ਪੁੱਤਰ ਦੀ ਖ਼ਾਹਿਸ਼ ’ਚ ਪਿਤਾ ਨੇ 4 ਮਹੀਨੇ ਦੀ ਧੀ ਦਾ ਆਪਣੇ ਹੱਥੀਂ ਗਲਾ ਦਬਾ ਕੇ ਕੀਤਾ ਕਤਲ, ਪੁਲਿਸ ਨੇ ਕੀਤਾ ਗ੍ਰਿਫ਼ਤਾਰ

ਜਲੰਧਰ : ਲੁਧਿਆਣਾ ਦੇ ਪਿੰਡ ਬੋਹਡ਼ਾ ’ਚ ਰਹਿਣ ਵਾਲੇ ਪਿਓ ਨੇ ਪੁੱਤਰ ਦੀ ਖਾਹਿਸ਼ ’ਚ 4 ਮਹੀਨੇ ਦੀ ਧੀ ਨੂੰ ਗਲ਼ਾ ਘੁੱਟ ਕੇ ਮਾਰ ਦਿੱਤਾ। ਜਲੰਧਰ ਦੀ ਥਾਣਾ ਸਦਰ ਦੀ ਪੁਲਿਸ ਨੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਮੁਲਜ਼ਮ ਦੀ ਪਛਾਣ ਲੁਧਿਆਣਾ ਦੇ ਪਿੰਡ ਬੋਹਡ਼ਾ ਵਾਸੀ ਅਰਜੁਨ ਦੇ ਰੂਪ ਵਿਚ ਹੋਈ ਹੈ। ਥਾਣਾ ਸਦਰ ਦੇ ਇੰਚਾਰਜ ਅਜੇ ਸਿੰਘ ਨੇ ਦੱਸਿਆ ਕਿ ਬੀਤੇ ਦਿਨ ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ ਕਿ ਫੋਲਡ਼ੀਵਾਲ ਪਿੰਡ ਵਿਚੋਂ ਇਕ ਚਾਰ ਮਹੀਨੇ ਦੀ ਬੱਚੀ ਮ੍ਰਿਤਕ ਹਾਲਤ ਵਿਚ ਮਿਲੀ ਹੈ। ਲਾਸ਼ ਨੂੰ ਸਿਵਲ ਹਸਪਤਾਲ ਦੇ ਮੁਰਦਾ ਘਰ ਵਿਚ ਰਖਵਾ ਦਿੱਤਾ ਗਿਆ ਸੀ। ਜਾਂਚ ’ਚ ਇਹ ਗੱਲ ਸਾਹਮਣੇ ਆਈ ਕਿ ਬੱਚੀ ਦਾ ਨਾਂ ਵਰਸ਼ਾ ਹੈ ਅਤੇ ਉਹ ਲੁਧਿਆਣਾ ਦੇ ਪਿੰਡ ਬੋਹਡ਼ਾ ਵਿਚ ਰਹਿਣ ਵਾਲੀ ਬਿਜਲੀ ਨਾਮਕ ਔਰਤ ਦੀ ਧੀ ਹੈ। ਬਿਜਲੀ ਨੇ ਪੁਲਿਸ ਨੂੰ ਦਿੱਤੇ ਬਿਆਨ ਵਿਚ ਦੱਸਿਆ ਕਿ ਉਸ ਦਾ ਪਤੀ ਅਰਜੁਨ ਦਿਹਾਡ਼ੀਦਾਰ ਹੈ ਅਤੇ ਪੁੱਤਰ ਦੀ ਇੱਛਾ ਰੱਖਦਾ ਸੀ। ਧੀ ਹੋਣ ’ਤੇ ਉਹ ਉਸ ਨੂੰ ਮਾਰਨ ਲੱਗਾ। ਉਸ ਨੂੰ ਉਸ ਦੀ ਚਾਰ ਮਹੀਨੇ ਦੀ ਧੀ ਸਮੇਤ ਘਰੋਂ ਕੱਢ ਦਿੱਤਾ ਪਰ ਲੋਕਾਂ ਨੇ ਸਮਝਾ-ਬੁਝਾ ਕੇ ਉਨ੍ਹਾਂ ਨੂੰ ਵਾਪਸ ਘਰ ਭੇਜ ਦਿੱਤਾ। ਉਸ ਨੇ ਦੋਸ਼ ਲਾਇਆ ਕਿ ਅਰਜੁਨ ਨੇ ਉਸ ਦੀ ਧੀ ਨੂੰ ਘਰੋਂ ਲਿਜਾ ਕੇ ਜਲੰਧਰ ਦੇ ਫੋਲਡ਼ੀਵਾਲ ਪਿੰਡ ਲਿਜਾ ਕੇ ਗਲ਼ਾ ਘੁੱਟ ਕੇ ਮਾਰ ਦਿੱਤਾ। ਪੁਲਿਸ ਨੇ ਅਰਜੁਨ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਮੁਲਜ਼ਮ ਨੂੰ ਅਦਾਲਤ ਵਿਚ ਪੇਸ਼ ਕਰਕੇ ਰਿਮਾਂਡ ’ਤੇ ਲਿਆ ਜਾਵੇਗਾ ਅਤੇ ਪੁੱਛਗਿੱਛ ਕੀਤੀ ਜਾਵੇਗੀ।