ਜਲੰਧਰ : ਭਾਵੇਂ ਆਬਕਾਰੀ ਵਿਭਾਗ (Excise Department Punjab) 1 ਜੁਲਾਈ ਤੋਂ ਸੂਬੇ ਭਰ ‘ਚ 100 ਫੀਸਦੀ ਸ਼ਰਾਬ ਦੇ ਠੇਕੇ ਅਲਾਟ ਕਰਨ ਵਿੱਚ ਕਾਮਯਾਬ ਨਹੀਂ ਹੋ ਸਕਿਆ ਪਰ ਸ਼ਰਾਬ 30 ਫੀਸਦੀ ਸਸਤੀ ਕਰਵਾਉਣ ‘ਚ ਜ਼ਰੂਰ ਕਾਮਯਾਬ ਹੋਇਆ ਹੈ। ਸ਼ੁੱਕਰਵਾਰ ਦੁਪਹਿਰ ਤਕ ਸ਼ਰਾਬ ਦੇ ਠੇਕੇਦਾਰ ਮਨਮਾਨੇ ਢੰਗ ਨਾਲ ਮਹਿੰਗੇ ਭਾਅ ’ਤੇ ਸ਼ਰਾਬ ਵੇਚ ਰਹੇ ਸਨ ਪਰ ਜਿਵੇਂ ਹੀ ਵਿਭਾਗ ਨੂੰ ਇਸ ਦਾ ਪਤਾ ਲੱਗਾ ਤਾਂ ਤੁਰੰਤ ਹੀ ਇਨ੍ਹਾਂ ਦੀਆਂ ਕੀਮਤਾਂ ’ਚ 30 ਫੀਸਦੀ ਦੀ ਕਟੌਤੀ ਕਰ ਦਿੱਤੀ ਗਈ।
ਅਰਜ਼ੀ ਦੀ ਮਿਆਦ ਸ਼ਨਿੱਚਰਵਾਰ ਤਕ ਵਧਾਈ
ਵਿਭਾਗ ਵੱਲੋਂ ਠੇਕੇਦਾਰਾਂ ਨੂੰ ਬਾਕਾਇਦਾ ਤੌਰ ‘ਤੇ ਸ਼ਰਾਬ ਦੇ ਠੇਕਿਆਂ ਦੀ ਚਾਰਦੀਵਾਰੀ ‘ਚ ਨਵੀਂ ਰੇਟ ਲਿਸਟ ਮੁਹੱਈਆ ਕਰਵਾ ਦਿੱਤੀ ਗਈ ਹੈ। ਜ਼ਿਲ੍ਹਾ ਜਲੰਧਰ ‘ਚ ਵੀਰਵਾਰ ਰਾਤ ਤਕ ਸਿਰਫ਼ ਸੱਤ ਸ਼ਰਾਬ ਦੇ ਠੇਕੇ ਹੀ ਅਲਾਟ ਹੋਏ ਸਨ। ਕੁਝ ਠੇਕੇਦਾਰਾਂ ਨੇ ਸ਼ਰਾਬ ਦੀਆਂ ਕੀਮਤਾਂ ‘ਚ ਹੇਰਾਫੇਰੀ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਉਨ੍ਹਾਂ ਦੀ ਇਕ ਨਾ ਚੱਲੀ। ਦੂਜੇ ਪਾਸੇ ਸ਼ਰਾਬ ਗਰੁੱਪ ਅਲਾਟਮੈਂਟ ‘ਚ ਐਕਸਾਈਜ਼ ਵਿਭਾਗ ਦਾ ਪਸੀਨਾ ਨਿਕਲ ਰਿਹਾ ਹੈ। ਸ਼ੁੱਕਰਵਾਰ ਸ਼ਾਮ ਤਕ ਵਧਾਈ ਗਈ ਅਪਲਾਈ ਕਰਨ ਦੀ ਅੰਤਿਮ ਮਿਆਦ ਨੂੰ ਹੁਣ ਸ਼ਨਿਚਰਵਾਰ ਤਕ ਵਧਾ ਦਿੱਤਾ ਗਿਆ ਹੈ।
ਸ਼ੁੱਕਰਵਾਰ ਨੂੰ ਸਿਰਫ਼ ਫਿਲੌਰ ਦੇ ਠੇਕੇ ਅਲਾਟ ਹੋਏ
