ਖੰਨਾ ਤੋਂ ਵੱਡੀ ਖ਼ਬਰ ! ਚਾਹ ਦੀ ਦੁਕਾਨ ’ਤੇ ਰਾਈਸ ਮਿੱਲ ਦੇ ਮੁਲਾਜ਼ਮ ਦੀ ਗੋਲ਼ੀ ਮਾਰ ਕੇ ਹੱਤਿਆ, ਮੌਤ

ਖੰਨਾ : ਖੰਨਾ ਦੇ ਇੰਡਸਟਰੀਅਲ ਫੋਕਲ ਪੁਆਇੰਟ ਕੋਲ ਇਕ ਚਾਹ ਦੀ ਦੁਕਾਨ ’ਤੇ ਬੈਠੇ ਰਾਈਸ ਮਿੱਲ ਦੇ ਮੁਲਾਜ਼ਮ ਨੂੰ ਕਿਸੇ ਵਿਅਕਤੀ ਨੇ ਗੋਲ਼ੀ ਮਾਰ ਕੇ ਹੱਤਿਆ ਕਰ ਦਿੱਤੀ। ਮਿ੍ਰਤਕ ਗਿਰਜਾ ਪ੍ਰਸਾਦ ਦੀ ਉਮਰ ਕਰੀਬ 68 ਸਾਲ ਦੱਸੀ ਜਾ ਰਹੀ ਹੈ। ਗਿਰਜਾ ਪ੍ਰਸਾਦ ਦੇ ਨਾਲ ਉਸ ਦੀ ਪਤਨੀ ਵੀ ਦੁਕਾਨ ’ਤੇ ਬੈਠੀ ਹੋਈ ਸੀ। ਉਸਦਾ ਦਾਅਵਾ ਹੈ ਕਿ ਕਿਸੇ ਵਿਅਕਤੀ ਨੇ ਗੋਲ਼ੀ ਮਾਰੀ ਤੇ ਮੌਕੇ ਤੋਂ ਫਰਾਰ ਹੋ ਗਿਆ। ਹਾਲਾਂਕਿ, ਹਸਪਤਾਲ ’ਚ ਡਾਕਟਰਾਂ ਨੇ ਫਿਲਹਾਲ ਗੋਲੀ ਲੱਗਣ ਦੀ ਪੁਸ਼ਟੀ ਨਹੀਂ ਕੀਤੀ ਹੈ। ਘਟਨਾ ਸ਼ੁੱਕਰਵਾਰ ਦੀ ਰਾਤ ਪੌਣੇ ਨੌਂ ਵਜੇ ਦੀ ਦੱਸੀ ਜਾ ਰਹੀ ਹੈ। ਗਿਰਜਾ ਪ੍ਰਸਾਦ ਦੇ ਪੁੱਤਰ ਸੁਨੀਲ ਕੁਮਾਰ ਨੇ ਕਿਹਾ ਕਿ ਉਸਦੇ ਪਿਤਾ ਰਾਈਸ ਮਿੱਲ ’ਚ ਕੰਮ ਕਰਦੇ ਸਨ। ਫੋਕਲ ਪੁਆਇੰਟ ’ਚ ਉਨ੍ਹਾਂ ਦਾ ਘਰ ਹੈ ਤੇ ਘਰ ਦੇ ਕੋਲ ਹੀ ਉਨ੍ਹਾਂ ਦੀ ਚਾਹ ਦੀ ਦੁਕਾਨ ਹੈ। ਸ਼ੁੱਕਰਵਾਰ ਨੂੰ ਘਰ ਹੀ ਸੀ। ਉਸ ਦੇ ਮਾਤਾ-ਪਿਤਾ ਦੁਕਾਨ ’ਤੇ ਬੈਠੇ ਹੋਏ ਸਨ। ਕਰੀਬ ਪੌਣੇ ਨੌਂ ਵਜੇ ਉਸਦੀ ਮਾਂ ਦੇ ਚੀਕਣ ਦੀ ਆਵਾਜ਼ ਆਈ ਤਾਂ ਉਹ ਭੱਜ ਕੇ ਬਾਹਰ ਗਿਆ। ਇਸਦੇ ਪਿਤਾ ਜ਼ਮੀਨ ’ਤੇ ਡਿੱਗੇ ਹੋਏ ਸਨ। ਉਨ੍ਹਾਂ ਦੇ ਸਿਰ ’ਚੋਂ ਖੂਨ ਨਿਕਲ ਰਿਹਾ ਸੀ। ਸੁਨੀਲ ਅਨੁਸਾਰ, ਉਸਦੀ ਮਾਂ ਨੇ ਗੋਲੀ ਵਰਗੀ ਆਵਾਜ਼ ਸੁਣੀ। ਉਸ ਦੇ ਪਿਤਾ ਜ਼ਮੀਨ ’ਤੇ ਡਿੱਗ ਪਏ ਤੇ ਕਿਸੇ ਵਿਅਕਤੀ ਨੂੰ ਉਸ ਦੀ ਮਾਂ ਨੇ ਭੱਜਦੇ ਹੋਏ ਵੀ ਦੇਖਿਆ। ਸੁਨੀਲ ਅਨੁਸਾਰ ਡਾਕਟਰਾਂ ਨੇ ਪੁਸ਼ਟੀ ਲਈ ਸਵੇਰ ਤਕ ਦਾ ਸਮਾਂ ਲਿਆ ਹੈ। ਜਾਂਚ ਕੀਤੀ ਜਾ ਰਹੀ ਹੈ। ਸਿਵਲ ਹਸਪਤਾਲ ’ਚ ਐਮਰਜੈਂਸੀ ਡਿਊਟੀ ’ਤੇ ਤਾਇਨਾਤ ਡਾ. ਨਵਦੀਪ ਜੱਸਲ ਨੇ ਦੱਸਿਆ ਕਿ ਹਸਪਤਾਲ ਪਹੁੰਚਣ ਤਕ ਗਿਰਜਾ ਪ੍ਰਸਾਦ ਦੀ ਮੌਤ ਹੋ ਚੁੱਕੀ ਸੀ। ਉਸ ਦੇ ਨੱਕ ’ਚੋਂ ਖੂਨ ਨਿਕਲ ਰਿਹਾ ਸੀ ਤੇ ਸਿਰ ’ਤੇ ਸੱਟ ਦਾ ਨਿਸ਼ਾਨ ਹੈ। ਸ਼ਨਿਚਰਵਾਰ ਨੂੰ ਪੋਸਟਮਾਰਟਮ ਤੋਂ ਬਾਅਦ ਹੀ ਮੌਤ ਦੇ ਕਾਰਨ ਦੇ ਬਾਰੇ ਦੱਸਿਆ ਜਾ ਸਕੇਗਾ।