ਲੁਧਿਆਣਾ : ਤਾਲੇ ਕੱਟ ਕੇ ਏਟੀਐਮ ਕੈਬਿਨ ਦੇ ਅੰਦਰ ਦਾਖਲ ਹੋਏ ਮੁਲਜ਼ਮ ਨੇ ਗੈਸ ਕਟਰ ਦੇ ਨਾਲ ੲੇ ਟੀ ਐੱਮ ਮਸ਼ੀਨ ਨੂੰ ਕੱਟਣਾ ਸ਼ੁਰੂ ਹੀ ਕੀਤਾ ਸੀ ਕਿ ਗਸ਼ਤ ਕਰ ਰਹੀ ਪੁਲਿਸ ਪਾਰਟੀ ਮੌਕੇ ਤੇ ਪਹੁੰਚ ਗਈ| ਪੁਲਿਸ ਮੁਲਾਜ਼ਮਾਂ ਨੂੰ ਦੇਖਦੇ ਹੀ ਮੁਲਜ਼ਮ ਮੌਕੇ ਤੋਂ ਨੱਸ ਗਿਆ| ਪੁਲਿਸ ਨੇ ਪਿੱਛਾ ਕਰਕੇ ਮੁਲਜ਼ਮ ਨੂੰ ਹਿਰਾਸਤ ਵਿੱਚ ਲਿਆ ਅਤੇ ਏਟੀਐੱਮ ਕੈਬਿਨ ਦੇ ਅੰਦਰੋਂ ਗੈਸ ਕਟਰ ਅਤੇ ਸਿਲੰਡਰ ਬਰਾਮਦ ਕੀਤਾ| ਇਸ ਮਾਮਲੇ ਵਿਚ ਪੁਲਿਸ ਨੇ ਮੁਲਜ਼ਮ ਦਾ ਐਕਟਿਵਾ ਸਕੂਟਰ ਵੀ ਬਰਾਮਦ ਕਰ ਲਿਆ ਹੈ| ਜਾਂਚ ਅਧਿਕਾਰੀ ਐੱਸਆਈ ਦਲਜੀਤ ਸਿੰਘ ਦੇ ਮੁਤਾਬਕ ਕਾਬੂ ਕੀਤੇ ਗਏ ਮੁਲਜ਼ਮ ਦੀ ਪਛਾਣ ਸਾਇਆਂ ਖੁਰਦ ਡੇਹਲੋਂ ਦੇ ਰਹਿਣ ਵਾਲੇ ਮੋਹਣ ਖਾਨ ਉਰਫ ਮਾਣਾ ਵਜੋਂ ਹੋਈ ਹੈ।
ਜਾਣਕਾਰੀ ਮੁਤਾਬਕ ਪੀਸੀਆਰ ਮੋਟਰਸਾਈਕਲ 52 ਤੜਕੇ ਸਾਢੇ ਤਿੰਨ ਵਜੇ ਸਰੀਂਹ ਇਲਾਕੇ ਵਿਚ ਗਸ਼ਤ ਕਰ ਰਿਹਾ ਸੀ। ਸਿਪਾਹੀ ਦਿਲਜੀਤ ਸਿੰਘ ਅਤੇ ਏਐੱਸਆਈ ਗੁਰਪ੍ਰੀਤ ਸਿੰਘ ਇਲਾਕੇ ਦੇ ਏਟੀਐੱਮ ਕੈਬਿਨ ਚੈੱਕ ਕਰਨ ਲੱਗ ਪਏ। ਉਨ੍ਹਾਂ ਨੇ ਦੇਖਿਆ ਕਿ ਪੰਜਾਬ ਐਂਡ ਸਿੰਧ ਬੈਂਕ ਏਟੀਐੱਮ ਕੈਬਿਨ ਦੇ ਤਾਲੇ ਟੁੱਟੇ ਹੋਏ ਸਨ। ਅੱਧਾ ਸ਼ਟਰ ਵੀ ਖੁੱਲ੍ਹਾ ਸੀ| ਮੁਲਾਜ਼ਮਾਂ ਨੇ ਦੇਖਿਆ ਕਿ ਕੈਬਿਨ ਦੇ ਬਾਹਰ ਖੜ੍ਹੇ ਐਕਟਿਵਾ ਸਕੂਟਰ ਦਾ ਨੰਬਰ ਕੱਪੜੇ ਨਾਲ ਢਕਿਆ ਹੋਇਆ ਸੀ| ਕੈਬਿਨ ਦੇ ਅੰਦਰ ਝਾਤੀ ਮਾਰਨ ਤੇ ਮਾਮਲਾ ਸਾਫ਼ ਹੋ ਗਿਆ, ਪੁਲਿਸ ਨੇ ਦੇਖਿਆ ਕਿ ਇਕ ਵਿਅਕਤੀ ਗੈਸ ਕਟਰ ਦੇ ਨਾਲ ਏ ਟੀ ਐਮ ਮਸ਼ੀਨ ਨੂੰ ਕੱਟਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ| ਪੁਲਿਸ ਪਾਰਟੀ ਨੂੰ ਦੇਖ ਕੇ ਮੁਲਜ਼ਮ ਕੈਬਿਨ ਚੋ ਬਾਹਰ ਨਿਕਲ ਕੇ ਨੱਸ ਪਿਆ| ਸਿਪਾਹੀ ਦਿਲਜੀਤ ਸਿੰਘ ਅਤੇ ੲੇਅੈਸਆਈ ਗੁਰਪ੍ਰੀਤ ਸਿੰਘ ਨੇ ਮੁਲਜ਼ਮ ਦਾ ਪਿੱਛਾ ਕਰਕੇ ਉਸ ਨੂੰ ਕਾਬੂ ਕੀਤਾ| ਪੁਲਿਸ ਨੇ ਮੌਕੇ ਤੋ ਗੈਸ ਕਟਰ ਅਤੇ ਸਿਲੰਡਰ ਅਤੇ ਸਕੁੂਟਰ ਕਰਕੇ ਮੁਲਜ਼ਮ ਕੋਲੋਂ ਵਧੇਰੇ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ ਹੈ|
