ਜਲੰਧਰ: ਫਿਰੌਤੀ ਮੰਗਣ ਅਤੇ ਗੋਲੀਬਾਰੀ ਮਾਮਲੇ ’ਚ 8 ਅਪਰਾਧੀ ਕਾਬੂ, ਇੱਕ ਮੁਕਾਬਲੇ ਦੌਰਾਨ ਜਖ਼ਮੀ

ਜਲੰਧਰ : ਜਲੰਧਰ ਦੇਹਾਤ ਪੁਲਿਸ ਨੇ ਇੱਕ ਵੱਡੀ ਕਾਰਵਾਈ ਕਰਦਿਆਂ ਫਿਰੌਤੀ ਮੰਗਣ ਅਤੇ ਗੋਲੀਬਾਰੀ ਦੇ ਮਾਮਲੇ ’ਚ ਵਿਦੇਸ਼ੀ ਗੈਂਗ ਨਾਲ ਸਬੰਧਤ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ। ਪੁਲਿਸ ਨੇ ਮੋਕੇ ਤੋਂ 8 ਅਪਰਾਧੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ, ਜਿਨ੍ਹਾਂ ਵਿੱਚੋਂ ਇੱਕ ਅਪਰਾਧੀ ਪੁਲਿਸ ਨਾਲ ਮੁਕਾਬਲੇ ਦੌਰਾਨ ਜਖ਼ਮੀ ਹੋ ਗਿਆ।

ਐਸ.ਐਸ.ਪੀ. ਹਰਵਿੰਦਰ ਸਿੰਘ ਵਿਰਕ ਨੇ ਦੱਸਿਆ ਕਿ ਸੀ.ਆਈ.ਏ. ਸਟਾਫ ਨੇ ਲੋਹੀਆ ਥਾਣਾ ਖੇਤਰ ਵਿੱਚ ਆਉਣ ਵਾਲੇ HP ਪੈਟਰੋਲ ਪੰਪ ਦੇ ਮਾਲਕ ਨੂੰ ਵਿਦੇਸ਼ ਤੋਂ ਫੋਨ ਕਰਕੇ ਫਿਰੌਤੀ ਮੰਗਣ ਅਤੇ ਗੋਲੀ ਮਾਰਨ ਦੀ ਧਮਕੀ ਦੇਣ ਵਾਲੇ ਮੁੱਖ ਆਰੋਪੀ ਗੁਰਚਰਨ ਸਿੰਘ ਉਰਫ ਲਾਲੀ ਵਾਸੀ ਥਾਣਾ ਲੋਹੀਆ ਖਿਲਾਫ ਮਾਮਲਾ ਦਰਜ ਕੀਤਾ ਸੀ।

ਜਾਂਚ ਦੌਰਾਨ ਇਹ ਗੱਲ ਸਾਹਮਣੇ ਆਈ ਕਿ ਗਿਰੋਹ ਦੇ ਆਰੋਪੀ ਅਮਰੀਕਾ ਅਤੇ ਇੰਗਲੈਂਡ ਵਿੱਚ ਰਹਿੰਦੇ ਕੁਝ ਮਸ਼ਹੂਰ ਗੈਂਗਸਟਰਾਂ ਦੇ ਨਾਂ ਲੈ ਕੇ ਲੋਕਾਂ ਨੂੰ ਡਰਾਉਂਦੇ-ਧਮਕਾਉਂਦੇ ਸਨ। ਇਹ ਵਿਅਕਤੀ ਵੱਖ-ਵੱਖ ਵਪਾਰੀਆਂ ਨੂੰ ਵਿਦੇਸ਼ੀ ਨੰਬਰਾਂ ਤੋਂ ਫੋਨ ਕਰਕੇ ਲੱਖਾਂ ਰੁਪਏ ਦੀ ਫਿਰੌਤੀ ਮੰਗਦੇ ਸਨ।

ਗ੍ਰਿਫਤਾਰ ਆਰੋਪੀਆਂ ਦੀ ਪਹਚਾਨ:

