ਝਬਾਲ : ਥਾਣਾ ਸਰਾਏ ਅਮਾਨਤ ਖਾਂ ਵਿਚ ਤਾਇਨਾਤ ਹੋਣ ਦੌਰਾਨ ਸਰਕਾਰੀ ਪਿਸਤੋਲ ਤੇ ਕਾਰਤੂਸ ਗਵਾ ਦੇਣ ਵਾਲੇ ਪੰਜਾਬ ਪੁਲਿਸ ਦੇ ਥਾਣੇਦਾਰ ਵਿਰੁੱਧ ਥਾਣਾ ਝਬਾਲ ਵਿਚ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਡੀਜੀਪੀ ਦਫ਼ਤਰ ਵੱਲੋਂ ਜਾਰੀ ਕੀਤੇ ਗਏ ਪੱਤਰ ਤਹਿਤ ਇਹ ਕਾਰਵਾਈ ਅਮਲ ਵਿਚ ਲਿਆਂਦੀ ਗਈ ਹੈ। ਹਾਲਾਂਕਿ ਇਹ ਥਾਣੇਦਾਰ ਪਹਿਲਾਂ ਹੀ ਪਿਸਤੋਲ ਦੀ ਬਣਦੀ ਰਕਮ ਸਰਕਾਰੀ ਖ਼ਜ਼ਾਨੇ ਵਿਚ ਜਮ੍ਹਾਂ ਕਰਵਾ ਚੁੱਕਾ ਹੈ।
ਪੁਲਿਸ ਕੇਸ ਮੁਤਾਬਕ ਏਐੱਸਆਈ ਪਰਗਟ ਸਿੰਘ ਥਾਣਾ ਸਰਾਏ ਅਮਾਨਤ ਖਾਂ ਵਿਖੇ ਤਾਇਨਾਤ ਸੀ। ਉਸ ਨੇ ਸਰਹੱਦ ਦੀ ਸੈਕਿੰਡ ਲਾਈਨ ਡਿਫੈਂਸ ਦੇ ਨਾਕੇ ’ਤੇ ਤਾਇਨਾਤ ਹੋਣ ਕਰ ਕੇ ਥਾਣਾ ਮੁਖੀ ਨੂੰ ਹਲਫੀਆ ਬਿਆਨ ਦੇ ਕੇ ਪਿਸਤੋਲ ਮੰਗੀ ਸੀ। ਇਸ ਕਾਰਨ ਉਸ ਨੂੰ 9 ਐੱਮਐੱਮ ਦਾ ਸਰਕਾਰੀ ਪਿਸਤੋਲ ਨੰਬਰ ਡੀ-62021 ਤੇ 30 ਕਾਰਤੂਸ ਪੁਲਿਸ ਦੇ ਕੋਤ ਵਿੱਚੋਂ 3 ਮਈ 2019 ਨੂੰ ਅਲਾਟ ਹੋਏ। ਇਹ ਪਿਸਟਲ ਏਐੱਸਆਈ ਪਰਗਟ ਸਿੰਘ ਕੋਲੋਂ ਗੁਆਚ ਗਿਆ। ਵਿਭਾਗੀ ਕਾਰਵਾਈ ਦੌਰਾਨ ਉਸ ਦੀ ਦੋ ਸਾਲ ਦੀ ਨੌਕਰੀ ਪੱਕੇ ਤੌਰ ’ਤੇ ਜ਼ਬਤ ਕੀਤੀ ਗਈ ਅਤੇ ਗੁੰਮ ਹੋਏ ਪਿਸਤੋਲ ਤੇ ਕਾਰਤੂਸਾਂ ਦੀ ਬਣਦੀ ਕੀਮਤ ਉਸ ਕੋਲੋਂ ਵਸੂਲ ਕਰ ਕੇ ਸਰਕਾਰੀ ਖ਼ਜ਼ਾਨੇ ਵਿਚ ਪੈਸੇ ਜਮ੍ਹਾਂ ਕਰਵਾ ਦਿੱਤੇ ਗਏ। ਇਸ ਦੀ ਸਾਰੀ ਜਾਣਕਾਰੀ ਡੀਜੀਪੀ ਦਫ਼ਤਰ ਨੂੰ ਭੇਜ ਦਿੱਤੀ ਗਈ। ਜਿਥੋਂ ਜਾਰੀ ਹੋਏ ਪੱਤਰ ਦੇ ਅਧਾਰ ’ਤੇ ਏਐੱਸਅਆਈ ਪਰਗਟ ਸਿੰਘ ਦੇ ਖਿਲਾਫ ਥਾਣਾ ਝਬਾਲ ਵਿਚ ਜ਼ੇਰੇ ਧਾਰਾ 409 ਆਈਪੀਸੀ ਦੇ ਤਹਿਤ ਮੁਕੱਦਮਾ ਦਰਜ ਹੋਇਆ ਹੈ। ਇਸ ਮਾਮਲੇ ਦੀ ਅਗਲੀ ਜਾਂਚ ਸਬ-ਇੰਸਪੈਕਟਰ ਕੇਵਲ ਸਿੰਘ ਕਰ ਰਿਹਾ ਹੈ।
