ਭਿੱਖੀਵਿੰਡ ਨੈਸ਼ਨਲ ਹਾਈਵੇ ’ਤੇ ਦਾਤਰ ਮਾਰ ਕੇ ਨੌਜਵਾਨ ਤੋਂ ਖੋਹਿਆ ਮੋਟਰ ਸਾਈਕਲ

ਭਿੱਖੀਵਿੰਡ : ਇਲਾਕੇ ਵਿਚ ਅਪਰਾਧ ਰੁਕੇ ਨਹੀਂ ਹਨ। ਤਾਜ਼ਾ ਘਟਨਾ ਵਿਚ ਸੁਰਸਿੰਘ ਦੇ ਨਜ਼ਦੀਕ ਜਾਂਦੇ ਮੋਟਰ ਸਾਈਕਲ ਸਵਾਰ ਨੌਜਵਾਨ ’ਤੇ ਦਾਤਰਾਂ ਨਾਲ ਹਮਲਾ ਕਰ ਕੇ ਮੋਟਰ ਸਾਈਕਲ ਖੋਹ ਲਿਆ ਗਿਆ ਹੈ। ਇਸ ਵਾਰਦਾਤ ਦੇ ਸ਼ਿਕਾਰ ਹੋਏ ਨੌਜਵਾਨ ਜਗਦੀਸ਼ ਸਿੰਘ ਨੇ ਦੱਸਿਆ ਕਿ ਉਹ ਹਰ ਰੋਜ਼ ਵਾਂਗ ਜਦੋਂ ਉਹ ਭਿੱਖੀਵਿੰਡ ਤੋਂ ਆਪਣੇ ਪਿੰਡ ਪੱਧਰੀ ਕਲਾਂ ਨੂੰ ਜਾ ਰਿਹਾ ਸੀ ਤਾਂ ਉਸ ਦੇ ਪਿੱਛੋਂ ਆਉਂਦੇ ਮੋਟਰ ਸਾਈਕਲ ਸਵਾਰ ਨਕਾਬਪੋਸ਼ ਲੁਟੇਰਿਆਂ ਨੇ ਸੁਰਸਿੰਘ ਲਾਗੇ ਨੈਸ਼ਨਲ ਹਾਈਵੇ ’ਤੇ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ। ਇਸ ਨਾਲ ਉਹ ਮੋਟਰ ਸਾਈਕਲ ਸਮੇਤ ਸੜਕ ਦੇ ਇਕ ਪਾਸੇ ਡਿੱਗ ਪਿਆ। ਡਿੱਗਣ ਮਗਰੋਂ ਵੀ ਲੁਟੇਰਿਆਂ ਨੇ ਉਸ ’ਤੇ ਹਮਲਾ ਕੀਤਾ ਤਾਂ ਮਸਾਂ ਚੁੰਗਲ ਵਿੱਚੋਂ ਨਿਕਲ ਕੇ ਨੇੜਲੇ ਪੈਟਰੋਲ ਪੰਪ ’ਤੇ ਪਹੁੰਚ ਕੇ ਜਾਨ ਬਚਾਈ। ਲੁਟੇਰੇ ਉਸ ਦਾ ਮੋਟਰ ਸਾਈਕਲ ਲੈ ਕੇ ਭੱਜ ਗਏ ਹਨ। ਦੱਸਣਾ ਬਣਦਾ ਹੈ ਕਿ ਭਿੱਖੀਵਿੰਡ ਵਿਖੇ ਇਸੇ ਰੋਡ ’ਤੇ ਕਰੀਬ ਹਫ਼ਤਾ ਪਹਿਲਾਂ ਘਰੋਂ ਸੈਰ ਲਈ ਨਿਕਲੇ ਨੌਜਵਾਨ ਦੇ ਪੈਰ ਵਿਚ ਗੋਲੀ ਮਾਰ ਕੇ ਮੋਬਾਈਲ ਖੋਹ ਲਿਆ ਗਿਆ ਸੀ। ਉਹ ਮੁਲਜ਼ਮ ਹਾਲੇ ਤਕ ਕਾਬੂ ਨਹੀਂ ਆ ਸਕਿਆ।