1. ਅਨਮੋਲਪ੍ਰੀਤ ਸਿੰਘ ਉਰਫ ਮੇਲਾ ਪੁੱਤਰ ਨਿਸਾਨ ਸਿੰਘ, ਵਾਸੀ ਚੱਕ ਯੂਸਰਪੁਰ, ਜਿਲਾ ਜਲੰਧਰ

2. ਨਵਦੀਪ ਸਿੰਘ ਉਰਫ ਸੋਨਾ ਪੁੱਤਰ ਤਰਸੇਮ ਸਿੰਘ ਉਰਫ ਬਿੱਟੂ, ਵਾਸੀ ਹੰਸਾਵਾਲਾ, ਜਿਲਾ ਤਰਨਤਾਰਨ

3. ਸੁਰਿੰਦਰਪਾਲ ਸਿੰਘ ਉਰਫ ਸਿੱਧਾ ਪੁੱਤਰ ਅਮਰਜੀਤ ਸਿੰਘ, ਵਾਸੀ ਪੂਨੀਆ, ਥਾਣਾ ਸ਼ਾਹਕੋਟ

4. ਅਮਿਤ ਸਿੰਘ ਉਰਫ ਅਮਨ ਪੁੱਤਰ ਨਿਰਮਲ ਸਿੰਘ, ਵਾਸੀ ਕਾਂਗਣਾ, ਥਾਣਾ ਸ਼ਾਹਕੋਟ

5. ਮਨਪ੍ਰੀਤ ਸਿੰਘ ਉਰਫ ਨਾਨਾ ਪੁੱਤਰ ਗੁਰਮੀਤ ਸਿੰਘ, ਵਾਸੀ ਪੂਨੀਆ

6. ਜਸਪ੍ਰੀਤ ਸਿੰਘ ਉਰਫ ਜਸਨ ਪੁੱਤਰ ਜਗਤਾਰ ਸਿੰਘ, ਵਾਸੀ ਫਤਿਹਪੁਰ ਭਗਵਾਂ

7. ਗੁਰਚਰਨ ਸਿੰਘ ਉਰਫ ਲਾਲੀ, ਵਾਸੀ ਲੋਹੀਆ

8. ਇੱਕ ਹੋਰ ਨਾਬਾਲਿਗ ਜੋ ਪਹਿਲਾਂ ਗ੍ਰਿਫਤਾਰ ਕੀਤਾ ਗਿਆ ਸੀ

 

ਮਹੱਤਵਪੂਰਨ ਬਰਾਮਦਗੀ:

ਪੁਲਿਸ ਨੇ ਆਰੋਪੀਆਂ ਕੋਲੋਂ ਇੱਕ ਦੇਸੀ ਪਿਸਤੌਲ, ਰੌਂਦ, ਬਿਨਾਂ ਨੰਬਰ ਵਾਲੀ ਪਲਸਰ ਮੋਟਰਸਾਈਕਲ ਅਤੇ ਮੋਬਾਈਲ ਫੋਨ ਬਰਾਮਦ ਕੀਤੇ ਹਨ।

ਐਸ.ਐਸ.ਪੀ. ਵਿਰਕ ਨੇ ਇਹ ਵੀ ਦੱਸਿਆ ਕਿ ਆਰੋਪੀ ਵਿਦੇਸ਼ੀ ਨੰਬਰਾਂ ਤੋਂ ਬਿਜ਼ਨੈੱਸਮੈਨਜ਼ ਨੂੰ ਫੋਨ ਕਰਕੇ ਡਰਾਉਂਦੇ, ਜਿਨ੍ਹਾਂ ਦੇ ਲਿੰਕ ਜਰਮਨ ਅਤੇ ਅਮਰੀਕਾ ਵਿੱਚ ਰਹਿੰਦੇ ਗੈਂਗਸਟਰਾਂ ਨਾਲ ਸਨ। ਫਿਰੌਤੀ ਮੰਗਣ ਵੇਲੇ ਇਹ ਲੋਕ ਗੋਲੀ ਚਲਾਉਂਦੇ ਸਨ ਤਾਂ ਜੋ ਲੋੜੀਂਦੇ ਲੋਕ ਡਰ ਕੇ ਪੈਸਾ ਦੇਣ।

ਪੁਲਿਸ ਵਲੋਂ ਮੁਕਾਬਲੇ ਦੌਰਾਨ ਇੱਕ ਅਪਰਾਧੀ ਜਖ਼ਮੀ ਹੋਇਆ ਹੈ ਅਤੇ ਸਾਰੇ ਗ੍ਰਿਫਤਾਰ ਹੋ ਚੁੱਕੇ ਹਨ।

ਜਿਲ੍ਹਾ ਪੁਲਿਸ ਵਲੋਂ ਵੱਡੀ ਕਾਰਵਾਈ ਕਰਦਿਆਂ ਅੰਤਰਰਾਸ਼ਟਰੀ ਲਿੰਕ ਵਾਲੇ ਗੈਂਗ ਦਾ ਭੰਡਾਫੋੜ ਹੋਇਆ ਹੈ ਜੋ ਸਥਾਨਕ ਵਪਾਰੀਆਂ ਨੂੰ ਨਿਸ਼ਾਨਾ ਬਣਾ ਰਹੇ ਸਨ।