ਸ਼ੁੱਕਰਵਾਰ ਨੂੰ ਜ਼ਿਲ੍ਹਾ ਜਲੰਧਰ ‘ਚ ਸਿਰਫ਼ ਫਿਲੌਰ ਦੇ ਗਰੁੱਪ ਹੀ ਅਲਾਟ ਕੀਤੇ ਜਾ ਸਕੇ। ਜਲੰਧਰ ਜ਼ੋਨ ਦੇ ਡਿਪਟੀ ਕਮਿਸ਼ਨਰ ਆਬਕਾਰੀ ਰਾਜਪਾਲ ਸਿੰਘ ਨੇ ਦੱਸਿਆ ਕਿ ਜ਼ੋਨ ਭਰ ‘ਚ ਕੁੱਲ 10 ਦਰਖਾਸਤਾਂ ਪ੍ਰਾਪਤ ਹੋਈਆਂ, ਜਿਨ੍ਹਾਂ ਵਿਚ ਫਿਲੌਰ ਦਾ ਇਕ ਗਰੁੱਪ ਵੀ ਸ਼ਾਮਲ ਹੈ। ਜ਼ੋਨ ਭਰ ‘ਚ ਹੁਣ ਤਕ ਕੁੱਲ 71 ਗਰੁੱਪਾਂ ‘ਚੋਂ 45 ਅਰਜ਼ੀਆਂ ਪ੍ਰਾਪਤ ਹੋਈਆਂ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਵਿਭਾਗ ਵੱਲੋਂ ਠੇਕੇਦਾਰਾਂ ਨੂੰ ਲਗਾਤਾਰ ਭਰੋਸਾ ਦਿੱਤਾ ਜਾ ਰਿਹਾ ਹੈ ਕਿ ਜੇਕਰ ਸ਼ਰਾਬ ਸਸਤੀ ਤੇ ਵਿਕਰੀ ਬਲੈਕ ‘ਚ ਬੰਦ ਹੁੰਦੀ ਹੈ ਤਾਂ ਉਨ੍ਹਾਂ ਨੂੰ ਢੁਕਵਾਂ ਵਿੱਤੀ ਲਾਭ ਮਿਲੇਗਾ। ਘਬਰਾਉਣ ਦੀ ਲੋੜ ਨਹੀਂ ਹੈ।
ਅੱਜ ਫਿਰ ਈ-ਟੈਂਡਰਿੰਗ, ਰਾਖਵੀਂ ਕੀਮਤ ‘ਚ ਕੋਈ ਕਟੌਤੀ ਨਹੀਂ
ਆਬਕਾਰੀ ਵਿਭਾਗ ਸ਼ਰਾਬ ਦੇ ਠੇਕਿਆਂ ਦੀ ਈ-ਟੈਂਡਰਿੰਗ ਲਈ ਅੱਜ ਫਿਰ ਅਭਿਆਸ ਕਰੇਗਾ। ਵਿਭਾਗ ਰਾਖਵੀਂ ਕੀਮਤ ‘ਚ ਕੋਈ ਕਟੌਤੀ ਨਹੀਂ ਕਰੇਗਾ। ਅਰਜ਼ੀਆਂ ਕੇਵਲ 10% ਕਟੌਤੀ ਨਾਲ ਸਵੀਕਾਰ ਕੀਤੀਆਂ ਜਾਣਗੀਆਂ। ਠੇਕੇਦਾਰ ਅਜੇ ਵੀ 20 ਫੀਸਦੀ ਕਟੌਤੀ ‘ਤੇ ਅੜੇ ਹੋਏ ਹਨ। ਜਲੰਧਰ ਜ਼ੋਨ ‘ਚ 26 ਗਰੁੱਪਾਂ ਦੀਆਂ ਅਸਾਮੀਆਂ ਅਜੇ ਵੀ ਖਾਲੀ ਹਨ ਅਤੇ ਇਨ੍ਹਾਂ ਗਰੁੱਪਾਂ ਲਈ ਕੋਈ ਅਰਜ਼ੀਆਂ ਨਹੀਂ ਮਿਲ ਰਹੀਆਂ। ਜਲੰਧਰ ਜ਼ੋਨ ਵਿੱਚ ਕੁੱਲ 71 ਗਰੁੱਪ ਹਨ, ਜਿਨ੍ਹਾਂ ਵਿੱਚੋਂ ਸਿਰਫ਼ 45 ਗਰੁੱਪਾਂ ਲਈ ਹੀ ਅਰਜ਼ੀਆਂ ਪ੍ਰਾਪਤ ਹੋਈਆਂ ਹਨ।
ਫਿਲਹਾਲ ਇੱਥੇ ਠੇਕੇ ਖੁੱਲ੍ਹਣ ਦਾ ਇੰਤਜ਼ਾਰ
ਰਾਮਾਮੰਡੀ, ਸੋਢਲ ਚੌਕ, ਆਦਮਪੁਰ, ਨਕੋਦਰ, ਗੁਰਾਇਆ, ਮਕਸੂਦਾਂ, ਫੋਕਲ ਪੁਆਇੰਟ, ਲੈਦਰ ਕੰਪਲੈਕਸ, ਮਾਡਲ ਟਾਊਨ, ਮਾਡਲ ਹਾਊਸ, ਬੱਸ ਸਟੈਂਡ, ਪਰਾਗਪੁਰ ਆਦਿ ਠੇਕੇ ਖੁੱਲ੍ਹਣ ਦੀ ਉਡੀਕ ਕਰ ਰਹੇ ਹਨ।
