੇਵਾਲਾ ਦੀ ਮੌਤ ਤੋਂ ਹੋਈ ਬਹਿਸ ਮਗਰੋਂ ਸ਼ਾਮ ਸਮੇਂ ਦੋ ਗੈਂਗਸਟਰਾਂ ਦੀਆਂ ਚੱਕੀਆਂ ਵਿੱਚੋਂ ਮੋਬਾਈਲ ਫੋਨ ਫੜੇ ਜਾਣ ਤੋਂ ਬਾਅਦ ਮੁਖ਼ਬਰੀ ਦੇ ਸ਼ੱਕ ਵਿੱਚ ਗੈਂਗਸਟਰਾਂ ਦੇ ਦੋ ਧੜੇ ਆਪਸ ਵਿੱਚ ਭਿੜ ਪਏ । ਇੱਥੇ ਦੱਸਣਯੋਗ ਹੈ ਕਿ ਸਿਵਲ ਹਸਪਤਾਲ ਵਿਚੋਂ ਜ਼ਖਮੀਆਂ ਦਾ ਇਲਾਜ ਕਰਵਾ ਕੇ ਜੇਲ੍ਹ ਮੁਲਾਜ਼ਮ ਕਾਹਲੀ ਵਿਚ ਸਾਰੇ ਜ਼ਖ਼ਮੀਆਂ ਨੂੰ ਵਾਪਸ ਹਸਪਤਾਲ ਲੈ ਗਏ ।
ਪਰ ਸੂਤਰਾਂ ਦੀ ਮੰਨੀਏ ਤਾਂ ਸਿੱਧੂ ਮੂਸੇਵਾਲਾ ਦੇ ਕਤਲ ਤੋਂ ਬਾਅਦ ਫਿਰੋਜ਼ਪੁਰ ਸੈਂਟਰਲ ਜੇਲ੍ਹ ਵਿੱਚ ਚਾਰ ਧੜੇ ਆਹਮੋ-ਸਾਹਮਣੇ ਹਨ। ਜੇਕਰ ਸੁਰੱਖਿਆ ਸਖ਼ਤ ਨਾ ਕੀਤੀ ਗਈ ਤਾਂ ਫਿਰੋਜ਼ਪੁਰ ਕੇਂਦਰੀ ਜੇਲ੍ਹ ਵਿੱਚ ਵੱਡਾ ਵਿਵਾਦ ਖੜ੍ਹਾ ਹੋ ਸਕਦਾ ਹੈ
